ព្រះសីហនុ៖ការអនុវត្តសាលដីការបស់តុលាការកំពូល ដែលធ្វើឡើងដោយ អាជ្ញាសាលា នៃសាលាដំបូងខេត្តព្រះសីហនុ ដែលនឹងធ្វើឡើងនៅថ្ងៃទី២៩ ខែឧសភា ឆ្នាំ២០២០ស្អែកនេះ គឺជាការអនុវត្តដ៏ត្រឹមត្រូវ នូវច្បាប់ នៃព្រះរាជាណាចក្រកម្ពុជា ដែលរឿងក្តីនេះ ម្ចាស់បំណុលនៃការអនុវត្តបានឈ្នះគ្រប់សាលាជំនុំជម្រះក្តី ហើយដែលបានអូសបន្លាយពេលវេលាជាច្រើនឆ្នាំ។
មេធាវី ឈឹម ឆេងឃាង តំណាងឲ្យភាគីឈ្នះក្តីនៅថ្ងៃទី២៨ខែឧសភានេះ បានបញ្ជាក់បន្ថែមថា រឿងក្តីនេះកើតឡើងដោយសារតែសហកូនបំណុល នៃការអនុវត្ត(អ្នកចាញ់ក្តី) បានកែនប្រមូលគ្នាមកនៅលើដី ដែលជាកម្មសិទ្ធិរបស់ម្ចាស់បំណុលនៃការអនុវត្ត ( ម្ចាស់ដីឬ អ្នកឈ្នះក្តី) នេះជាហេតុធ្វើឲ្យម្ចាស់ដីមិនអាចប្រកបមុរបរ រកស៊ីអ្វីបានទាំងអស់ ដែលធ្វើឲ្យម្ចាស់ដីមានការខាងបង់យ៉ាងធ្ងន់ធ្ងរ ។
មុនឈានដល់ការអនុវត្តដោយបង្ខំនេះ ម្ចាស់ដីបានព្យាយាមចរចា និងសម្របសម្រួលជាមួយសហកូនបំណុល នៃការអនុវត្តជាច្រើនលើកច្រើនដង ច្រើនឆ្នាំ នៅទីតាំងផ្ទាល់ផង នៅថ្នាក់ក្រុងផង ថ្នាក់ខេត្តផង ទោះម្ចាស់ដី មានទឹកចិត្តសម្បទានឲ្យជាសោហ៊ុយ ឬដោះដូរជាដី ក៏សហកូនបំណុលនៃការអនុវត្ត (អ្នកចាញ់ក្តី) នៅតែមិនព្រមដែរ។ រហូតដល់ការចរចាចុងក្រោយបំផុត ដែលធ្វើឡើងនៅថ្នាក់ខេត្ត នៅថ្ងៃទី៧ ខែកុម្ភៈ ឆ្នាំ២០២០ ក្រោមកិច្ចសម្របសម្រួលរបស់លោកអភិបាលខេត្តព្រះសីហនុ ឯកឧត្តម គួច ចំរើន ដែលមានសមាសភាពចូលរួម ដូចជាមន្ត្រី សាលាខេត្តព្រះសីហនុ អាជ្ញាសាលា កងរាជអាវុធហត្ថ ស្នងការ និងអាជ្ញាធរមូលដ្ឋានចំណុះសាលាខេត្ត ភាគីម្ចាស់ដី សហកូនបំណុលនៃការអនុវត្ត (អ្នកចាញ់ក្តី) និងភាគីពាក់ព័ន្ធផ្សេងទៀត ដើម្បីរកដំណោះស្រាយ ក៏សហកូនបំណុលនៃការអនុវត្ត (អ្នកចាញ់ក្តី) នៅតែមិនព្រម ទោះបីលោកអភិបាលខេត្តព្រះសីហនុ បានសន្យាថានឹងជួយនិយាយជាមួយម្ចាស់ដី ដើម្បីផ្តល់ប្រាក់ទៅពួកគាត់មួយចំនួន ជាថ្នូរនឹងការចាកចេញក៏ដោយស្ម័គ្រចិត្ត។
សហកូនបំណុល នៃការអនុវត្តទាមទារយកតម្លៃទីផ្សារគឺដី១ម៉ែត្រការ៉េ ទារពីម្ចាស់ដីក្នុងតម្លៃ ១៥០០$ដុល្លារអាមេរិច ឬ ៥ ០០០ ០០០ $ (៥លានដុល្លារអាមេរិច) ជាថ្នូរនឹងការចាកចេញពីដីរបស់ម្ចាស់បំណុលនៃការអនុវត្ត( ម្ចាស់ដីឬ អ្នកឈ្នះក្តី) ដែលម្ចាស់បំណុលនៃការអនុវត្តមិនអាចទទួលយកបាន ព្រោះសហកូនបំណុលនៃការអនុវត្ត ចូលមករំលោភយកដីដែលជាកម្មសិទ្ធិស្របច្បាប់របស់ខ្លួន ។
តែទោះជាយ៉ាងណាក៏ដោយ ក៏ម្ចាស់ដីនៅតែមានទឹកចិត្តផ្តល់ជាសោហ៊ុយ ឬដោះដូរដីឲ្យពួកគាត់យ៉ាងសមរម្យ បំផុត ក្នុងនាមជាខ្មែរដូចគ្នា ទោះបីជាស្ថិតក្នុងនីតិវិធីនៃការអនុវត្តដោយបង្ខំកំពុងតែដំណើរការដ៏ដោយ។ បន្ថែមពីនេះទៀត អាជ្ញាសាលា នៃសាលាដំបូងខេត្តព្រះសីហនុ បានព្យាយាមសម្របសម្រួលឲ្យពួកគាត់រុះរើ និងចាកចេញដោយស្ម័គ្រចិត្ត ហើយម្ចាស់ដីនឹងឲ្យជាសោហ៊ុយ ឬដោះដូរដីឲ្យពួកគាត់ តែពួកគាត់នៅតែមិនព្រមឡើយ រហូតចុងក្រោយបំផុត តុលាការអនុវត្តក៏បានចូលមកជួយសម្របសម្រួល ជាមួយសហកូនបំណុល នៃការអនុវត្ត(អ្នកចាញ់ក្តី) ឲ្យរុះរើ និងចាកចេញដោយស្ម័គ្រចិត្ត ប៉ុន្តែពួកគាត់នៅតែមិនព្រមដដែល ។
អាស្រ័យហេតុដូចបានរៀបរាប់ ដោយសង្ខេបខាងលើនេះ សបញ្ជាក់ថា សហកូនបំណុល នៃការអនុវត្តពុំមានចេតនាសុចរិតណាមួយ ក្នុងការប្រគល់ និងចាកចេញពីដីរបស់ម្ចាស់បំណុល នៃការអនុវត្តឡើយ។ ដូច្នេះហើយ ទើបឈានដល់ការអនុវត្តដោយបង្ខំ តាមសេចក្តីសម្រេចសាលដីការបស់តុលាការកំពូល ដែលនឹងត្រូវអនុវត្តនៅថ្ងៃទី២៩ ខែឧសភា ឆ្នាំ២០២០ស្អែកនេះ៕
ដោយ៖បញ្ញាស័ក្តិ