ភ្នំពេញ៖ លោក Masahiro MIKAMI ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជាថា រាជរដ្ឋាភិបាលជប៉ុន គ្រោងនឹងផ្តល់នូវហិរញ្ញប្បទានឥតសំណងទឹកប្រាក់ប្រមាណ២ ០០០លានយ៉េនជប៉ុន ឬប្រមាណ១៨លានដុល្លារអាមេរិក ដល់រាជរដ្ឋាភិបាលកម្ពុជា តាមរយៈការផ្តល់ជាឧបករណ៍ សម្ភារ និងបរិក្ខារពេទ្យជូនក្រសួងសុខាភិបាល សម្រាប់ទប់ស្កាត់ និងបង្ការការរីករាលដាលនៃជំងឺកូវីដ១៩នៅកម្ពុជា។
ការថ្លែងបែបនេះធ្វើឡើងក្នុងជំនួបពិភាក្សាការងារ រវាងឯកឧត្តមឯកអគ្គរាជទូតជប៉ុននិង ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅព្រឹកថ្ងៃទី ២៧ ខែ ឧសភា ឆ្នាំ ២០២០ នៅទីស្តីការក្រសួងសេដ្ឋកិច្ច និងហិរញ្ញវត្ថុ។
ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលនិងប្រជាជនជប៉ុន ដែលបានផ្តល់ជំនួយបច្ចេកទេស ហិរញ្ញប្បទានឥតសំណង និងឥណទានសម្បទានរួមចំណែកដល់ការអភិវឌ្ឍសេដ្ឋកិច្ច និងសង្គមនៅកម្ពុជា រហូតមក។
ឯកឧត្តមថា ជំនួយនេះចំពេលដែលកម្ពុជា ក៏ដូចជាពិភពលោកកំពុងតែជួបវិបត្តិ និងការរាលដាលនៃជំងឺកូវីដ-១៩។
ឯកឧត្តមថា រាជរដ្ឋាភិបាលជប៉ុន គ្រោងនឹងផ្តល់នូវហិរញ្ញប្បទានឥតសំណង ទឹកប្រាក់ប្រមាណ២០០០លានយ៉េនជប៉ុន ត្រូវជាប្រមាណ១៨លានដុល្លារអាមេរិក ជូនរាជរដ្ឋាភិបាលកម្ពុជា តាមរយៈការផ្តល់ជាឧបករណ៍ សម្ភារ និងបរិក្ខារពេទ្យជូនក្រសួងសុខាភិបាលសម្រាប់ទប់ស្កាត់ និងបង្ការការរីករាលដាលនៃជំងឺកូវីដ១៩នៅកម្ពុជា៕ដោយ៖សម្ផស្ស
