អ្នកការទូតជើងចាស់អាមេរិចឈ្មោះ Bill Richardson បានសម្រេចចិត្តលាលែងចេញពីក្រុមប្រឹក្សា អន្តរជាតិ ដែលបង្កើតឡើងដោយមេដឹកនាំមីយ៉ានម៉ា អ៊ុងសាន សូជី (Aung San Suu Kyi) ដើម្បីផ្តល់យោបល់លើវិបត្តិជនជាតិរ៉ូហ៊ីងយ៉ានៅក្នុងប្រទេសនេះ។ នេះបើតាមការចេញផ្សាយរបស់ BBC។
លោក Bill Richardson បានបញ្ជាក់ថា “ហេតុផលដែលលោកសម្រេចចិត្តលាលែង គឺដោយសារតែក្រុមប្រឹក្សានោះ គឺជាក្រុមលាក់បាំងការពិត” ដូច្នេះលោកមិនចង់ចូលរួមជាមួយនឹងក្រុមនោះបន្តទៀត ដើម្បីគាំទ្ររដ្ឋាភិបាលមីយ៉ានម៉ាទេ។
លោកក៏បានចោទប្រកាន់អ្នកស្រី អ៊ុងសាន សូជីថា គ្មានសិលធ៌មអ្នកដឹកនាំ លើបញ្ហារ៉ូហ៊ីងយ៉ា។
រដ្ឋាភិបាលមីយ៉ានម៉ាពុំទាន់មានការឆ្លើយតបជុំវិញការចោទប្រកាន់នោះនៅឡើយទេ ប៉ុន្តែសមាជិកផ្សេងៗនៃក្រុមនោះបាននិយាយថា ការបញ្ចេញមតិរបស់លោក Bill Richard គឺជារឿងមិនត្រឹមត្រូវ។
តាំងពីមានអំពើហឹង្សាផ្ទុះឡើងនៅក្នុងរដ្ឋរ៉ាឃីន ប្រទេសមីយ៉ានម៉ា ជនជាតិដើមភាគតិចរ៉ូហ៊ីងយ៉ាច្រើនជាង ៦៥០.០០០នាក់ បានរត់ភៀសខ្លួនទៅកាន់ប្រទេសបង់ក្លាដេស។
ប៉ុន្តែកាលពីពេលថ្មីៗនេះ រដ្ឋាភិបាលបង់ក្លាដេស និងមីយ៉ានម៉ា បានព្រមព្រៀងគ្នាបញ្ជូនជនជាតិទាំងនោះត្រឡប់មកមីយ៉ានម៉ាវិញ ដោយការបញ្ជូននឹងត្រូវការរយៈពេល ២ឆ្នាំ ៕ សុភ័ក្ត្រ
