ជាការពិតណាស់ ភាពជោគជ័យក្នុងការសិក្សា គឺជារឿងដ៏សំខាន់មួយ ដែលយើងគ្រប់គ្នា ជាពិសេសប្អូនៗសិស្សានុសិស្សទាំងអស់ចង់បានខ្លាំងបំផុត ព្រោះថា ចំណេះនេះឯងគឺជាស្ពានដែលអាចចម្លងយើងទាំងអស់គ្នាឲ្យមានក្តីសង្ឃឹមខ្ពស់នៅថ្ងៃអនាគត។ ជាមួយនឹងភាពជោគជ័យនេះផងដែរ គេក៏ច្រើនសង្កេតឃើញយុវជនភាគច្រើន នាំគ្នាធ្វើរឿងសប្បាយៗ ដូចជាជប់លៀងជួបជុំគ្នាជាដើម។
ដោយឡែក ប្អូនស្រីម្នាក់នេះ បានធ្វើឲ្យគ្រប់គ្នានៅលើបណ្តាញសង្គម រំជួលចិត្ត និងរំភើបជំនួសជាខ្លាំង ចំពោះសកម្មភាពមួយដែលនាងបានធ្វើឲ្យឪពុកម្តាយ របស់នាងស្រឡាំងកាំងសឹងរកពាក្យថ្លែងពុំចេញព្រោះតែពុំនឹកស្មានដល់ថា កូនស្រីស្រាប់តែចូលមកពញ្ញាក់អារម្មណ៍ជាមួយសញ្ញាបត្រ រួចក្រាបសំពះបាតជើងពួកគាត់នៅឯកន្លែងស៊ីឈ្នួលក្នុងចម្ការអំពៅបែបនេះ បន្ទាប់ពីនាងទទួលជោគជ័យក្នុងការសិក្សា។
ប្អូនស្រីខាងលើមានឈ្មោះ អូរ៉ាណង អិនផេត អាយុ ២០ ឆ្នាំ ។ នាងទើបតែបានទទួលសញ្ញាបត្រកាលពីពេលថ្មីៗនេះ បន្ទាប់បញ្ចប់ការសិក្សានៅមហាវិទ្យាល័យឧស្សាហកម្ម និងសហគមន៍អប់រំ Sribunrueang ស្ថិតនៅក្នុងខេត្ត Bua Lamphu ប្រទេសថៃ។
នេះពិតជាសម្តែងនូវការដឹងគុណនិងភាពជាកូនកត្តញូខ្លាំងណាស់ សម្រាប់ប្អូនស្រីម្នាក់នេះ ដែលបានធ្វើជូនចំពោះឪពុកម្តាយរបស់នាង ដែលបានខំប្រឹងប្រែងធ្វើការរកស៊ីមិនគិតជាការនឿយហត់ ដើម្បីចិញ្ចឹមទំនុកបម្រុងកូនស្រីម្នាក់នេះ រហូតទទួលបានលទ្ធផលដ៏ត្រចះត្រចង់ដូចថ្ងៃនេះ។ ហេតុដូច្នេះហើយ ក្នុងនាមយើងជាកូនត្រូវតែតបស្នងសងគុណពួកគាត់ទាំងពីរវិញ និងមិនត្រូវធ្វើឲ្យគាត់ពិបាកចិត្ត និងអស់សង្ឃឹមមកលើយើងនោះឡើយ៕
ដោយ៖ លឹម ហុង
