រដ្ឋាភិបាលទីក្រុងហុងកុង បានធ្វើការព្រមានទីក្រុងវ៉ាស៊ីនតោនថា ការដកឋានៈពិសេសរបស់អាមេរិចចេញពីទីក្រុងហុងកុងអាចជាអាវុធមុខពីរ ហើយរដ្ឋាភិបាលបានជំរុញាមេរិច ឲ្យឈប់ជ្រៀតជ្រែកចូលក្នុងកិច្ចការផ្ទៃក្នុងរបស់ហុងកុង។
ការព្រមានពីផលវិបាកទាំងសងខាងនេះ កើតឡើងក្រោយពេលប្រធានាធិបតីអាមេរិច ដូណាល់ ត្រាំ គ្រោងនឹងធ្វើសន្និសិទសារពត៌មាននៅថ្ងៃសុក្រ ដើម្បីបញ្ជាក់ពីវិធានការឆ្លើយតបទៅកាន់ទីក្រុងប៉េកាំង ជុំវិញការស្នើច្បាប់សន្និសុខជាតិសម្រាប់ហុងកុង។ អ្នកជំនាញមានការព្រួយបារម្ភថា ច្បាប់នោះនឹងគំរាមកំហែងសល់សេរីភាពរបស់ហុងកុង។
ហុងកុង ដែលជាអតីតដែនដីអាណានិគមន៍របស់អង់គ្លេស ទទួលបានស្វ័យភាពកម្រិតខ្ពស់តាមរូបមន្ត “ប្រទេសមួយ ប្រព័ន្ធពីរ” ចាប់តាំងពីវាត្រូវបានអង់គ្លេស ប្រគល់ទៅឲ្យចិនគ្រប់គ្រងវិញក្នុងឆ្នាំ ១៩៩៧។
រដ្ឋាភិបាលហុងកុងថ្លែងក្នុងសេចក្តីប្រកាសថា “រាល់ទណ្ឌកម្មទាំងអស់ជាដាវមុខពីរ ដែលគំរាមកំហែងមិនត្រឹមតែផលប្រយោជន៍ហុងកុងឡើយ ប៉ុន្តែទាំងផលប្រយោជន៍របស់អាមេរិច”។
សេចក្តីប្រកាសបន្ថែមថា ចាប់តាំងពីឆ្នាំ ២០០៩ ដល់ ២០១៨ ពាណិជ្ជកម្មអាមេរិចជាមួយនឹងហុងកុង គឺធំជាងគេបំផុតក្នុងចំណោមដៃគូពាណិជ្ជកម្មទាំងអស់ របស់អាមេរិច ដោយមានទំហំពាណិជ្ជកម្មសរុបចំនួន ២៩៧ពាន់លានដុល្លារ ហើយក្រុមហ៊ុនអាមេរិចចំនួន ១.៣០០មានមូលដ្ឋាននៅហុងកុង។
សូមបញ្ជាក់ថា ចាប់តាំងពីទីក្រុងប៉េកាំង បាននិយាយថា ការស្នើច្បាប់សន្តិសុខជាតិសម្រាប់ទីក្រុងហុងកុង គឺដើម្បីសោះស្រាយបញ្ហាអបគមន៍ ការបះបោរ សកម្មភាពភេរវកម្ម និងការជ្រៀតជ្រែករបស់បរទេស ចូលក្នុងកិច្ចការរបស់ទីក្រុង។ បើច្បាប់ដំណើរការ គេនឹងអាចឃើញភ្នាក់ងារស៊ើបអង្កេត បើកមូលដ្ឋាននៅក្នុងទីក្រុង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia