ក្រសួងយុត្តិធម៌អាមេរិច បានធ្វើការចោទប្រកាន់ ជនជាតិកូរ៉េខាងជើងចំនួន ២៨នាក់ និងជនជាតិចិន ៥នាក់ ជាមេខ្លោងនៃការលាងលុយ ដែលចរាចរណ៍លុយរាប់ពាន់លានដុល្លារ តាមធនាគារជុំវិញពិភពលោក ដើម្បីចៀសផុតពីទណ្ឌកម្មប្រឆាំងនឹងទីក្រុងព្យុងយ៉ាង។
បណ្តាញពួកគេបានដំណើរការទឹកប្រាក់ប្រមាណ ២,៥ពាន់លានដុល្លារ តាមក្រុមហ៊ុនច្រើនជាង ២៥នៅប្រទេសថៃ លីប៊ី អូទ្រីស រុស្សី ចិន និងគុយវ៉ែត ដើម្បីបញ្ចៀសទណ្ឌកម្ម ទិញទំនិញណាដែលកូរ៉េខាងជើង ត្រូវការ និងដើម្បីធ្វើឲ្យជនសង្ស័យមានបាន។ នេះបើយោងតាមការចោទប្រកាន់ ដែលបានដាក់ប្តឹងនៅតុលាការសហព័ន្ធ ក្នុងទីក្រុងវ៉ាស៊ីនតោន។
ការចោទប្រកាន់ស្ទើរតែទាំងអស់ ពាក់ព័ន្ធទៅនឹងសាខានៃធនាគារពាណិជ្ជកម្មបរទេស របស់កូរ៉េខាងជើង ដែលស្ថិតក្នុងបញ្ជីខ្មៅ និងរួមមានមនុស្ស ២នាក់ដែលបានធ្វើជាប្រធានធនាគារ ហើយអ្នកទាំងនោះមានឈ្មោះថា Ko Chol Man និង Kim Song Ui និងមានអនុប្រធាន ២នាក់ទៀត។
ពួកគេទាំងនោះរងការចោទប្រកាន់ថា បានប្រើប្រាស់ក្រុមហ៊ុនជួរមុខ ដើម្បីបោសសម្អាតប្រតិបត្តិការសាច់ប្រាក់ដុល្លារ តាមរយៈបណ្តាញហិរញ្ញវត្ថុ ដែលឆ្លងកាត់អាមេរិច ដែលវាគឺជារឿងខុសច្បាប់ សម្រាប់ធនាគារពាណិជ្ជកម្មបរទេស របស់កូរ៉េខាងជើង និងក្រុមហ៊ុនផ្សេងៗទៀត ដែលរងទណ្ឌកម្មពាណិជ្ជកម្ម និងនុយក្លេអ៊ែរ ប្រឆាំងនឹងកូរ៉េខាងជើង។
នៅក្នុងសេចក្តីចោទប្រកាន់បន្តទៀថថា នៅក្នុងគម្រោងការដែលដំណើរចាប់ពីឆ្នាំ ២០១៣រហូតដល់ឆ្នាំនេះ ចុងចោទ និងអ្នករួមគំនិតបានធ្វើការលាក់បាំង ការពាក់ព័ន្ធរបស់ធនាគារពាណិជ្ជកម្មបរទេសកូរ៉េខាងជើង (FTB) ជាមួយនឹងការទូទាត់ប្រាក់ដុល្លារអាមេរិច ពីធនាគារផ្សេងៗ ដើម្បីបញ្ឆោតធនាគារពីដំណើរការទូទាត់។
ក្នុងរយៈពេលនោះ អាមេរិចបានរឹបអូសលុយបានចំនួន ៦៣លានដុល្លារ។
សូមបញ្ជាក់ថា របបគីម ជុងអ៊ុន បានរងទណ្ឌកម្មយ៉ាងធ្ងន់ ពីអង្គការសហប្រជាជាតិជុំវិញកម្មវិធីនុយក្លេអ៊េររបស់ខ្លួន៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP