ភ្នំពេញ៖ រាជរដ្ឋាភិបាលកម្ពុជា បានយល់ព្រមបន្ថយអត្រាការប្រាក់១ភាគរយទៀត នៃកញ្ចប់ថវិកាពិសេសទំហំ ៥០លានដុល្លារអាមេរិក តាមរយៈធនាគារអភិវឌ្ឍន៍ និងកសិកម្ម ដែលផ្តល់ឲ្យសម្រាប់សហគ្រាសធុនតូចនិងមធ្យម (SMEs) នៅក្នុងវិស័យកសិកម្ម ពោលគឺបន្ថយអត្រាការប្រាក់សម្រាប់កម្ចីទុនបង្វិលពី ៦% មក ៥% និងសម្រាប់ទុនវិនិយោគពី ៦,៥% មក ៥,៥% ដោយមិនគិតកម្រៃសេវាផ្សេងៗ។
ការម្រេចនេះ គឺតាមរយៈសេចក្តីប្រកាសព័ត៌មានរបស់រដ្ឋាភិបាល ស្តីពីវិធានការបន្ថែមសំដៅជួយដល់វិស័យឯកជន និងកម្មករ-និយោជិត ដែលទទួលរងផលប៉ះពាល់ធ្ងន់ធ្ងរ ពីការរីករាល ដាលនៃជំងឺកូវីដ១៩ និងវិធានការស្តារ និងជំរុញកំណើនសេដ្ឋកិច្ចក្រោយវិបត្តិនៃជំងឺនេះ ជុំទី៤ កាលពីថ្ងៃទី២៦ ឧសភា ឆ្នាំ២០២០។
ការចុះថ្លៃការប្រាក់ចំនួន ១ ភាគរយទៀតនេះ មានន័យថា ម្ចាស់សហគ្រាសដែលខ្ចីឥណទានពិសេសនេះ យកទៅធ្វើជាទុនបង្វិល ត្រូវចុះពី៦ភាគរយ មកនៅ៥ភាគរយ។ ចំណែកម្ចាស់សហគ្រាសដែលខ្ចីប្រាក់សម្រាប់យកទៅវិនិយោគ គឺចុះពីការប្រាក់៦,៥ មកនៅត្រឹម៥,៥ភាគរយវិញ។ ក្រៅតែពីការទម្លាក់អត្រាការប្រាក់ រដ្ឋាភិបាលក៏បានទុកលទ្ធភាពឱ្យម្ចាស់សហគ្រាស ដែលខ្ចីប្រាក់យកធ្វើជាទុនបង្វិល មានរយៈរហូតដល់៧ឆ្នាំ។ តែចំពោះម្ចាស់សហគ្រាសដែលខ្ចីប្រាក់សម្រាប់វិនិយោគវិញ គឺនៅតែរក្សារយៈពេលខ្ចីយ៉ាងយូរ២ឆ្នាំដដែល។
បើតាមឯកឧត្តម កៅ ថាច អគ្គនាយកធនាគារអភិវឌ្ឍន៍ជនបទ និងកសិម្ម បានឲ្យដឹងថា ម្ចាស់សហគ្រាសនីមួយៗ អាចមានលទ្ធភាពទទួលបានឥណទានក្នុងកញ្ចប់ថវិការដ្ឋ ៥០លានដុល្លារអាមេរិកនេះ បានត្រឹម ៣០ម៉ឺនដុល្លារ។ ប៉ុន្តែបច្ចុប្បន្នរដ្ឋាភិបាល សម្រេចពង្រីកវិសាលភាពនៃការផ្តល់ឥណទាននេះ ដល់បណ្តុំសហគ្រាសធុនតូច និងមធ្យម ដោយលើកទឹកចិត្តចំពោះ SMEណា ដែលពាក់ព័ន្ធឱ្យប្រើប្រាស់សេវាបច្ចេកទេសរបស់មជ្ឈមណ្ឌលសហគ្រិនខ្មែរ ដើម្បីសម្រួលដល់ការទទួលបានឥណទាននេះ។
សូមបញ្ជាក់ថា សេចក្តីប្រកាសព័ត៌មានរបស់រដ្ឋាភិបាលថ្មីនេះ គឺបានកែសម្រួលលើវិធានការផ្តល់ហិរញ្ញប្បទានសម្រាប់អាជីវកម្ម កាលពីថ្ងៃទី ១៦មីនា ឆ្នាំ២០២០ ដែលរដ្ឋាភិបាលបានទម្លាក់កញ្ចប់ថវិកា ៥០លានដុល្លារ សម្រាប់ជួយដោះស្រាយបញ្ហាវិនិយោគរបស់ SME ដែលធ្វើការលើវិស័យកសិកម្ម ក្នុងអំឡុងវិបត្តិកូវីដ-១៩៕
ដោយ៖សម្ផស្ស