ប្រធានាធិបតីអាមេរិច ដូណាល់ ត្រាំ បានបញ្ជាក់ថា គាត់កំពុងទន្ទឹងរងចាំ និងត្រៀមខ្លួនរួចរាល់ហើយដើម្បីផ្តល់បទសំភាសន៏លើការស៊ើបអង្កេត ជុំវិញការជ្រៀតជ្រែករបស់រុស្សី ចូលកិច្ចការបោះឆ្នោតអាមេរិច។
លោក ត្រាំរំពឹងថា ទីប្រឹក្សាពិសេសរបស់ក្រសួងយុត្តិធ៌មអាមេរិច Robert Mueller នឹងសួរចំលើយគាត់ក្នុងរយៈពេល ពី ២ទៅ ៣សប្តាហ៍ខាងមុខ។
លោក បញ្ជាក់ថា លោកចង់ឲ្យគេសួរចំលើយឲ្យបានឆាប់។ ត្រាំ កាលពីមុនធ្លាប់បានបញ្ជាក់ថា លោកមិនទំនងនឹងត្រូវគេសួរចំលើយនោះទេ។
លោក បានហៅការស៊ើបអង្កេតលើរុស្សីថា គឺជាយុទ្ធនាការប្រឆាំងនឹងមនុស្សមួយក្រុម និងជាការបោកបញ្ឆោត។
សូមបញ្ជាក់ថា ភ្នាក់ងារស៊ើបអង្កេតអាមេរិច បានសន្និដ្ឋានរួចមកហើយថា ទីក្រុងមូស្កូបានព្យាយាមជ្រែកចូលកិច្ចការបោះឆ្នោតអាមេរិច ដើម្បីឲ្យលោក ដូណាល់ ត្រាំឈ្នះការបោះឆ្នោត ប៉ុន្តែរុស្សីបានបដិសេធទៅនឹងការចោទប្រកាន់នោះ៕ សុភ័ក្ត្រ
