បាត់ដំបង៖កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរស៣នាក់ជួញដូររក្សាទុក និងថ្នាំម៉ាទឹកកក៣ថង់ ថ្នាំកេតាមីន៤ថង់ ម៉ូតូមួយគ្រឿង ជញ្ជីងថ្លឹងថ្នាំញៀនមួយគ្រឿង សម្ភារពាក់ព័ន្ធមួយចំនួនជាបន្តបន្ទាប់ កសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២៩ ខែឧសភា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពីម៉ោង១និង៥នាទីយប់រំលងអធ្រាត្រ ឈានចូលថ្ងៃទី២៩ ខែឧសភា ឆ្នាំ២០២០ នៅចំណុចភូមិជ្រៃកោង សង្កាត់ស្លាកែត ក្រុងបាត់ដំបង ខេត្តបាត់ដំបង។
លោកសុខ និមល នាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថា ជនសង្ស័យ៣នាក់ដែលចាប់ឃាត់ខ្លួនឈ្មោះអ៊ុន សុភាព ភេទប្រុស អាយុ២៤ឆ្នាំ រស់នៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង និងឈ្មោះធិន សុធារ៉ា ភេទប្រុស អាយុ២១ឆ្នាំ រស់នៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក២ថង់ សម្ភារពាក់ព័ន្ធប្រើប្រាស់មួយចំនួនទៀត ហើយចាប់ឃាត់ខ្លួន ។ ក្រោយពីសាកសួរឈ្មោះអ៊ុន សុភាព កម្លាំងបានចុះទៅចាប់បុរសម្នាក់ទៀតឈ្មោះប្រុស រស់សង្វាត ហៅជា ភេទប្រុស អាយុ២១ឆ្នាំ រស់នៅភូមិអូរតាគាំ២ សង្កាត់ទួលតាឯក ក្រុងបាត់ដំបង ខេត្តបាត់ដំបង។ ក្នុងប្រតិបត្តិការនេះ កម្លាំងដកហូតបានថ្នាំម៉ាទឹកកក១ថង់ ថ្នាំកេតាមីន (ketamine)៤ ខ្សែកមួយខ្សែ ចិញ្ជៀនមួយវង់ ម៉ូតូមួយគ្រឿងនិងសម្ភារពាក់ព័ន្ធប្រើប្រាស់មួយចំនួនទៀត ហើយចាប់ឃាត់ខ្លួន កាលពីម៉ោង១០និង១៥នាទី ថ្ងៃទី២៩ខែឧសភាឆ្នាំ២០២០ នៅចំណុចភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង។
លោកសុខ និមល បានបញ្ជាក់ថា កម្លាំងបានសហការជាមួយកម្លាំងប៉ូលិសក្រុង និងកម្លាំងអន្តរាគមន៍ប្រឆាំងបទល្មើស ចុះបង្ក្រាបបានករណីរនេះ ហើយចាប់ឃាត់ខ្លួនជនសង្ស័យ៣នាក់ និងវត្ថុតាងបានភ្លាមៗជាក់ស្ដែងតែម្ដង។ បច្ចុប្បន្ននេះ កម្លាំងបានកសាងសំណុំរឿងបញ្ជូន ជនសង្ស័យនិងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់ នៅថ្ងៃទី២៩ ខែឧសភា ឆ្នាំ២០២០ហើយ៕
ដោយ៖ អ៊ុងសារុំ