ថ្មីៗនេះ វីដេអូមួយដែលមានរយៈពេលជាង ៣ នាទី បានបង្ហាញឲ្យឃើញបុរសម្នាក់ បានប្រើអំពើហិង្សាវាយធ្វើបាបកូនស្រីរបស់ខ្លួន យ៉ាងសាហាវព្រៃផ្សៃបំផុត។ យោងតាមអ្នកដែលបានបង្ហោះនៅលើបណ្តាញសង្គម កាលពីថ្ងៃទី២៨ ខែឧសភា ឆ្នាំ២០២០ ហេតុការណ៍នេះបានកើតឡើងនៅភូមិព្រៃចប សង្កាត់ឡៅហៅ ខេត្ត សុកត្រាំង។
ទោះយ៉ាងណា ក្រោយកំហឹងមហាជបានផ្ទុះឡើងយ៉ាងខ្លាំងក្លា នៅព្រឹកថ្ងៃទី២៩ ខែឧសភា ឆ្នាំ២០២០ ប្រធានលេខាធិការដ្ឋានគណៈកម្មាធិការប្រជាជននៃក្រុងវិញចូ ខេត្តសុក ត្រាំង បានបញ្ជាក់ថា បុរសជាឪពុកខាងលើនេះ បានត្រូវប៉ូលិសចាប់ឃុំខ្លួនហើយ ក្នុងករណីប្រើប្រាស់អំពើហិង្សាមកលើកូនស្រីរបស់ខ្លួនអាយុជាង ៥ ឆ្នាំ។ បុរសរូបនេះមានឈ្មោះ ដាញ់ ដា អាយុ ២៧ ឆ្នាំ រស់នៅភូមិព្រៃចប សង្កាត់ឡៅហៅ។
ប៉ូលីសនិយាយថា ក្រោយពីបានមើលវីដេអូឃ្លីបដ៏រន្ធត់នេះ ប៉ូលិសស្រុកវិញចូ ក៏បានសហការជាមួយប៉ុស្តិ៍ការពារព្រំដែន ឡៅហៅ ដើម្បីកំណត់អត្តសញ្ញាណឪពុករូបនេះ ដែលបានប្រើអំពើហិង្សាមកលើកូនស្រីរបស់ខ្លួនយ៉ាងសាហាវដ៏មិននឹកស្មាន។
នៅចំពោះមុខប៉ូលិស ដាញ់ ដា បានអះអាងថា រូបគេបានរកឃើញកូនស្រីយកអង្ករទៅចាក់លេងនៅក្នុងដីខ្សាច់ ដែលជាហេតុធ្វើឲ្យរូបក្តៅក្រហាយ ក៏ផ្ទុះកំហឹងបែបនេះតែម្តងទៅ។
លោកហូ ថាញ់ ហុង ប្រធានលេខាធិការដ្ឋានគណៈកម្មាធិការប្រជាជនសង្កាត់ ឡៅហៅ ស្រុកវិញចូ បាននិយាយថា ដាញ់ដា បច្ចុប្បន្ន កំពុងរស់នៅផ្ទះជួល ប៉ុន្តែ ដោយសារតែរូបគេតែងតែផឹកជាប្រចាំ ជាហេតុធ្វើឲ្យប្រពន្ធចុះចោលអស់រយៈពេលជាច្រើនឆ្នាំមកហើយ ដោយបន្សល់កូនៗចំនួន៣នាក់ ឲ្យរូបគេជាអ្នកមើលថែ។
លោកបន្តថា «យើងបានយកកូនស្រីរងគ្រោះនោះទៅកាន់មន្ទីរពេទ្យ Bac Lieu ដើម្បីព្យាបាលរបួស ។ ហើយក្មេងស្រី២នាក់ទៀត ត្រូវបានសាច់ញាតិខាង ដាញ់ ដា យកទៅមើលថែ»៕
ដោយ៖ លឹម ហុង (ប្រភព៖ tinmoi.vn)
