សហភាពអឺរ៉ុបកាលពីថ្ងៃសុក្រ បាននិយាយថាការដាក់ច្បាប់សន្តិសុខរបស់ចិនទៅលើទីក្រុងហុងកុង បានបំផ្លាញទំនាក់ទំនងជាមួយនឹងទីក្រុងប៉េកាំង ប៉ុន្តែការដាក់ទណ្ឌកម្មមិនមែនជាដំណោះស្រាយចំពោះវិបត្តិនោះឡើយ។
មន្ត្រីជាន់ខ្ពស់សភាពអឺរ៉ុប Josep Borrell ថ្លែងតំណងឲ្យប្រទេសសមាជិ ២៧ថា “សហភាពអ៊ឺរ៉ុបសម្តែងក្តីកង្វល់យ៉ាងខ្លាំងចំពោះវិធានការដែលធ្វើឡើងដោយចិន ដែលវាមិនស្របតាមការប្តេជ្ញាចិត្តអន្តរជាតិរបស់ខ្លួន”។
លោកថ្លែងថា “ទំនាក់ទំនងរបស់សហភាពអ៊ឺរ៉ុបជាមួយនឹងចិន ផ្អែកទៅលើការគោរពគ្នាទៅវិញទៅមក និងទំនុកចិត្ត។ ការសម្រេចចិត្តនេះបានធ្វើឲ្យមានសំនួរបន្ថែមចំពោះចន្ទៈរបស់ចិនក្នុងការរក្សាការប្តេជ្ញាចិត្តអន្តរជាតិរបស់ខ្លួន”។
នៅពេលសាកសួរថាតើទីក្រុង Brussels អាចនឹងគំរាមដាកទណ្ឌកម្មឬយ៉ាងណា នៅពេលច្បាប់សន្តិសុខជាតិត្រូវបានអនុម័ត លោកបានឆ្លើយដូច្នេះថា “ខ្ញុំមិនគិតថា ការដាក់ទណ្ឌកម្មជាវិធិសាស្ត្រតែមួយដែលអាចដោះស្រាយវិបត្តិនៅក្នុងប្រទេសចិនបានឡើយ”។
Josep Borrell បានថ្លែងបន្តទៀថា មានប្រទេសសមាជិកមួយ បានលើកឡើងពីលទ្ធភាពនៃការដាក់ទណ្ឌកម្ម។
សូមបញ្ជាក់ថា ទីក្រុងប៉េកាំងកំពុងរងការសម្ពាធ និងការរិះគន់យ៉ាងខ្លាំងពីប្រទេសមហាអំណាច ដោយសារតែការស្នើច្បាប់សន្តិសុខជាតិរបស់ខ្លួនដើម្បីគ្រប់គ្រងហុងកុង ដែលអ្នកជំនាញមើលឃើញថា ច្បាប់នោះអាចនឹងកម្រិតសិទ្ធិ និងសេរីភាពរបស់ប្រជាជានហុងកុង។
ប្រធានាធិបតីអាមេរិចដូណាល់ ត្រាំបានប្រកាសដកឋានៈពាណិជ្ជកម្មពិសេសចេញពីក្រុងហុងកុងដោយសារចិនដាក់ច្បាប់សន្តិសុខនោះលើហុងកុង និងបានប្រកាសថា ទីក្រុងហុងកុងលែងមានស្វ័យភាពកម្រិតខ្ពស់ពីចិនទៀតហើយ។
ទីក្រុងហុងកុង ត្រូវបានអង់គ្លេសប្រគល់ទៅអោយចិនវិញក្នុងឆ្នាំ ១៩៩៧ក្រោមកិច្ចព្រមព្រៀងផ្តល់ស្វ័យភាព និងសិទ្ធិសេរីភាពដល់ទីក្រុងនេះសម្រាប់រយៈពេល ៥០ឆ្នាំ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
