សៀមរាប៖ សិក្ខាសាលាស្តីពី “ការជំរុញវិស័យចិញ្ចឹមសត្វនៅក្នុងព្រះរាជាណាចក្រកម្ពុជា” រៀបចំដោយសមាគមន៍អ្នកចិញ្ចឹមសត្វកម្ពុជា ក្រោមអធិបតីភាពឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និង ផលិតកម្ម ដោយមានការចូលរួមពីសមាគមន៍អ្នកចិញ្ចឹមសត្វកម្ពុជា តំណាងមន្ទីរកសិកម្ម រុក្ខាប្រមាញ់ និង នេសាទ តំណាងធនាគារអភិវឌ្ឍន៍ជនបទ កសិករចិញ្ចឹមសត្វចំនួនប្រមាណ១៥០នាក់ និងអ្នកពាក់ព័ន្ធផ្សេងៗ នាព្រឹកថ្ងៃសៅរ៍ទី៣០ ខែឧសភា ឆ្នាំ២០២០ នៅសណ្ឋាគារ រីជេនស៊ី ខេត្តសៀមរាប។
ជាកិច្ចចាប់ផ្តើម លោក ស្រ៊ុន ពៅ ប្រធានសមាគមន៍អ្នកចឹញ្ចឹមសត្វកម្ពុជា បានធ្វើការចាប់អារម្មណ៍អំពីគោលបំណងនៃសិក្ខាសាលា ដែលជាឱកាសពិសេស និងជាវេទិកាពិភាក្សាជាមួយអគ្គនាយកដ្ឋាន សុខភាពសត្វ និងផលិតកម្មសត្វ សមាគមន៍អ្នកចិញ្ចឹមសត្វ អ្នកជំនាញផ្សេងៗ មានអ្នកជំនាញខាងជំងឺសត្វ អ្នកចិញ្ចឹមសត្វ និងធនាគារអភិវឌ្ឍន៍ជបបទ ដើម្បីស្វែងរកគន្លឹះក្នុងការជំរុញលើកកម្ពស់ការចិញ្ចឹមសត្វនៅក្នុងប្រទេសកម្ពុជា ដើម្បីផ្គង់ផ្គង់ទីផ្សារសាច់សត្វនៅកម្ពុជាឲ្យបានគ្រប់គ្រាន់ ទន្ទឹមនឹងការយកចិត្តទុកដាក់របស់ក្រសួង កសិកម្ម រុក្ខាប្រមាញ់ និងនេសាទ ក៏ដូចជាអគ្គនាយកដ្ឋានសុខភាពសត្វ និងផលិតកម្មសត្វក្នុងការរឹតបណ្តឹង និងកាត់បន្ថយការនាំចូលសត្វ។
លោកប្រធានក៏បានរំលឹកឲ្យប្រជាកសិករ ប្រុងប្រយ័ត្នអំពីការផ្ទុះជំងឺឆ្លងសត្វឡើងវិញ ដោយលើកឡើងថា” យើងភ្លេចជំងឺ តែជំងឺមិនភ្លេចយើងទេ”។
លោក រស់ សេង ហាក់ តំណាងធនាគារអភិវឌ្ឍន៍ជនបទ បានលើកឡើងអំពីទុនពិសេសសម្រាប់លើកកម្ពស់វិស័យកសិកម្ម ក៏ដូចជាការចឹញ្ចឹមសត្វ។ ទុនពិសេសនេះមានលក្ខណៈអនុគ្រោះច្រើន និងងាយស្រួលក្នុងការទទួលបានប្រាក់កំចី។
តំណាងមន្ទីរកសិកម្ម រុក្ខាប្រមាញ់ និងនេសាទបានធ្វើរបាយការណ៍អំពីស្ថាភាពសង្គមសេដ្ឋកិច្ចនៅខេត្តសៀមរាប និងការជម្រុញការចឹញ្ចឹមសត្វកន្លងមក។
ឯកឧត្តម តាន់ផាន់ណារ៉ា ប្រតិភូរាជរដ្ឋាភិបាល បានថ្លែងថា អង្គសិក្ខាសាលាទាំងមូលអំពីសិក្ខាសាលាថ្ងៃនេះ ដែលជាឱកាសពិសេសដែលមានរូបខ្ញុំ ក្រុមអ្នកជំនាញ និងកសិករ ជួបជុំគ្នា ដែលជាវេទិកាមួយបើកចំហរឲ្យបងប្អូនធ្វើការចោទសួរ មករូបខ្ញុំផ្ទាល់ និងក្រុមអ្នកជំនាញ នូវអ្វីដែលបងប្អូនជួបការលំបាក ដើម្បីស្វែងរកដំណោះស្រាយ សមស្របក្នុងការជំរុញការចឹញ្ចឹមសត្វ។
ឯកឧត្តមបានលើកឡើង អំពីការកាត់បន្ថយការនាំចូលសត្វជាពិសេសជ្រូក និងមាន់ស្របតាមអនុសាសន៍របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងការគ្រប់គ្រងតម្លៃសត្វនៅលើទីផ្សារ ឲ្យបានស្ថេរភាពដែលជាគន្លឹះក្នុងការជំរុញការចឹញ្ចឹមសត្វ នៅក្នុងស្រុករបស់ប្រជាកសិករ។
ឯកឧត្តមក៏បានលើកឡើងអំពីបទពិសោធន៍កន្លងមក ជាមួយកសិករ អំពីការទប់ស្កាត់ការឆ្លងរាលដាលជំងឺសត្វ ការទប់ស្កាត់ចរាចរណ៍ជ្រូកខុសច្បាប់ ការលើកម្ពស់ការចិញ្ចឹមសត្វ និង ការយកចិត្តទុកដាក់ខ្ពស់របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងការឆ្លើយឆ្លងជាមួយអង្គសិក្ខាសាលាទាំងមូល៕
ដោយ កូឡាប
