ស្ទឹងត្រែង៖ លោកម៉ុម សារឿន អភិបាលខេត្តស្ទឹងត្រែង បានដឹកនាំមន្ត្រីរាជការបណ្ដា កងកម្លាំងប្រដាប់អាវុធ និងមន្ទីរជុំវិញខេត្ត រដ្ឋបាលស្រុក ចុះដាំគ្រាប់ពូជ ត្នោតខ្មែរ នៅតាមដងផ្លូវបំបែកពីទីរួមស្រុកសៀមប៉ាង ឆ្ពោះទៅផ្លូវបន្ទាត់ព្រំដែនកម្ពុជា-ឡាវ ចំនួន១០ម៉ឺនគ្រាប់ នៅថ្ងៃទី៣០ ខែឧសភា ឆ្នាំ២០២០។
គ្រាប់ពូជត្នោតចំនួន ១០ម៉ឺនគ្រាប់ ត្រូវបានដាំដោយមន្ត្រីរាជការរដ្ឋបាលខេត្តស្ទឹងត្រែង កងប្រដាប់អាវុធទាំងបីប្រភេទ បណ្ដាមន្ទីរជុំវិញខេត្ត នៅតាមបណ្ដោយដងផ្លូវបំបែកពីទីរួមស្រុកសៀមប៉ាង ឆ្ពោះទៅផ្លូវព្រំដែនកម្ពុជា-ឡាវ ត្រង់ចំណុចអូរគុ ។
លោក អ៊ុក ធាវី ប្រធានមន្ទីរព័ត៌មានខេត្តស្ទឹងត្រែង បាននិយាយថា លោកក៏បានដឹកនាំមន្ត្រីរាជការ ក្នុងមន្ទីរព័ត៌មានទាំងអស់ មកចូលរួមដាំគ្រាប់ត្នោតនេះដែរ ជាមួយលោកអភិបាលខេត្ត មន្ទីរពាក់ព័ន្ធ កងកម្លាំងប្រដាប់អាវុធ។
លោកបន្តទៀតថា នេះជាលើកទី ៣ ហើយ ដែលអភិបាលខេត្ត បាននាំគ្រាប់ពូជត្នោត មកដាំនៅតាមបន្ទាត់ព្រំដែននេះ។ ដោយលើកទី ១ ដាំនៅចំណុចចបង្គោលព្រំដែន លេខ៧១ ដល់ចំណុចព្រំដែនបង្គោលលេខ ៧៥ ដាំបានចំនួន៣ម៉ឺនគ្រាប់។ លើកទី២ ចាប់ពីចំណុចបង្គោលព្រំដែនលេខ ៧៥ ដល់ ៧៨ដាំបានចំនួន ៥ ម៉ឺនគ្រាប់។ លើកទី៣នេះ មានចំនួន ១០ ម៉ឺនគ្រាប់ ពីចំណុចអូឫស្សីផ្លូវបំបែកពីទីរួមស្រុកសៀមប៉ាង ទៅព្រំដែនចំណុចអូរគុក បង្គោលព្រំដែនលេខ ៧៨។
លោកបានបញ្ជាក់ថា ដើមត្នោតជាកេរ្តិ៍មរតកដូនតា នៃវប្បធម៌ជាតិយើង នៅពេលដែលគ្រាប់ពូជនេះ ដុះលូតលាស់ចេញគ្នារៀង។ ដើមវាអាចផ្ដល់អត្ថប្រយោជន៍ ដល់វិស័យទេសចរណ៍ នៅតាមព្រំដែន និងអាចកែប្រែកំណើនសេដ្ឋកិច្ចក្នុងតំបន់។ មិនតែប៉ុណ្ណោះ នឹងកាត់បន្ថយភាពក្រីក្រ របស់ប្រជាពលរដ្ឋនៅក្នុងតំបន់នេះ។
លោក ម៉ុម សារឿន អភិបាលខេត្តស្ទឹងត្រែង បានមានប្រសាសន៍ថា តំបន់អូរគុនេះ គឺជាតំបន់ដែលរងគ្រោះដោយសង្គ្រាម។ ជាតំបន់ឆ្លងកាត់របស់ខ្មែរក្រហម ហើយគ្មានប្រជាជនណា អាចមករស់នៅរកស៊ីនៅទីនេះបានទេ។ ឥឡូវនេះ បានក្លាយជាតំបន់អភិវឌ្ឍន៍ហើយ ពីព្រោះថាប្រមុខរាជរដ្ឋាភិបាល បានអភិវឌ្ឍន៍តំបន់នេះ ឲ្យមានផ្លូវមានស្ពានឆ្លងទន្លេ។ ផ្លូវខ្សែក្រវាត់ព្រំដែនជាដើម។
លោកបន្តថា ដោយសារមានផ្លូវស្ពានហើយ បានកែច្នៃសោភ័ណភាព នៅទីនេះ ឲ្យមានសម្រស់ស្រស់បំព្រង ទើបយើងយកគ្រាប់ពូជត្នោតនេះ មកដាំតាមបណ្តោយសងខាងផ្លូវទាំងនេះ។ ពេលកូនត្នោតធំឡើង អាចទាក់ទាញភ្ញៀវទេសចរ មកកម្សាន្តនៅទីនេះ បានទៀតផង៕
ដោយ៖សុខុម