ភ្នំពេញ ៖ បុរសជនជាតិចិនតៃវ៉ាន់ម្នាក់ ខ្យល់គដួលស្លាប់ភ្លាមៗក្នុងបន្ទប់ជួល បន្ទាប់ពីបានអូសម៉ូតូចេញបំណង់ឌុបប្រពន្ធទៅរកបើកលុយ ស្រាប់តែជួបគ្រោះអកុសល កាលពីវេលាម៉ោង៦និង៣០នាទីព្រឹក ថ្ងៃទី៣១ ខែឧសភា ឆ្នាំ២០២០ នៅផ្ទះជួល ផ្លូវលំ ក្រុម៥ ភូមិព្រៃជីសាក់ សង្កាត់ចោមចៅ៣ ខណ្ឌពោធិសែនជ័យ ។ បុរសនោះ ក៏មានជំងឺប្រចាំកាយផងដែរ។
អ្នកស្រី នុង ស្រីពេជ្រ ជាភរិយារបស់សព បានឲ្យដឹងថា ជនរងគ្រោះមានឈ្មោះ ឡុង គឺ ហៅ ជី ឃីត ភេទប្រុស អាយុ៦៣ឆ្នាំ ជនជាតិចិនតៃវ៉ាន់ មុខរបរជាមេការរោងចក្រ ។ អ្នកស្រី នុង ស្រីពេជ្រ អាយុ៣៤ឆ្នាំ មុខរបរ កម្មការិនីរោងចក្រ ស្នាក់នៅផ្ទះកើតហេតុជាមួយគ្នា មានស្រុកកំណើត ភូមិព្រៃតាឌុក ឃុំសំរោង ស្រុកត្រាំកក់ ខេត្តតាកែវ ។
អ្នកស្រី នុង ស្រីពេជ្រ បន្តទៀតថា គាត់បានគ្នាជាប្តីប្រពន្ធអស់រយៈពេលជាង៣ឆ្នាំកន្លងមកហើយ តាំងពីអំឡុងឆ្នាំ២០១៧ មានកូន២នាក់ ប្រុសម្នាក់អាយុជាង១ខួប និងបច្ចុប្បន្នកំពុងមានផ្ទៃពោះជាង៥ខែផងដែរ ។ ប្តីរបស់គាត់ មានជំងឺ គ្រួសក្នុងប្រមាត់ ប្រើប្រាស់ថ្នាំជាប្រចាំ ហើយមុនកើតហេតុ ប្តីរបស់គាត់ក្រោយពីងើបដាំបបរហើយ រៀបចំខ្លួនបំណង់នាំគាត់ទៅបើកលុយនៅរោងចក្រ ហើយពេលដើរទៅបម្រុងនឹងបណ្តើរម៉ូតូចេញ ស្រាប់តែដួលប្រកាច់ត្រដរខ្យល់ស្លាប់ភ្លាមៗ ស្រែកហៅអ្នកជិតខាងឲ្យជួយ រកតែជួយមិនទាន់ ជនរងគ្រោះស្លាប់បាត់ទៅហើយ ។
ក្រោយកើតហេតុ រាយការណ៍ទៅអាជ្ញាធរ សមត្ថកិច្ចចុះទៅពិនិត្យ សាកសួរជាក់ស្តែង ឃើញថាស្លាប់ដោយជំងឺខ្យល់គ រួចដឹកសពទៅតម្កល់ទុកនៅវត្តស្ទឹងមានជ័យ ដើម្បីពិនិត្យស្រាវជ្រាវ រកក្រុមគ្រួសារ រាយការណ៍ទៅស្ថានទូតចិន ដើម្បីសម្រេចជាក្រោយ ៕
ដោយ៖ ផាន់ណាសេន