សៀមរាប៖ នាយការិយាល័យប្រឆាំងការជួញដូរមនុស្សខេត្តសៀមរាប បានឲ្យដឹងថា មេខ្យល់ចំនួន២នាក់នៅស្រុកពួក ដែលនាំពលរដ្ឋខ្មែរ ទៅធ្វើការដោយខុសច្បាប់ នៅប្រទេសថៃ ត្រូវបានសមត្ថកិច្ចនគរបាលខេត្តសៀមរាបឃាត់ខ្លួន។
បើតាមការផ្សាយរបស់មន្ទីរព័ត៌មានខេត្តសៀមរាប បានបញ្ជាក់ថា លោកវរសេនីយ៍ឯក ជា ហេង នាយការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប បានឲ្យដឹងថា មេខ្យល់ចំនួន០២នាក់ រួមមាន ៖ ១. ឈ្មោះ ទួន ទី ភេទប្រុស អាយុ៣៦ឆ្នាំ និង ២. ឈ្មោះ តិច សត់ ភេទប្រុស អាយុ២៣ឆ្នាំ រស់នៅភូមិគោកដូង ឃុំត្រីញ័រ ស្រុកពួកខេត្តសៀមរាប ត្រូវបានសមត្ថកិច្ចនគរបាលខេត្តសៀមរាបឃាត់ខ្លួន កាលពីវេលាម៉ោង១០និង៣០នាទី ថ្ងៃទី៣០ ខែឧសភា ឆ្នាំ២០២០ម្សិលមិញនេះ តាមបញ្ជាលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ដោយជាប់សង្ស័យនាំពលរដ្ឋខ្មែរចំនួន១៥នាក់ ទៅធ្វើការដោយខុសច្បាប់នៅប្រទេសថៃ ។
លោកវរសេនីយ៍ឯក ជា ហេង បានបញ្ជាក់ទៀតថា តាមចម្លើយសារភាពរបស់ជនសង្ស័យ បានឲ្យដឹងថា ពួកខ្លួនទាំងពីរនាក់បានទំនាក់ទំនងថៅកែនៅរាក់យ៉ង ក្នុងប្រទេសថៃ ដែលត្រូវការកម្មករទៅធ្វើការនៅទីនោះ ខ្លួនក៏ជ្រើសរើសពលករទាំងអស់នេះហើយដោយសន្យាថាមិនបាច់មានលិខិតឆ្លងដែនទេ គឺគេយកម្នាក់ ៣.000បាតប្រាក់ថៃពីថៅកែ ហើយរត់ការឆ្លងដែនដល់រាក់យ៉ង ប្រទេសថៃ បានធ្វើការទើបថៅកែកាត់ប្រាក់ខែពីពលករវិញម្នាក់ ៣.000បាតប្រាក់ថៃ រីឯពលរដ្ឋខ្មែរទាំង១៥ នាក់បានឆ្លើយថា មេខ្យល់ទាំង ២នាក់នេះ បានសន្យាថានឹងនាំពួកខ្លួនទាំងអស់គ្នាទៅដល់រាក់យ៉ង ប្រទេសថៃ បានការងារធ្វើ ទើបកាត់ប្រាក់ខែឈ្នួលម្នាក់ ៣.០០០បាតវិញ ហើយការធ្វើដំណើរនេះពុំមានលិខិតឆ្លងដែនទេ ប៉ុន្តែដល់ព្រំដែនភូមិក្លិនទា ឃុំសឹង្ហ ត្រូវសមត្ថកិច្ចចាប់បានបញ្ជូនមកវិញ ៕
ដោយ៖បញ្ញាស័ក្តិ