ភ្នំពេញ៖លោកនេត ភក្ត្រា រដ្ឋលេខាធិការក្រសួងបរិស្ថាន នៅថ្ងៃទី១ ខែមិថុនា ឆ្នាំ២០២០ បានថ្លែងថា ឆ្នាំ២០២០នេះ គឺជាលើកទី២៧ សម្រាប់ប្រទេសកម្ពុជា ក្នុងការប្រារព្ធទិវាបរិស្ថានជាតិ និង បរិស្ថានពិភពលោក ៥ មិថុនា។ នៅឆ្នាំ២០២០នេះ ប្រធានបទរបស់ទិវាបរិស្ថានជាតិនិងបរិស្ថានពិភពលោកគឺ “អភិរក្សជីវចម្រុះដើម្បីយើងទាំងអស់គ្នា”។
លោកបានថ្លែងថា ដើម្បីចូលរួមអបអរសាទរទិវាបរិស្ថានជាតិ និងបរិស្ថានពិភពលោក៥មិថុនាឆ្នាំ២០២០នេះ ក្រសួងបរិស្ថាន រៀបចំយុទ្ធនាការផ្សព្វផ្សាយជាតាមបណ្តាញអនឡាញ ដែលនៅក្នុងនោះមានសិក្ខាសាលាតាមកម្មវិធីzoom meeting ការផលិតកិច្ចពិភាក្សា ផ្សព្វផ្សាយឯកសារអប់រំ និងផ្ទាំងបដារូបភាពបរិស្ថាន និងការផ្សព្វផ្សាយតាមបណ្តាញវិទ្យុ និងទូរទស្សន៍នានា ក្នុងគោលបំណង លើកទឹកចិត្តឱ្យសាធារណជន នៅទូទាំងប្រទេស គ្រប់រាជធានី-ខេត្ត ចូលរួមចលនានៃការប្រារព្ធទិវាបរិស្ថានជាតិ និងបរិស្ថានពិភពលោក ៥ មិថុនា ប្រព្រឹត្តិទៅយ៉ាងផុសផុលប្រកបដោយផ្លែផ្កា ដើម្បីលើកកម្ពស់ការយល់ដឹងជាសាធារណៈ អំពីការគ្រប់គ្រង និងប្រើប្រាស់ធនធានធម្មជាតិប្រកបដោយនិរន្តរភាព ការប្រយុទ្ធប្រឆាំងនឹងការប្រែប្រួលអាកាសធាតុ ការគ្រប់គ្រងគុណភាពបរិស្ថាន សំដៅលើកកម្ពស់សុខភាពសាធារណៈ គិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការរស់នៅដោយចីរភាព។
លោកថា ឆ្នាំ ២០២០ ក៏ជាឆ្នាំដ៏សំខាន់សម្រាប់ការប្តេជ្ញាចិត្តរបស់ប្រជាជាតិ នានាក្នុងការអភិរក្សនិងស្តារជីវចម្រុះឡើងវិញ។ ឯកឧត្តម នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានបង្ហាញពីគោលបំណងសំខាន់ៗ នៃការប្រារព្ធទិវានេះនៅក្នុងវីដេអូឃ្លីបខាងក្រោម ដើម្បី:
១) លើកទឹកចិត្តដល់សាធារណជន អភិវឌ្ឍន៍សកម្មភាពមេត្រីភាពបរិស្ថានរួមគ្នា ដើម្បីទីក្រុងមានសោភ័ណភាព ភូមិដ្ឋានស្អាត មានអនាម័យបរិស្ថានល្អ។
២) ពង្រឹងការចូលរួមទប់ស្កាត់ការទន្ទ្រានដីព្រៃ បទល្មើសបំផ្លាញធនធានធម្មជាតិ និង ពង្រឹងការយល់ដឹងពីសារសំខាន់ នៃប្រព័ន្ធអេកូឡូស៊ី និងជីវចម្រុះ ដើម្បីការរស់នៅដោយចីរភាព៕
ដោយ៖បញ្ញាស័ក្តិ
