បងប្អូនមហាជនទូទៅ និងក៏ដូចក្នុងមជ្ឈដ្ឋានសិល្បៈ ពិតជាមានការភ្ញាក់ផ្អើលមែនទែន ខណៈដែលសុខៗ ស្រាប់តែតារាពហុជំនាញអ្នកនាង ខាត់ សុឃីម បានប្រកាសលក់ផ្ទះមួយល្វែងនៅក្បែរផ្សារដេប៉ូ ក្នុងតម្លៃកន្លះលានដុល្លារ និងព្រមទាំងសម្ភារៈសម្អាងការទាំងអស់ ក្នុងតម្លៃ២ម៉ឺនដុល្លារបន្ថែមទៀតផងដែរ។
ក្រោយឃើញអ្នកនាង ខាត់ សុឃីម សុខៗប្រកាសលក់ទ្រពសម្បត្តិជាសាធារណៈបែបនេះ បងប្អូនមហាជនជាច្រើនបានមានការងឿងឆ្ងល់ថា តើតារាស្រីដ៏ល្បីរូបនេះ ជួបប្រទះនូវវិបត្តិសេដ្ឋកិច្ចគ្រួសារ ក្រោយផ្ទុះជំងឺ Covid-19 ឬ ក៏គ្រាន់តែលក់ផ្ទះមួយកន្លែងចោល? និងការឡៃឡុងសម្ភារៈសម្អាងការ អាចអ្នកនាង ខាត់ សុឃីម បញ្ចប់អាជីពផ្នែកសិល្បៈបុរាណមួយនេះរហូត ដោយចាប់យកមុខរបរថ្មីវិញ ឬ យ៉ាងណា?។
ឆ្លើយតបនឹងការសួរដេញជាច្រើនពីបងប្អូននៅក្នុងបណ្តាញសង្គម ដែលចង់ដឹង ទាក់ទងនឹងរឿងនេះ តើហេតុអ្វីបានជាលក់ផ្ទះ? ម៉េចបានមិនទ្រាំសិន? មិនខ្លាចគេមើលងាយយើងទេហ៍? អ្នកនាង ខាត់ សុឃីម ក៏បានប្រឡូយពាក្យទាំងនេះដ៏ចាក់ដោតថា៖ «ខ្ញុំមិនចង់ជំពាក់ធនាគាទៀត/ មិនទ្រាំនឹងភាពលំបាកដោយសំដែងថាខ្លួនឯងមិនអី/ ខ្ញុំមិនខ្វល់ទេព្រោះខ្ញុំមិនបានខ្ចីច្រមុះគេមកដកដង្ហើមផង/ ខ្ញុំនៅតែជាខាត់សុឃីមដ៏រឹងមាំដដែល»។
ជាការស្រាយបន្ថែមលើចម្ងល់ខាងលើផងដែរ អ្នកនាង ខាត់ សុឃីម ក៏បានបញ្ជាក់ប្រាប់ទៅកាន់បងប្អូនអ្នកប្រើប្រាស់បណ្តាញសង្គមឲ្យដឹងថា តាមពិតទៅ អ្នកនាងប្រកាសលក់ផ្ទះក្នុងតម្លៃ ៥០ ម៉ឺនដុល្លារ នេះ គឺមិនមែនមកពីជួបបញ្ហាសេដ្ឋកិច្ច ដោយសារ Covid-19 ទេ។ តែផ្ទុយទៅវិញ គឺអ្នកនាងប្រកាសលក់ផ្ទះជួលឲ្យគេលក់គ្រឿងឡាននៅផ្សារដេប៉ូនេះ គឺដើម្បីចង់បានដើមទុនធំមួយ យកទៅបើកមុខជំនួញថ្មី ដែលត្រូវការចំណាយដើមទុនរាប់ម៉ឺនដុល្លារឯណោះ។ ដោយឡែក សម្រាប់ការប្រកាសលក់សម្អាងការវិញ គឺអ្នកនាងក៏បានបញ្ចាក់ថា ឈប់រកស៊ីហើយ ដោយអ្នកនាងបានប្រាប់មូលហេតុត្រង់ថា ដោយសារអ្នកនាងមិនពេលវេលាអាចគ្រប់គ្រងបាន ខណៈស្វាមីអ្នកនាងក៏ជាប់រវល់ការងាផ្ទាល់ខ្លួន រីឯប្អូនស្រីក៏បើកហាងផ្សេង ។ ប៉ុន្តែ អ្នកនាង ខាត់ សុឃីម ក៏បានបញ្ជាក់ឲ្យដឹងដែរថា អ្នកនាងនៅតែទទួលច្រៀង និងកាត់សក់តាមរោងការដដែល គឺអត់ឈប់ទេ ពោលគឺឈប់តែសម្អាងការប៉ុណ្ណោះ៕
ដោយ៖ លឹម ហុង