ថ្មីៗនេះសហគមន៍តាមអ៊ិនធឺណិត បានមានការខឹងសម្បាយ៉ាងខ្លាំង ចំពោះហេតុការណ៍ដ៏មិនគួរគប្បីមួយ នៅក្នុងខេត្ត Quang Binh ប្រទេសវៀតណាម។ យោងតាមការចែករំលែកពីគណនីហ្វេសប៊ុក HN បានឲ្យដឹងថា ក្មេងស្រីម្នាក់អាយុប្រហែល ១១, ១២ ឆ្នាំ បានត្រូវឪពុកម្តាយរបស់នាងចាប់ចងជាប់នឹងឡានដឹកទំនិញ១គ្រឿង និងវាយដំ ដើម្បីប្រដែប្រដៅ បន្ទាប់ត្រូវបានជាចោរលួចលុយក្នុងគ្រួសារ។
អ្នកលេងហ្វេសប៊ុកម្នាក់ ដែលមានគណនីឈ្មោះ HN បានឲ្យដឹងថា ហេតុការណ៍ដ៏គួរឲ្យអាសូរខាងលើនេះ បានកើតឡើងនៅវេលាម៉ោងប្រហែល ៧ និង ៣០ នាទី ថ្ងៃទី២៩ ខែឧសភា ឆ្នាំ២០២០ ដោយមានគ្រួសាររបស់នាង យាយរបស់នាង និងមនុស្សធំៗជាច្រើនទៀត ឈរមើល សម្រាប់ការដាក់ទណ្ឌកម្មមកលើនាង។ គាត់ និងអ្នកដំណើរជាច្រើនដែលបានឃើញ ក៏បានឈប់ចូលទៅនិយាយពន្យល់ណែនាំ និងស្នើឲ្យគ្រួសារនោះស្រាយចំណងកូនស្រីរបស់ខ្លួនទៅ ប៉ុន្តែ ពួកគេហាក់មិនខ្វល់និងសូម្បីថែមទាំងបោះសម្តីអាក្រក់ៗដាក់មកលើពួកគាត់វិញផងដែរ។
យោងតាមគ្រួសាររបស់នាង ក្មេងស្រីរូបនេះត្រូវបានចោទលួចលុយ ហេតុនេះ សមាជិកគ្រួសារក៏បានសម្រេច នាំយកនាងមកកាន់ដងផ្លូវ រួចចងដៃជើង ទៅនឹងរថយន្ត និងវាយ ដើម្បីឲ្យរៀងចាល។
តែទោះយ៉ាងណា ក្រោយទទួលដំណឹងនេះ ប៉ូលិសក៏បានមកដល់ និងបង្គាប់ឲ្យគ្រួសារនេះដោះលែងកូនស្រីរបស់ខ្លួនជាបន្ទាន់ ព្រោះថាជាទង្វើរំលោភច្បាប់ហើយ។ នៅចំពោះមុខប៉ូលិស ម្តាយរបស់ក្មេងស្រីនេះដែលមានឈ្មោះ Mai បានទទួលស្គាល់កំហុសរបស់ខ្លួន និងប្តេជ្ញាចិត្តនឹងមិនឲ្យទង្វើមួយនេះកើតឡើងទៀតឡើយ។
ទាក់ទងនឹងរឿងរ៉ាវខាងលើនេះផងដែរ អ្នកប្រើប្រាស់បណ្តាញសង្គម បានបញ្ចេញប្រតិកម្មផ្សេងៗគ្នា ដោយក្នុងនោះគណនីមួយបានលើកឡើងថា៖ «ក្នុងនាមខ្ញុំជាម្តាយម្នាក់ ពេលបានឃើញហេតុការណ៍បែបនេះ ខ្ញុំពិតជាស្លុតចិត្ត និងសោកស្តាយខ្លាំងណាស់។ កូនៗទាំងពីររបស់ខ្ញុំ សុទ្ធតែពុំសូវដឹងខុសត្រូវនោះទេ ប៉ុន្តែ ខ្ញុំមិនដែលជេរស្តី ឬ វាយដំលើពួកគេទេ ។ សម្រាប់ក្មេងៗ ពួកគេត្រូវការការបង្រៀន ប្រដែប្រដៅក្នុងលក្ខណៈល្អផ្សេងៗ មិនមែនធ្វើឲ្យពួកគេកាន់តែភ័យខ្លាចយើងបែបនេះឡើយ»៕
ប្រែសម្រួល៖ លឹម ហុង (ប្រភព៖ thanhnien.vn)
