បន្ទាយមានជ័យ៖ អាជ្ញាធរខេត្ត ដាក់កម្លាំងចុះល្បាត និងត្រៀមតាមដងផ្លូវជាតិ នាព្រឹកថ្ងៃទី១ខែមិថុនាឆ្នាំ២០២០នេះ ក្នុងគោលបំណង ការពារសន្តិសុខ សណ្ដាប់ធ្នាប់សាធារណៈ ជូនប្រជាពលរដ្ឋ នៅច្រកទ្វារព្រំដែនអន្តតជាតិប៉ោយប៉ែត ខេត្តបន្ទាយមានជ័យ ដើម្បីទប់ស្កាត់ការពារកុំឱ្យអាជីវករធ្វើបាតុកម្ម។
អគ្គនាយកដ្ឋានអន្តោប្រវេសន៍ បានផ្សាយព័ត៌មានថា នៅព្រឹកថ្ងៃទី១ ខែមិថុនា ឆ្នាំ២០២០ ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានចូលរួមសហការជាមួយអាជ្ញាធរខេត្ត និងកងកម្លាំងប្រដាប់អាវុធគ្រប់ស្ថាប័ន ចំណុះខេត្តបន្ទាយមានជ័យ ក្រោមការដឹកនាំ និងបញ្ជាផ្ទាល់របស់ លោក ង៉ោ ម៉េងជ្រួន អភិបាលរងខេត្ត និងជាប្រធានក្រុមការងារប្រចាំការ ដើម្បីតាមដាន ក្ដាប់សភាពការណ៍ ក្នុងភូមិសាស្ត្រក្រុងប៉ោយប៉ែត និងចុះល្បាតប្រចាំការ តាមដងផ្លូវជាតិលេខ៥ និងផ្លូវបេតុង ក្នុងភូមិសាស្ត្រក្រុងប៉ោយប៉ែត។
មូលហេតុដែលនាំឲ្យអាជ្ញាធរខេត្ត ដាក់កម្លាំងចុះល្បាត និងត្រៀមតាមដងផ្លូវជាតិ នាព្រឹកនេះក្នុងគោលបំណង ការពារសន្តិសុខ សណ្ដាប់ធ្នាប់សាធារណៈ ជូនប្រជាពលរដ្ឋ នៅច្រកទ្វារព្រំដែនអន្តតជាតិប៉ោយប៉ែត ខេតបន្ទាយមានជ័យ។
កងកម្លាំងចម្រុះក្រុងប៉ោយប៉ែត ខេត្តបន្ទាយមានជ័យ បានដាក់បារ៉ាស់នៅចំណុចមុខទីស្នាក់ការគយ ចម្ងាយពីរង្វង់មូល ៥០ម៉ែត្រ ដែលស្ថិតនៅភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដើម្បីទប់ស្កាត់ការពារបងប្អូនអាជីវករ ដែលចង់ធ្វើបាតុកម្មទាមទារបិទផ្លូវមិនឱ្យរថយន្តភាគីថៃឆ្លងកាត់។
សមត្ថកិច្ចបានឲ្យដឹងថា ការដាក់បារ៉ាស់នេះដឹកនាំដោយលោក ង៉ោ ម៉េងជ្រួញ អភិបាលរងខេត្តបន្ទាយមានជ័យ និងលោក អ៊ី ចំរើន នាយប៉ុស្តិ៍អន្តោប្រវេសន៍ច្រកទ្វារអន្តរជាតិប៉ោយប៉ែត អាជ្ញាធរខេត្តបន្ទាយមានជ័យ រួមទាំងកម្លាំងសមត្ថកិច្ចចម្រុះ ដោយបានត្រៀមទប់ស្កាត់ការធ្វើបាតុកម្មរបស់ប្រជាពលរដ្ឋ ទាមទារបិទច្រកមិនឱ្យរថយន្តដឹកទំនិញពីប្រទេសថៃ ចូលមកប្រទេសកម្ពុជា។
សមត្ថកិច្ច បានបញ្ជាក់ថា នៅរសៀលថ្ងៃនេះអភិបាលខេត្តបន្ទាយមានជ័យ លោក អ៊ុ រាត្រី និងអភិបាលខេត្តស៊ីសាកេត ប្រទេសថៃ នឹងជួបពិភាក្សាគ្នា ដើម្បីដោះស្រាយបញ្ហានេះផងដែរ។
សូមបញ្ជាក់ថា រដ្ឋបាលខេត្តបន្ទាយមានជ័យ ចេញសេក្តីជូនដំណឹង បដិសេធមិនឱ្យសមាគមសេដ្ឋកិច្ចក្រៅប្រព័ន្ធកម្ពុជា ប្រមូលផ្តុំធ្វើបាតុកម្មតវ៉ាដោយសន្តិវិធី នៅចំណុចច្រកទ្វារអន្តរជាតិប៉ោយប៉ែត ពាក់ព័ន្ធសំណើសុំជួយសម្រួលបងប្អូនអាជីវករកម្ពុជាទាំងអស់ក្នុងផ្សាររុងក្លឿស្រុកអារញ្ញប្រាថេតខេត្តស្រះកែវព្រះរាជាណាចក្រថៃបានចេញចូលទៅមើលតូបរបស់ខ្លួនក្នុងមួយលើកចំនួន 20 នាក់។
លោកអ៊ុំ រាត្រី អភិបាលខេត្ត បានថ្លែងថា ការគិតគូរ ការលំបាករកបងប្អូនអាជីវករទាំងអស់រដ្ឋបាលខេត្តក៏បានរកដំណោះស្រាយជូន ដោយបានធ្វើលិខិតផ្លូវការជាលើកទី២ ជូន ឯកឧត្តមអភិបាលខេត្តស្រះកែវ ព្រះរាជាណាចក្រថៃ ស្តីពីការសម្រួលបងប្អូនអាជីវករផ្សាររុងក្លឿ ស្រុកអារញ្ញប្រាថេត ខេត្តស្រះកែវ បានចេញចូលទៅមើលតូបឥវ៉ាន់របស់ខ្លួនក្នុង មួយលើក ចំនួន ២០នាក់ ។
សូមបញ្ជាក់ថាលោកឌិនពុទ្ធីប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាបានសរសេរលិខិតជម្រាបជូនដល់រដ្ឋបាលខេត្តបន្ទាយមានជ័យស្ដីពីការជូនដំណឹងអំពីការធ្វើបាតុកម្មដោយសន្តិវិធីនៅចំណុចច្រកទ្វារព្រំដែនអន្តរជាតិប៉ោយប៉ែតដែលនឹងចាប់ផ្ដើមពីថ្ងៃទី 1 ខែមិថុនាឆ្នាំ 2020 ដល់ថ្ងៃទី 20 មិថុនាឆ្នាំ 2020 ចាប់ពីម៉ោង 6 ព្រឹករហូតដល់ម៉ោង 6 ល្ងាចជារៀងរាល់ថ្ងៃ។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាបានលើកឡើងថា ប្រជាពលរដ្ឋខ្មែរដែលជាអាជីវករអ្នកលក់ដូរទំនិញនៅក្នុងផ្សាររុងក្លឿ កម្មករអូសរទេះអ្នករត់ម៉ូតូឌុបអ្នករត់តាក់ស៊ីអ្នករត់ម៉ូតូកង់បីនិងអ្នកប្រកបរបរសេដ្ឋកិច្ចក្រៅប្រព័ន្ធទាំងអស់ដែលរស់នៅក្នុងក្រុងប៉ោយប៉ែតខេត្តបន្ទាយមានជ័យបានឯកភាពគ្នាជាឯកច្ឆន្ទនិងចូលរួមធ្វើបាតុកម្មដោយមានមនុស្សចូលរួមប្រមាណ 1500 នាក់ រទេះមួយរយគ្រឿងនិងឧឃោសនស័ព្ទចំនួន 1 គ្រឿង។
លោកថា អាជីវករលក់ដូរទំនិញនៅផ្សាររុងក្លឿមានការព្រួយបារម្ភយ៉ាងខ្លាំងចំពោះរបស់របររបស់ខ្លួនដែលមាននៅក្នុងតូបនីមួយៗដែលមានតម្លៃរាប់ម៉ឺនដុល្លារនោះខ្លះមានអីវ៉ាន់តម្លៃរហូតដល់រាប់សែនដុល្លារ។ អីវ៉ាន់ទាំងនោះពួកគាត់ទិញមកលក់មិនមែនសម្រាប់យកមកទុកក្នុងរយៈពេលយូរបាននោះទេដូច្នេះអីវ៉ាន់ត្រូវខូចគុណភាពហួសកាលបរិច្ឆេទមិនអាចប្រើប្រាស់ឬហូបចុកបាន។ អីវ៉ាន់ខ្លះទៀតត្រូវបានទឹកលិចពុកផុយកណ្ដុរឬសត្វល្អិតកាត់ខ្ទេចខ្ទីគ្មានសល់។ ទាំងនេះហើយដែលជាមូលហេតុធ្វើឲ្យពួកគាត់ខាតដើមទុនបាត់បង់ទ្រព្យធនយ៉ាងធ្ងន់ធ្ងរអាចធ្លាក់ខ្លួនទៅជាអ្នកជំពាក់បំណុលគេវ័ណ្ណក។
លោកបន្តថា ខាងភាគីថៃមិនព្រមបើកច្រកអន្តរជាតិប៉ោយប៉ែតប៉ុន្តែមន្ត្រីសមត្ថកិច្ចនិងទាហានថៃនៅតាមច្រករបៀងនានាបានបើកឲ្យប្រជាពលរដ្ឋខ្មែរអាចចូលទៅប្រទេសថៃបានដោយបង់ប្រាក់ឲ្យពួកមន្ត្រីសមត្ថកិច្ចនិងទាហានថៃទាំងនោះយ៉ាងច្រើនសន្ធឹកសន្ធាប់បន្ទាប់មកពួកមន្ត្រីសមត្ថកិច្ចនឹងទាហានថៃទាំងនោះមិនបានធានាសុវត្ថិភាពជូនប្រជាពលរដ្ឋខ្មែរឡើយម្យ៉ាងទៀតប្រជាពលរដ្ឋខ្មែរទាំងនោះមិនត្រូវបានគេពិនិត្យសុខភាពឬពិនិត្យកំដៅក្នុងខ្លួនអ្វីទាំងអស់ដូច្នេះការចម្លងនិងការឆ្លងជំងឺកូវីដ១៩ អាចមានហានិភ័យខ្ពស់សម្រាប់ប្រជាពលរដ្ឋដែលបានធ្វើដំណើរឆ្លងកាត់តាមច្រករបៀងទាំងនោះ។
ការបើកច្រកទ្វារព្រំដែនអន្តរជាតិនានាជាដំណោះស្រាយល្អបំផុតសម្រាប់ប្រជាពលរដ្ឋខ្មែរនិងប្រជាពលរដ្ឋថៃពីព្រោះនៅតាមច្រកទ្វារអន្តរជាតិទាំងនោះតែងតែមានម៉ាស៊ីនស្កេនពិនិត្យកំដៅក្នុងខ្លួននោះម៉ាស៊ីនបាញ់អាល់កុល ឬថ្នាំសម្លាប់មេរោគនិងជួយកាត់បន្ថយការឆ្លងដែនដោយខុសច្បាប់នៅតាមច្រករបៀងនានា។
ក្នុងពេលកន្លងទៅឯកឧត្តមអភិបាលខេត្តបន្ទាយមានជ័យនិងលោកអភិបាលក្រុងប៉ោយប៉ែតពិតជាបានយកចិត្តទុកដាក់ចំពោះប្រជាពលរដ្ឋដែលរស់នៅក្នុងក្រុងប៉ោយប៉ែតក៏ដូចជាប្រជាពលរដ្ឋខ្មែរទូទាំងប្រទេសយ៉ាងពិតប្រាកដពីព្រោះឯកឧត្តមធ្លាប់បានស្នើឲ្យភាគីថៃបើកច្រកទ្វារព្រំដែនអន្តរជាតិប៉ោយប៉ែតខ្លងលឹកឡើងវិញដើម្បីឲ្យប្រជាពលរដ្ឋខ្មែរបានចេញចូលដោយស្របច្បាប់ក្នុងគោលបំណងជួយដល់ការដោះស្រាយជីវភាពរស់នៅរបស់ប្រជាពលរដ្ឋបានរស់នៅក្នុងជីវភាពដ៏សមរុំផងដែរ។
ពាក់ព័ន្ធសំណើសុំខាងលើរដ្ឋបាលខេត្តបន្ទាយមានជ័យមិនអនុញ្ញាតទេពីព្រោះបច្ចុប្បន្ននេះរាជរដ្ឋាភិបាលកំពុងមានវិធានការទប់ស្កាត់ការរីករាលដាលនៃជំងឺកូវីដ១៩ នៅទូទាំងប្រទេសដែលជំងឺនេះនេះបាននិងកំពុងរីករាលដាលឥតឈប់ឈរស្ទើរគ្រប់ប្រទេសនៅលើពិភពលោក។
អភិបាលខេត្តបន្ទាយមានជ័យបានលើកឡើងថាកន្លងមករដ្ឋបាលខេត្តធ្លាប់បានអន្តរាគមន៍ទៅរដ្ឋបាលខេត្តស្រះកែវនៃប្រទេសថៃដើម្បីសុំឲ្យជួយសម្រួលមិនយកកម្រៃឈ្នួលពីបងប្អូនអាជីវករក្នុងសុំសម្រួលឱ្យបងប្អូនអាជីវករកម្ពុជាទាំងអស់នៅក្នុងផ្សាររុងក្លឿ បានចេញចូលទៅមើលតូបរបស់ខ្លួនក្នុងមួយលើក 20 នាក់រហូតដល់ស្ថានភាពវិលមកជាប្រក្រតីវិញក្នុងនោះភាគីថៃបានឆ្លើយតបថានឹងជួយសម្រួលមិនយកកម្រៃឈ្នួលពីបងប្អូនអាជីវករកម្ពុជាប៉ុន្តែចំពោះសំណើរសុំសម្រួលឱ្យបងប្អូនអាជីវករកម្ពុជាទាំងអស់ក្នុងផ្សាររុងក្លឿចេញចូលទៅមើលទៅព្របស់ខ្លួនក្នុងមួយលើក 20 នាក់ភាគីថៃ មិនឯកភាពនោះទេ។ ម្យ៉ាងទៀតរដ្ឋបាលខេត្តស្នើឲ្យលោកឌិនពុទ្ធីប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាត្រូវធ្វើសកម្មភាពស្របតាមច្បាប់ស្តីពីសមាគមនិងអង្គការមិនមែនរដ្ឋាភិបាល លិខិតបទដ្ឋានគតិយុត្តនានាជាធរមាននិងលក្ខន្តិកៈរបស់ខ្លួនដូចបានតម្កល់ទុកនៅក្រសួងមហាផ្ទៃ៕
ដោយ៖កូឡាប