ភ្នំពេញ៖ ការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានរាយការណ៍ថា កាលថ្ងៃទី ៣០ ខែ ឧសភា ឆ្នាំ ២០២០ វេលាម៉ោង ២០ និង ០៥ នាទី កម្លាំងជំនាញរបស់ការិយាល័យបានស្រាវជ្រាវ ឃាត់ខ្លួនជនសង្ស័យបានចំនួន ១ នាក់ នៅចំណុចមុខស្តូបមិត្តភាពកម្ពុជាវៀតណាម ផ្លូវសុធារស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលបានប្រព្រឹត្តបទល្មើស អំពើលួចមានស្ថានទម្ងន់ទោសដោយសារការប្រព្រឹត្តអំពើហិង្សា (យកកាំបិតអារកជនរងគ្រោះប្លន់យកម៉ូតូម៉ាកហុងដាសេ១២៥ ពណ៌ ខ្មៅ ស៊េរីឆ្នាំ ២០១៦ លេខតួ លេខម៉ាស៊ីន ៩៥៨៧៨៤១ ពាក់ផ្លាកលេខ ភ្នំពេញ១DK០៨៨៩ ) ប្រព្រឹត្តនៅចំណុចមុខដីឡូតិ៍ទំនេរ ផ្លូវបុរីអង្គរ ក្រុម១ ភូមិបឹងរាំង សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ កាលពីថ្ងៃទី ២៧ ខែ ឧសភា ឆ្នាំ ២០២០ វេលាម៉ោងប្រហែល ១ និង ៤០ នាទីរំលងអធ្រាត្រ និងចាប់យកម៉ូតូរបស់ជនរងគ្រោះ បញ្ជូនមកការិយាល័យចាត់ការតាមនីតិវិធី។
ជនសង្ស័យឃាត់ខ្លួនឈ្មោះ នី សំណាង ភេទ ប្រុស អាយុ ១៦ ឆ្នាំជនជាតិ ខ្មែរ មុខរបរ បុគ្គលិកផ្នែកទីផ្សារ ស្នាក់នៅផ្ទះលេខ៨៤ ផ្លូវលេខ៥១៤ ភូមិ១៣ សង្កាត់បឹងកក់១ ខណ្ឌទួលគោក រាជធានីភ្នំពេញ។ វត្ថុតាងចាប់យកម៉ូតូម៉ាកហុងដាសេ១២៥ ពណ៌ ខ្មៅ លេខតួ លេខម៉ាស៊ីន ៩៥៨៧៨៤១ ពាក់ផ្លាលលេខ ភ្នំពេញ ១DK០៨៨៩។ ចំណែកជនរងគ្រោះឈ្មោះ សឿន គឹមស៊ែន ភេទ ប្រុស អាយុ ៥៤ ឆ្នាំ ជនជាតិ ខ្មែរមុខរបរសន្តិសុខធនាគារឯកទេសអានកូ ស្នាក់នៅផ្ទះជួល ផ្លូវលេខ៣ ភូមិកប់កង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
នគរបាលបានបញ្ជាក់ពីដំណើររឿងនេះថា កាលពីថ្ងៃទី ២៧ ខែ ឧសភា ឆ្នាំ ២០២០ វេលាម៉ោងប្រហែល ១ និង ៤០ នាទីរំលងអធ្រាត្រ មានករណី អំពើលួចមានស្ថានទម្ងន់ទោសដោយសារការប្រព្រឹត្តអំពើហិង្សា (យកកាំបិតអារកជនរងគ្រោះប្លន់យកម៉ូតូម៉ាកហុងដាសេ១២៥ ពណ៌ខ្មៅ ស៊េឆ្នាំ២០១៦ លេខតួ លេខម៉ាស៊ីន ៩៥៨៧៨៤១ ពាក់ផ្លាកលេខ ភ្នំពេញ១DK០៨៨៩) ប្រព្រឹត្តនៅចំណុចមុខដីឡូតិ៍ទំនេរ ផ្លូវបុរីអង្គរ ក្រុម១ ភូមិបឹងរាំង សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ បង្កឡើងដោយជនសង្ស័យឈ្មោះ នី សំណាង ភេទ ប្រុស អាយុ ១៦ ឆ្នាំជនជាតិ ខ្មែរ នៅពេលជនសង្ស័យលេងហ្គេម អ៊ីនធឺណេតនៅម្តុំផ្សារកោសដូង សង្កាត់ទឹកល្អក់៣ ខណ្ឌទួលគោក រាជធានីភ្នំពេញ ចាញ់អស់ប្រាក់ ជនសង្ស័យក៏មានគំនិតចេញធ្វើសកម្មភាពប្លន់ម៉ូតូរបស់ប្រជាពលរដ្ឋ ដើម្បីយកប្រាក់មកលេងហ្គេមបន្ត ពេលនោះជនសង្ស័យបានហៅ ជនរងគ្រោះជាអ្នករត់ម៉ូតូឌុបនៅមុខកន្លែងលេងហ្គេមអ៊ីនធឺណេតឲ្យឌុបខ្លួនទៅកាំកូស៊ីធី សង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ ពេលជនរងគ្រោះឌុបជនសង្ស័យមកដល់មុខសាលាសង្កាត់បឹងកក់២ ជនសង្ស័យបានឲ្យ ជនរងគ្រោះឈប់ម៉ូតូ ហើយជនសង្ស័យបានដើរចូលទៅក្នុងម៉ាតដែលនៅមុខសាលាសង្កាត់ ទិញកាំបិតមួយដើមយកមកលាក់ក្នុងអាវ រួចហើយក៏ឲ្យជនរងគ្រោះឌុបបន្តទៅទៀត ។ លុះពេលជនរងគ្រោះឌុបជនសង្ស័យ មកដល់ចំណុចកើតហេតុខាងលើ ឃើញស្ងាត់មិនមានមនុស្ស ជនសង្ស័យក៏បានយកកាំបិតដែលលាក់ទុកក្នុងអាវមកអារកជនរងគ្រោះ បណ្តាលឲ្យចេញឈាមរងរបួសធ្ងន់ ជនរងគ្រោះក៏ដួលម៉ូតូ ជនសង្ស័យឃើញដូច្នោះក៏បោះកាំបិតចោល ហើយលើក ម៉ូតូរបស់ជនរងគ្រោះជិះគេចខ្លួនបាត់តែម្តង ។
បច្ចុប្បន្នជនសង្ស័យ និងវត្ថុតាងខាងលើ ការិយាល័យកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕
ដោយ៖កូឡាប