ព្រះសីហនុ៖ សម្ដេចអគ្គមហាសេនាបតីតេជោ ហ៊ុន សែន បានបញ្ជាក់ប្រាប់ពលរដ្ឋកម្ពុជាថា កម្ពុជា មិនចូលរួមជាមួយអ្នកនេះ ប្រឆាំងជាមួយអ្នកនោះ និងមិនអនុញ្ញាតឱ្យមានទីតាំងយោធាបរទេស នៅលើទឹកដីរបស់ខ្លួន ហើយកម្ពុជាក៏មិនបោះទីតាំងយោធា នៅលើទឹកដីបរទេស លើកលែងតែក្រោមឆត្រអង្គការសហប្រជាជាតិ។
ក្នុងពិធីសំណេះសំណាលជាមួយមន្ត្រីរាជការ និងក្រុមការងារបច្ចេកទេសស្ថាបនាហេដ្ឋារចនាសម្ព័ន្ធផ្លូវក្រុង ក្នុងខេត្តព្រះសីហនុ នារសៀលថ្ងៃទី០១ ខែមិថុនា ឆ្នាំ២០២០ នៅសាលាខេត្តព្រះសីហនុ សម្ដេចតេជោ ហ៊ុន សែន បានបញ្ជាក់ទៀតថា យើងមានសិទ្ធិនឹងធ្វើនៅអ្វីដែលយើងចង់ធ្វើ ដូចជា មជ្ឈមណ្ឌលលំហរសមុទ្រ យើងរើពីទីតាំងចាស់មកធ្វើនៅទីតាំងថ្មី ហើយសូមអញ្ជើញមិត្តភក្ដិបរទេសទាំងឡាយ បើចង់ចូលរួម សូមអញ្ជើញមកដាក់លុយចូលរួមចុះ ដែលចំណុចនេះកាន់តែបង្ហាញច្បាស់ កុំចោទថាកម្ពុជាថាឈប់ធ្វើបញ្ហាហ្នឹង។
សម្ដេចតេជោ ហ៊ុន សែន បានលើកឡើងថា “ទាក់ទិននឹងកំពង់ផែយោធារាម ខេត្តព្រះសីហនុ ក្នុងតែប៉ុន្មានអាទិត្យមុននេះ មានការបញ្ជូនសារតាមឯកអគ្គរដ្ឋទូតមួយរូប ដែលខ្ញុំសូមមិនបញ្ចេញឈ្មោះ តាមរយៈឧបនាយករដ្ឋមន្ត្រី និងទេសរដ្ឋមន្ត្រីថា យើងអនុញ្ញាតឱ្យកំពង់ផែយោធារាមទៅឱ្យចិនប្រើប្រាស់ផ្ដាច់មុខ រហូតគេហ៊ានប្រើពាក្យទៅទៀតថា រឿងនេះសម្ដេចនាយករដ្ឋមន្ដ្រី ហ៊ុន សែន មិនបានដឹងទេ ក៏ប៉ុន្តែលោក ទៀ បាញ់ ជាអ្នកធ្វើ។
សម្ដេចតេជោបានបន្តថា សម្ដេចក៏សូមផ្ដាំត្រឡប់ទៅវិញថា កម្ពុជាអត់មានថា នេះជាអំណាច ហ៊ុន សែន នេះជាអំណាច ទៀ បាញ់ ឬអំណាចអ្នកនេះ ឬអ្នកនោះទេ អ្វីក៏ត្រូវរាយការណ៍ឱ្យនាយករដ្ឋមន្ត្រីដែរ។ កម្ពុជាគ្មានគោលការណ៍ណាមួយ ដើម្បីនឹងផ្ដល់ឱ្យបរទេសណាប្រើប្រាស់នូវមូលដ្ឋានក្នុងប្រទេសរបស់ខ្លួន ដែលផ្ទុយនឹងរដ្ឋធម្មនុញ្ញរបស់ខ្លួនទេ។ សម្ដេចតេជោបានគូសបញ្ជាក់ថា “ខ្ញុំបានបញ្ជាក់ច្រើនលើកហើយកម្ពុជាសូមបញ្ជាក់សារជាថ្មីថា កម្ពុជា ជាប្រទេសឯករាជ្យ និងអធិបតេយ្យភាព។ កម្ពុជា មិនចូលរួមជាមួយអ្នកនេះ ប្រឆាំងជាមួយអ្នកនោះ មិនអនុញ្ញាតឱ្យមានទីតាំងយោធាបរទេសនៅលើទឹកដីរបស់ខ្លួន ហើយយើងក៏មិនបោះទីតាំងយោធារបស់យើងនៅលើទឹកដីបរទេស លើកលែងតែក្រោមឆត្រអង្គការសហប្រជាជាតិ ដែលពេលនេះកងទ័ពរបស់យើងនៅអាហ្វ្រិកកណ្ដាល នៅម៉ាលី នៅស៊ូដង់ខាត្បូង នៅលើបង់”។
សម្ដេចតេជោបានបន្ថែមថា កម្ពុជាស្វាគមន៍ និងទទួលជំនួយទាំងអស់ មកពីសហរដ្ឋអាមេរិកក៏យក មកពីបារាំងក៏យក មកពីជប៉ុនក៏យក មកពីចិនក៏យក គឺយកទាំងអស់។ សម្ដេចតេជោបានថ្លែងថា ខ្ញុំសូមប្រកាសឱ្យបានច្បាស់ថា មូលដ្ឋានជើងទឹករាម នឹងស្វាគមន៍គ្រប់ប្រទេសទាំងអស់ ដែលមានបំណងចូលនាវាចម្បាំងរបស់ខ្លួន មកសំចត ឈប់សម្រាក ឬក៏ចូលរួមធ្វើសមយុទ្ធជាមួយកម្ពុជា ដែលកម្ពុជាមិនត្រឹមធ្វើជាមួយនឹងចិនទេ អាម៉េរិកចង់ធ្វើក៏អញ្ជើញ បារាំងចង់ធ្វើក៏អញ្ជើញ កាណាដាចង់ធ្វើក៏អញ្ជើញ ឥណ្ឌាក៏ចង់ធ្វើក៏អញ្ជើញមក អង់គ្លេសចង់ធ្វើក៏មក ជប៉ុនចង់ធ្វើក៏មក អូស្ត្រាលីចង់ធ្វើក៏មកចុះ”។
សម្ដេចតេជោក៏បានផ្ញើសារទៅបរទេសទាំងអស់ថា ទីមួយ៖ បើអ្នកមានបំណងចូលរួមអភិវឌ្ឍន៍កំពង់ផែ កម្ពុជាស្វាគមន៍។ ទីពីរ៖ យើងកសាងនៅតំបន់ជួសជុល និងចូលចតរបស់នាវា រាប់ទាំងនាវាបរទេសដែលខូច គឺចូលមកកម្ពុជានិងជួយជួសជុល។ ទីបី៖ ពីថ្ងៃនេះទៅនាវាបរទេសណាចង់មកកម្ពុជា ក៏សូមអញ្ជើញ មករួមគ្នាធ្វើសមយុទ្ធប្រឆាំងភេរវកម្ម ប្រឆាំងការជួញដូរមនុស្ស ប្រឆាំងការជួយញដូរគ្រឿងញៀន ប្រឆាំងពួករត់ពន្ធខុសច្បាប់។ល។ សម្ដេចតេជោបានថ្លែងទៀតថា បើឡើងគោកត្រូវធ្វើសមយុទ្ធគ្រប់គ្រងគ្រោះមហន្តរាយ ដោយសម្ដេចចង់បានតែពីរទេ គឺសមយុទ្ធប្រឆាំងភេរវកម្ម និងសមយុទ្ធគ្រប់គ្រងគ្រោះមហន្តរាយ។
សម្តេច បានប្រកាសស្វាគមន៍រាល់បណ្តាប្រទេសនានា ដែលមានបំណងចង់ធ្វើសមយុទ្ធនៅក្នុងប្រទេសកម្ពុជាដោយមិនប្រកាន់ថាប្រទេសណានោះទេ។
សម្តេចតេជោ ហ៊ុន សែន បានថ្លែងថា យើងមិនប្រកាន់ប្រទេសណាទេអាម៉េរិកចង់ធ្វើក៏អញ្ជើញ កាណាដាចង់ធ្វើក៏អញ្ជើញ បារាំង អង់គ្លេស អូស្រាលី។ល។ សម្តេចតេជោ ប្រកាសឲ្យចាប់ខ្លួនអ្នកប្រមូលផ្តុំធ្វើវិង្ឃាំងសនា ឬធ្វើភេវកម្មនៅក្នុងប្រទេសដើម្បីបំផ្លាញប្រទេសជាតិ។
សម្តេចតេជោ បានប្រកាសចាប់ខ្លួនចំពោះអ្នកប្រមូលផ្តុំគ្នា ដើម្បីពិភាក្សាតាមការបញ្ជា របស់លោកសមរង្ស៊ី ពីក្រៅប្រទេស ដើម្បីញុះញ៉ង់ឲ្យប្រជាពលរដ្ឋឈប់បង់ថវិកាធនាគារ។
សម្តេចតេជោបានបញ្ជាក់ថា ចង់ធ្វើវិឃាំងសនា ហ្អែងចង្អុលកាមកខាងក្នុងអញចាប់ខ្លួន។ អញប្រកាសចាប់ពេលបានព័ត៌មានជាក់លាក់ ហើយយកវាមកដាក់នៅដេកស្ងៀម ដេកមួយកន្លែងទៅ ឲ្យវាបញ្ជាមកពីបារាំង កាណាដា ឲ្យវាបញ្ជាមក។ តើបញ្ជាអ្វីបើវាដាច់ក្បាលវាអស់អាលីងហើយ។ សកម្មភាពរបស់អតីតបក្សប្រឆាំង នៅខាងក្រៅ មានបំណងចប់បំផុសចលាចល ដើម្បីកុំប្រជាពលរដ្ឋសងលុយធនាគារួចហើយ ធ្វើឲ្យធនាគារដួលរលំ ហើយទាញយកផល។ អញមិនទុកឳកាសឲ្យនោះទេ។ អញប្រាប់ឲ្យច្បាស់ថា រាប់ទាំងធ្វើសកម្មភាពនៅក្នុងស្រុកហ្អែង ធ្វើសកម្មភាពណាមួយនឹងត្រូវចាប់ខ្លួនហើយ។ ភេវកម្មវិឃ្ឃាំងសនាដែលមិនសំដៅលើកការវាយប្រហារលើគ្រាប់បែកនោះទេ។ ប៉ុន្តែអ្នកឯងធ្វើវិឃាំងសនា ដើម្បីបំផ្លាញសេដ្ឋកិច្ចជាតិនោះ គ្មានអ្វីត្រូវទុកអ្នកនោះទេ។ រឿងសិទ្ធិមនុស្សត្រូវទុកមួយឡែកសិន ព្រោះអ្នកឯងបំផ្លាញជាតិ។
សម្តេចតេជោនាយករដ្ឋមន្ត្រីនៃកម្ពុជា បានរិះគន់លោក ប្រែត អាដាម ប្រធានអង្គការឃ្លាំមើលសិទ្ធិមនុស្សអន្តរជាតិ ដែលកំពុងសម្ងំស្ងាត់ឈឹង ចំពោះមុខបញ្ហាសិទ្ធិមនុស្សនៅសហរដ្ឋអាមេរិក។ សម្តេចបានទាមទារឱ្យប្រធានអង្គការសិទ្ធិមនុស្ស ដែលចេញមុខរិះគន់រឿងសិទ្ធិមនុស្ស នៅកម្ពុជា ជាញឹកញាប់រូបនេះ បកស្រាយឱ្យច្បាស់លាស់ អំពីរឿងសិទ្ធិមនុស្សនៅសហរដ្ឋអាមេរិក ដែលកំពុងធ្វើការបង្ក្រាបយ៉ាងចាស់ដៃទៅលើហ្វូងបាតុករ។ សម្តេចតេជោ ហ៊ុន សែន បានបញ្ជាក់ថា ប្រែត អាដាម ទៅណាហើយ អា Human Right Wacth ម៉េចមិនឮសូរស្រែក សិទ្ធិមនុស្សទៅឯណា ពេលកម្ពុជាទប់បាតុកម្ម គេថាកម្ពុជារំលោភសិទ្ធិមនុស្ស ដល់ពេលប្រទេសដទៃទប់បាតុកម្ម គេថាវិធានការការពារសណ្តាប់ធ្នាប់សង្គម ខុសគ្នាខ្លាំងម្ល៉េះ។
សម្តេចបានបន្តថា ពេលកម្ពុជាមានវិធានការទប់ស្កាត់បាតុកម្ម គេថាកម្ពុជារំលោភលើសិទ្ធិបញ្ចេញមតិ លើសិទ្ធិតវ៉ា ក៏ប៉ុន្តែដល់ប្រទេសប្រជាធិបតេយ្យគេធ្វើវិញ គេទប់ដូចគ្នា ជួនកាលមានការប៉ះទង្គិចបង្ហូរឈាម គេថាវិធានការសណ្តាប់ធ្នាប់សង្គម ចុះកម្ពុជាក្រែងត្រូវការសណ្តាប់ធ្នាប់សង្គមដែរ ប្រែត អាដាម ត្រូវតែនិយាយ បើហ្អែងមិន និយាយថ្ងៃក្រោយហ្អែងកុំនិយាយប៉ះពាល់ខ្មែរ បើហ្អែកមិននិយាយស្រុកអាមេរិក។ ពួកសិទ្ធិមនុស្សទាំងឡាយនៅលើលោកិយទៅណាអស់ហើយ ម៉េចក៏មិនស្ងាត់ឈឹង។
សម្ដេចតេជោ ហ៊ុន សែន បានគូសបញ្ជាក់ថា សម័យពិភពលោកផ្ទុះជំងឺកូវីដ១៩ មិនបានគិតថា ប្រទេសអ្នកមាន ឬប្រទេសអ្នកក្រនោះទេ ប្រសិនបើខ្វះការប្រុងប្រយ័ត្ន ឬខ្វះវិធានការណ៍ក្នុងការគ្រប់គ្រងប្រជាជនខ្លួន ច្បាស់ជាប្រឈមខ្លាំងជាក់ជាមិនខានឡើយ ហើយកម្ពុជាមិនមែនជាប្រទេសជឿនលឿនផ្នែកវិជ្ជសាស្ដ្រនោះទេ ប៉ុន្ដែបានគិតគូរច្បាស់ពីបញ្ហានេះ។
បើតាមប្រសាសន៍របស់នាយករដ្ឋមន្ដ្រីនៃកម្ពុជា កន្លងទៅសម្ដេចធ្លាប់បានប្រាប់ទៅក្រុមគ្រូពេទ្យថា បើគ្មានឧបករណ៍គ្រប់គ្រាន់កុំចូលប្រយុទ្ធ ដែលនេះខុសពីការប្រយុទ្ធក្នុងសមរភូមិ ព្រោះថាយើងអាចពលីជីវិតខ្លួនយើង តែយើងអាចសង្គ្រោះមនុស្សម្នាក់បាន ប៉ុន្ដែការប្រយុទ្ធជាមួយកូវីដ បើគ្មានវិធីការពារខ្លួនទេ ច្បាស់ណាស់ថាគ្រូពេទ្យក៏ស្លាប់ ហើយអ្នកជំងឺក៏ស្លាប់។ សម្ដេចតេជោ ហ៊ុន សែន បានមានប្រសាសន៍ថា ប្រទេសខ្លះដែលមានវិជ្ជសាស្ដ្រជឿនលឿន ហើយប្រទេសអ្នកមានទៀត បែរជាខ្វះម៉ាស់ ខ្វះសម្ភារបំពាក់ការពារឲ្យគ្រូពេទ្យ ហើយទុកឲ្យគ្រូពេទ្យឆ្លងជំងឺ រួចហើយមានមុខមកសរសេរអាក្រក់ពីយើងទៀតថា ប្រព័ន្ធសុខាភិបាលកម្ពុជាខ្សោយ ប្រព័ន្ធសុខាភិបាលឡាវខ្សោយ មីយ៉ាន់ម៉ាខ្សោយ ប្រទេសនេះខ្សោយ ប៉ុន្ដែប្រទេសខ្លួនឯងជឿនលឿនងាប់រកដីកប់មិនបាន រួចមកមានសិទ្ធិសរសេរមកដៀលគេទៀត។
សម្តេចបានអះអាងថា ការត្រៀមឧបករណ៍ផ្តល់ហិរញ្ញប្បទានបន្ថែម ដោយក្រសួងសេដ្ឋកិច្ច និងហិរញ្ញវត្ថុ នឹងត្រៀមថវិការហូតដល់ ៥០០លានដុល្លារ អញសូមប្រាប់ហ្អែង ហ្អែង កុំអាលមើលស្រាលពេក ហើយហ្អែងកំពុងធ្វើចលនាម្សិលមិញនេះ ហ្អែងប្រុងប្រជុំម៉ោង៨និង៣០នាទីយប់ នៅស្រុកខ្មែរ ដោយហ្អែងនឹងដឹកនាំប្រជុំនៅក្រៅប្រទេស ប៉ុន្តែហ្អ្រែងត្រូវអាក់ខាន ផែនការរបស់ហ្អែងចង់ធ្វើឱ្យធនាគារ នៅក្នុងប្រទេសកម្ពុជា ត្រូវដួលរលំទាំងអស់ ចរិតហ្អ្រែងនេះគឺជាចរិតបំផ្លាញជាតិពិតប្រាកដ
ហ្អែង កុំភ្លេចណាហ្អែង ចង្អល់ឱ្យអ្នកណាធ្វើការខាងក្នុងប្រទេសអញចាប់អ្នកណុងទាំងអស់ អញប្រាប់តែប៉ុណ្ណឹងទេ បើហ្អែងចង់ឱ្យអាអ្នកខាងក្នុងជាប់គុកហ្អែងចង្អុលឱ្យអាអ្នកខាងក្នុងធ្វើទៅ វិទ្ធង្សនាសេដ្ឋកិច្ច ស្មើនឹងការធ្វើភេរវកម្ម ហ្អែងចង្អុលមកអាខាងក្នុងអញចាប់អាខាងក្នុង អញប្រកាស។
ប្រមុខនៃរាជរដ្ឋាភិបាលកម្ពុជា បានផ្តាំទៅក្រុមប្រឆាំងដែលរត់គេចខ្លួន នៅក្រៅប្រទេសឱ្យចាំមើលឱ្យច្បាស់ថា បើមានធនាគារណាមួយដួលនៅកម្ពុជា ដោយសារកូវីដ១៩ ដូចតែខ្លួនបានសើចចំអកស្តែងៗនៅក្រៅប្រទេស ហើយខ្លួនជាខ្មែរ បែរជាមិនគំនិតទុរយស មិនខ្វល់ពីការលំបាករបស់ប្រជាជនខ្មែរ ក្នុងពេលប្រទេសជាតិ ក៏ដូចជាពិភពលោកទាំងមូលបានជួបនូវវិបត្តិរាតត្បាតដោយសារតែវីរុស១៩។
សម្តេចតេជោ ហ៊ុន សែន បានឱ្យដឹងថា ផែនការរបស់ក្រុមប្រឆាំងក្រៅប្រទេសគឺចង់ឱ្យធនាគារនៅកម្ពុជាដួលទាំងអស់ ដើម្បីបមពេញមហិច្ចតាដ៏លាមករបស់ពួកគេ ចង់ឱ្យប្រជាជន និងប្រទេសជាតិជួបការលំបាក បន្ថែមពីក្រុមប្រឆាំងផ្គាប់មុខនេះ តាំងពីដើមមកដែលតម្កល់ផលប្រយោជន៍ជាតិជាធំនោះទេ។
សម្ដេចតេជោ ហ៊ុន សែន បានបញ្ជាក់ថា បើសិនបើប្រជាពលរដ្ឋរបស់យើង គោរពច្បាប់ចរាចរណ៍ទាំងអស់គ្នា ប៉ូលិសរកតែមួយសេន ក៏មិនបានដែរ ព្រោះបានពីណាផាក បើគេគោរពច្បាប់ទាំងអស់គ្នាហើយ យើងកុំតែធ្វើខុសច្បាប់ ពេលជិះម៉ូតូពាក់មួកឲ្យតែត្រឹមត្រូវ កុំនិយាយទូរស័ព្ទកំពុងពេលជិះម៉ូតូ ជិះឡាន អ៊ីចឹងចង់បង្អត់បាយប៉ូលិស កុំឲ្យមានប៉ូលិសមានប្រាក់រង្វាន់ វិធីតែមួយគត់គោរពច្បាប់ចរាចរណ៍។ មានមតិមួយចំនួន បានរិះគន់ថា ការអនុវត្ដរឹតបន្ដឹងចរាចរណ៍ផ្លូវគោក ផាកពិន័យដើម្បីយកលុយ មកបើកប្រាក់ខែឲ្យប៉ូលិស ទាហាន ព្រោះអត់លុយបើកប្រាក់ខែ ប៉ុន្ដែសម្ដេចបានប្រាប់ទៅវិញថា ការធ្វើបែបនេះ គឺដើម្បីការពារអាយុជីវីតប្រជាជន តាមរយៈការរឹតបន្ដឹងច្បាប់ចរាចរណ៍ផ្លូវគោក ហើយបើចង់កុំឲ្យប៉ូលិសមានលុយ វិធីតែមួយគត់គោរពច្បាប់ចរាចរណ៍។
សម្ដេចតេជោបានលើកឡើងថា មូលហេតុដែលខេត្តព្រះសីហនុ បានក្លាយទៅជាក្រុងអភិវឌ្ឍន៍ពហុជាតិសាសន៍ ដោយសារក្នុងនោះ មានប្រទេសជប៉ុនជួយកសាងសង់កំពង់ផែទឹកជ្រៅ ប្រទេសបារាំងអភិវឌ្ឍអាកាសយានដ្ឋាន ប្រទេសចិន និងម៉ាឡេស៊ីអភិវឌ្ឍរោងចក្រថាមពលអគ្គិសនី និងក្រុមហ៊ុនជាច្រើនទៀត សាងសង់សណ្ឋាគារ និងភោជនីយដ្ឋាន។
សម្ដេចមានប្រសាសន៍ថា បើយើងពិនិត្យមើលនៅទីនេះ ខេត្តព្រះសីហនុ គឺជាខេត្តចូលរួមអភិវឌ្ឍន៍ដោយពហុជាតិសាសន៍។ ជប៉ុនបានផ្តល់ហិរិញ្ញប្បទាន និងជួយយើងឱ្យពង្រីកកំពង់ផែទឹកជ្រៅខេត្តព្រះសីហនុ ដែលនេះខ្ញុំបាននិយាយជាមួយនាយករដ្ឋមន្ត្រី ហ្ស៊ីនហ្សូ អាបេ ឱ្យបន្តការខិតខំ ដើម្បីធ្វើយ៉ាងម៉េចឱ្យកំពង់ផែរបស់យើងនេះ ក្លាយជាកំពង់ផែទឹកជ្រៅ ដែលមានជម្រៅ ១៤ម៉ែត្រកន្លះ ឱ្យបានឆាប់បំផុត ដើម្បីចៀសវាងការដឹកជញ្ជូន ដែលត្រូវផ្ទេរនៅសិង្ហបូរី ឬផ្ទេរនៅវៀតណាម រួចហើយទើបចូលមកកម្ពុជា។ ឯកាវិនិយោគអាកាសយានដ្ឋាន ឥឡូវកំពុងគ្រប់គ្រងដោយក្រុមហ៊ុនវ៉ាងស៊ីរបស់បារាំង ហើយនៅក្នុងឆ្នាំ២០២០នេះ ផ្លូវរត់ចម្ងាយ ៣ ៨០០ម៉ែត្រ នឹងត្រូវបានដាក់ឱ្យប្រើប្រាស់នៅឆ្នាំ២០២០ នេះឯង។ ឯស្ថានីយ៍ទទួលអ្នកដំណើរ គាត់ប្តេជ្ញាថានឹងធ្វើឱ្យរួចនៅឆ្នាំ២០២២។ ឯរោងចក្រអគ្គិសនីមានយ៉ាងច្រើននៅទីនេះ ត្រូវបានបង្កើតដោយក្រុមហ៊ុនម៉ាឡេស៊ី និងក្រុមហ៊ុនចិន ដែលបញ្ចេញថាមពលទៅផ្គត់ផ្គង់នៅរាជធានីភ្នំពេញ និងទូទាំងប្រទេស ដែលឥឡូវបរិមាណប្រមាណជា ១ពាន់មេហ្កាវ៉ាត់ ហើយយើងនឹងត្រូវបន្ថែមជាបន្តបន្ទាប់ទៀតដូចការសិក្សា។ នេះជារោងចក្រអគ្គិសនី ដើរដោយថាមពលធ្យូងថ្ម។ ជាមួយគ្នានេះដែរ បណ្ដាសណ្ឋាគារ និងភោជនីយដ្ឋាននានា ត្រូវបានវិនិយោគដោយច្រើនជាតិសាសន៍៕
ដោយ៖បញ្ញាស័ក្តិ
