ភ្នំពេញ៖ ការដ្ឋានស្ថាបនាស្ពានអាកាសនិងផ្លូវក្រោមដី នៅអតីតរង្វង់មូលចោមចៅមកដល់ពេលនេះ ការរដ្ឋានទាំងមូលសម្រេចបាន ៤១% ហើយ។ ទន្ទឹមនឹងនេះ ដើម្បីសាងសង់ភ្ជាប់ផ្នែកកណ្ដាលនៃផ្លូវក្រោមដីនេះ ក្រោយពីផ្នែកសាងសង់នៃផ្លូវក្រោមដី បានស្ថាបនារួចរាល់នោះ រដ្ឋបាលរាជធានីភ្នំពេញ បានសម្រេចប្រកាសឲ្យប្រជាពលរដ្ឋយោគយល់ពីការពង្វៀងចរាចរណ៍នៅតំបន់នេះ ក្នុងរយៈពេល២ខែ ដោយចាប់ពីថ្ងៃទី២ ខែមិថុនា ឆ្នាំ២០២០ វេលាម៉ោង ៨ព្រឹក រហូតដល់ថ្ងៃទី៣១ ខែកក្កដា ឆ្នាំ២០២០ ។
បើយោងតាមសេចក្តីជូនដំណឹង ស្ដីពីការពង្វាងចរាចរណ៍ នៅការដ្ឋានសាងសង់ស្ពានអាកាស និងផ្លូវក្រោមដីចោមចៅ រដ្ឋបាលរាជធានីភ្នំពេញ បានបញ្ជាក់ថា៖
រដ្ឋបាលរាជធានីភ្នំពេញ សូមជម្រាបជូនដំណឹង ដល់បងប្អូនប្រជាពលរដ្ឋ ដែលធ្វើដំណើរឆ្លងកាត់ទីតាំងការដ្ឋានសាងសង់ស្ពានអាកាស និងផ្លូវក្រោមដីចោមចៅ មេត្តាជ្រាបថា គិតត្រឹមថ្ងៃទី ២៩ ខែឧសភា ឆ្នាំ ២០២០ លទ្ធផលនៃការសាងសង់ស្ពានអាកាស និងផ្លូវក្រោមដីនៅចោមចៅសម្រេចបាន ៤១% នៃគម្រោង ដែលតាមផែនការនឹងបញ្ចប់ការសាងសង់ នៅចុងឆ្នាំ២០២១មួយខាងមុខនេះ។
ក្នុងខណៈពេលនេះ ដំណើរការការដ្ឋាន ឈានដល់ដំណាក់កាលការសាងសង់ ភ្ជាប់ផ្លូវក្រោមដី ដែលផ្នែកសាងសង់ នៃផ្លូវក្រោមដីបានស្ថាបនារួចហើយ ចាំបាច់ត្រូវបិទចរាចរណ៍ ចាប់ពីមហាវិថីសហព័ន្ធរុស្ស៊ី និងផ្លូវជាតិលេខ៤ មកផ្លូវវេងស្រេង ដើម្បីសាងសង់ភ្ជាប់ផ្នែកកណ្ដាលនៃផ្លូវក្រោមដីនេះ ។ ក្នុងផែនការបិទពង្វាងចរាចរណ៍នេះ មានរយៈពេល ៦០ថ្ងៃ នឹងត្រូវចាប់ផ្ដើមពីថ្ងៃទី២ ខែមិថុនា ឆ្នាំ ២០២០ វេលាម៉ោង ៨និង ០០នាទីព្រឹកតទៅ ដល់ថ្ងៃទី ៣១ ខែកក្កដា ឆ្នាំ២០២០ ។
អាស្រ័យហេតុនេះ រដ្ឋបាលរាជធានីភ្នំពេញ ស្នើសុំបងប្អូនប្រជាពលរដ្ឋ មេត្តាយោគយល់អធ្យាស្រ័យ និងសូមធ្វើការពង្វាងចរាចរណ៍ តាមតម្រាយផ្លូវដូចខាងក្រោម៖
ក.យានយន្តដែលធ្វើដំណើរក្នុងទិសដៅចូលរាជធានីភ្នំពេញ តាមផ្លូវជាតិលេខ៤គឺ៖
ក្នុងដំណើរទិសដៅទៅមហាវិថីសហព័ន្ធរុស្ស៊ី ត្រូវបត់ឆ្វេងពីមុខការដ្ឋានទៅដងផ្លូវជាតិលេខ ៤ ដែលមាន២គន្លងចរាចរណ៍បង្កើតថ្មី។
ក្នុងដំណើរទៅផ្លូវវេងស្រេង ត្រូវធ្វើដំណើរតម្រង់មកដល់រង្វង់មូលចោមចៅ រួចបន្តឆ្ពោះទៅផ្លូវវេងស្រេង។
ក្នុងដំណើរទៅផ្លូវជាតិលេខ ៣ត្រូវធ្វើដំណើរត្រង់មកដល់ស្តុបរង្វង់មូលចោមចៅ រួចបត់ស្ដាំមកផ្លូវជាតិលេខ ៣ ។
ខ . យានយន្ត ដែលធ្វើចរាចរណ៍ក្នុងទិសដៅរាជធានីភ្នំពេញតាមផ្លូវជាតិលេខ៣ គឺ៖
ក្នុងដំណើរទៅមហាវិថីសហព័ន្ធរុស្ស៊ី ត្រូវធ្វើដំណើរមកដល់អតីតរង្វល់មូលចោមចៅ រួចធ្វើដំណើរទៅត្រង់ជាធម្មតា។
ក្នុងដំណើរបត់ឆ្វេងឆ្ពោះទៅផ្លូវជាតិលេខ ៤ ត្រូវធ្វើដំណើរមកអតីតរង្វង់មូលចោមចៅ រួចបត់ឆ្វេងឆ្ពោះទៅផ្លូវជាតិលេខ ៤ ។
ក្នុងដំណើរទៅផ្លូវវេងស្រេង ត្រូវធ្វើដំណើរមកដល់អតីតរង្វង់មូលចោមចៅ រួចបត់ស្ដាំទៅផ្លូវវេងស្រេង។
គ. យានយន្តដែលធ្វើដំណើរ ក្នុងទិសដៅចេញពីរាជធានីភ្នំពេញ តាមមហាវិថីសហព័ន្ធរុស្ស៊ីគឺ៖
ក្នុងដំណើរទៅផ្លូវជាតិលេខ៤ ត្រូវធ្វើដំណើរឆ្លងកាត់រង្វង់មូលចោមចៅ តាមដងផ្លូវជាតិលេខ ៤ មកដល់ទីតាំងខាងចុងការដ្ឋានបត់ឆ្វេង នៅពេលមកដល់អតីតទីតាំងរង្វង់មូលចោមចៅត្រូវបត់ស្ដាំមកផ្លូវជាតិលេខ ៣ ។ យានយន្តក៏អាចមានជម្រើសមួយទៀត ធ្វើដំណើរត្រង់ពីមហាផ្លូវសហព័ន្ធរុស្ស៊ីឆ្ពោះទៅផ្លូវជាតិលេខ ៤ រួចបត់ឆ្វេងតាមផ្លូវបេតុងសុវណ្ណភូមិ នៅខាងកើតសាលាសង្កាត់ចោមចៅ ឆ្ពោះទៅផ្លូវជាតិលេខ ៣ ក៏បាន។
ក្នុងដំណើរទៅផ្លូវវេងស្រេង ត្រូវធ្វើដំណើរឆ្លងកាត់រង្វង់មូលចោមចៅ តាមដងផ្លូវជាតិលេខ ៤ មកដល់ទីតាំងខាងចុងការដ្ឋាន ត្រូវបត់ឆ្វេង រួចបន្តដំណើរឆ្ពោះទៅផ្លូវវេងស្រេង។
ឃ. យានយន្តដែលធ្វើដំណើរក្នុងទិសដៅពីផ្លូវវេងស្រេងគឺ៖
ក្នុងការធ្វើដំណើរឆ្ពោះទៅមហាវិថីសហព័ន្ធរុស្ស៊ី ត្រូវធ្វើដំណើរត្រង់មកដល់ទីតាំងអតីតរង្វង់មូលចោមចៅ រួចបត់ស្ដាំផ្លូវក្រោមដីឆ្ពោះទៅមហាវិថីសហព័ន្ធរុស្ស៊ី។
ក្នុងដំណើរទៅកាន់ផ្លូវជាតិលេខ៤ ត្រូវធ្វើដំណើរមកកាន់អតីតទីតាំងរង្វង់មូលចោមចៅ រួចហើយ ត្រូវបត់ស្ដាំ បន្ទាប់ពីធ្វើដំណើរបានចម្ងាយប្រមាណ ២០ ម៉ែត្រ ត្រូវបត់ឆ្វេងមកផ្លូវជាតិលេខ៤។
ក្នុងដំណើរទៅផ្លូវជាតិលេខ ៣ ត្រូវធ្វើដំណើរមកដល់អតីតរង្វង់មូលចោមចៅ រួចហើយត្រូវបត់ស្ដាំ បន្ទាប់ពីធ្វើដំណើរបានចម្ងាយ២០ម៉ែត្រ ត្រូវបត់ឆ្វេងមកផ្លូវជាតិលេខ ៤ នៅពេលមកដល់ចុងការដ្ឋាន ត្រូវបត់ឆ្វេងឆ្ពោះទៅកាន់ផ្លូវជាតិលេខ ៣ ។ យានយន្តអាចមានជម្រើសមួយទៀត ធ្វើដំណើរត្រង់ពីមហាវិថីសហព័ន្ធរុស្ស៊ី ឆ្ពោះទៅផ្លូវជាតិលេខ ៤ រួចបត់ឆ្វេងតាមផ្លូវបេតុងសុវណ្ណភូមិ នៅខាងកើតសាលាសង្កាត់ចោមចៅ ឆ្ពោះទៅផ្លូវជាតិលេខ ៣ ក៏បាន។
ប្លង់ពង្វាងចរាចរខាងលើត្រូវបានដាក់បង្ហាញនៅទីតាំងការដ្ឋាន។
អាស្រ័យដូចបានជម្រាបខាងលើ សូមបងប្អូនប្រជាពលរដ្ឋមេត្តាជ្រាប និងចូលរួមសហការ ដោយក្តីអនុគ្រោះ ទទួលបានសេចក្តីជូនដំណឹងនេះ ស្នងការដ្ឋានរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋាភិបាលខណ្ឌពោធិ៍សែនជ័យ មន្ទីរសាធារណការនិងដឹកជញ្ជូនរាជធានីភ្នំពេញ ក្រុមហ៊ុនវិនិយោគទុនអាណិកជនកម្ពុជា និងអាជ្ញាធរមានសមត្ថកិច្ចពាក់ព័ន្ធ ត្រូវចូលរួមសហការអនុវត្តសេចក្តីជូនដំណឹងនេះ ប្
រកបដោយការទទួលខុសត្រូវនិងមានប្រសិទ្ធភាពខ្ពស់៕
ដោយ៖កូឡាប