ភ្នំពេញ៖ កញ្ញា អ៊ីវ៉ា ជាតារាចម្រៀងស្រីមួយដួង ដែលទទួលបានការគាំទ្រយ៉ាងច្រើន ពីសំណាក់គ្រប់មជ្ឈដ្ឋានមហាជន ចំពោះទឹកដមសំឡេងដ៏ស្រទន់របស់កញ្ញា ជាពិសេសបទចម្រៀងនីមួយៗរបស់កញ្ញា ពិតជាពីរោះខ្លាំង មិនថាបទបនោសញ្ចេតនា ឬ បទញាក់នោះទេ។
ប៉ុន្តែ ទន្ទឹមនឹងភាពជោគជ័យក្នុងវិស័យសិល្បៈ មានផ្ទះធំស្កឹមស្កៃ និងព្រមទាំងមានរថយន្តទំនើបៗទៀតផងនោះ តារាស្រីមានឈ្មោះល្បីល្បាញរូបនេះ បែរជាជួបរឿងសោកស្តាយខ្លាំងបំផុតមួយ ដោយត្រូវបាត់បង់ជីវិតម្តាយរបស់នាង។ គិតមកទល់ពេលនេះ ម្តាយរបស់កញ្ញាបានទទួលមរណភាពអស់រយៈពេល ៦ ឆ្នាំ ហើយ។
ទោះយ៉ាងណា អ្វីដែលកាន់តែសោកសៅទៀតនោះ គឺពេលនេះ ផ្នូរ (ម៉ុង) ម្តាយរបស់កញ្ញា ក៏ជួបនូវបញ្ហា ដែលតម្រូវឲ្យកញ្ញា និងក្រុមគ្រួសារ ត្រូវសម្រេចគាស់ចេញពីកន្លែងចាស់ ផ្លាស់ទៅកន្លែងថ្មី។ ចំពោះមូលហេតុ គឺដោយសារម៉ុងម្តាយកញ្ញា អ៊ីវ៉ា ប៉ះចំការកសាងផ្លូវល្បឿន។
ទាក់ទងនឹងរឿងនេះ កញ្ញា អ៊ីវ៉ា ក៏បានបង្ហោះរូបភាពដ៏គួរឲ្យស្រណោះ និងព្រមទាំងបានសរសេររៀប រាប់នឹកស្រណោះដល់អ្នកម្តាយជាទីស្រឡាញ់យ៉ាងដូច្នេះថា៖ «ចុងបញ្ចប់នៃជីវិតមនុស្ស! សុំទោសជាមុនសម្រាប់រូបភាពតែគ្រប់យ៉ាង គឺជាការពិត ពេលម៉ែនៅរស់ម៉ែមានរូបរាង្គកាយស្អាត សាច់ឈាមស្រស់ថ្លា កម្លាំងមាំមួន ម៉ែជាមនុស្សល្អ ចរឹតស្លូតបូតប្រកបដោយធម៌ ម៉ែជាប្រពន្ធដ៏ល្អ ជាម៉ែដ៏ល្អអស្ចារ្យរបស់កូនៗ ម៉ែជាមនុស្សដែលរាប់ញាតិណាស់ រយះ ពេល ៦ឆ្នាំហើយ ដែលម៉ែស្លាប់ទៅម៉ែបានបន្សល់នៅឈ្មោះថ្លៃថ្នូរ ការអាណិតអាសូរពីមនុស្សគ្រប់គ្នា ដែលស្គាល់ម៉ែគេនៅតែចងចាំថាម៉ែជាមនុស្សល្អថ្ងៃនេះ កូនបានឃើញរូបរាង្គម៉ែម្ដងទៀត។ ម៉ែនៅសល់តែស្បែកបន្តិចបន្ទួចនិងគ្រោងឆ្អឹង ម៉ែលែងស្អាតដូចមុនហើយ តែម៉ែនៅតែជានារីដ៏ស្អាតសម្រាប់កូនៗ ម៉ែស្ថិតនៅក្នុងកែវភ្នែកនិងការចងចាំរបស់កូនៗជារៀងរហូត មូលហេតុដោ យសារការសាងសង់ផ្លូវល្បឿនលឿនប៉ះចំផ្ទះម៉ែ(ម៉ុង)ទើបកូនត្រូវរើលើកអញ្ជើញម៉ែទៅដាក់ផ្ទះថ្មី ៣០-០៥-២០២០ សូមឲ្យសុខសប្បាយត្រជាក់ត្រជុំចម្រុងចម្រើន សិរីសួស្ដី មានលាភជ័យមង្គលដល់គ្រួសារបងប្អូនកូនចៅគ្រប់គ្នា» ៕
ដោយ៖ លឹម ហុង
