ប្រធានាធិបតីអាមេរិច លោកដូណាល់ ត្រាំ បាននិយាយកាលពីថ្ងៃចន្ទថា លោកបានដាក់ពង្រាយទាហ៊ាន និងប៉ូលីសរាប់ពាន់នាក់ដើម្បីការពារកុំឲ្យមានការផ្ទុះបាតុកម្មបន្ថែមនៅក្នុងទីក្រុងវ៉ាស៊ីនតោន កន្លែងដែលអគារ និងវិមាននានាត្រូវបានបំផ្លាញនៅក្បែរសេតវិមាន។
លោកបានថ្លែងដូច្នេះថា “អ្វីដែលបានកើតឡើងកាលពីយប់មិញគឺជាភាពអាម៉ាស់” ខណៈដែលមានការបាញ់ឧស្ម័នបង្ហូរទឹកភ្នែក និងមានការតវ៉ានៅតាមដងផ្លូវជិតនោះ។
“ខ្ញុំកំពុងបញ្ជូនទាហ៊ាន និងប៉ូលីសរាប់ពាន់នាក់ដើម្បីបញ្ឈប់កុបកម្ម ការលួចប្លន់ ការវាយប្រហារ និងការបំផ្លិចបំផ្លាញទ្រព្យសម្បត្តិ”។
លោកត្រាំ បានប្រកាសថាវាជាអំពើភេរវកម្ម ក្រោយពេលមានការតវ៉ាទូទាំងប្រទេសប្រឆាំង ទៅនឹងការស្លាប់របស់បុរសជនជាតិអាមេរិចអាហ្វ្រិចឈ្មោះ George Floyd នៅក្នុងកន្លែងឃុំឃាំងរបស់ប៉ូលិស ដែលការស្លាប់នោះបានបង្កើតឲ្យមានកុបកម្មជាតិសាសន៍ទូទាំងប្រទេស។
“ខ្ញុំចង់ឲ្យអ្នករៀបចំអំពើភេរវកម្មនេះកត់សម្គាល់ថា អ្នកនឹងប្រឈមនឹងការដាក់ទោសព្រហ្មទណ្ឌ និងការជាប់ពន្ធធនាគារដ៏យូរ”។
សូមបញ្ជាក់ថា ការផ្ទុះការតវ៉ា ដ៏ខ្លាំងកើតមានឡើងក្រោយពេលបុរសស្បែកខ្មៅម្នាក់ឈ្មោះ George Folyd ត្រូវបានគេមើលឃើញថាប៉ូលិសបានយកជង្គង់សង្កត់ករបស់គាត់រហូតដល់ស្លាប់។
តាមរយៈវីដេអូ ប៉ូលិសម្នាក់ឈ្មោះ Derek Chauvin បានយកជង្គង់សង្កត់.ក លោក Floyd ជាជនសង្ស័យគ្រឿងញៀន ជាប់ពុំព្រមដោះលែងឡើយ បើទោះជាជនរងគ្រោះបានស្រែកអង្វរថា ពិបាកដង្ហើម និងសូម្បីមនុស្សម្នាស្នើសុំឲ្យបញ្ឈប់សកម្មភាពដ៏ព្រៃផ្សៃនេះយ៉ាងណាក៏ដោយ។
អតីតប៉ូលិស ដែលបង្កឲ្យមានកំហឹងទូទាំងប្រទេស បច្ចុប្បន្ន ត្រូវបានចោទប្រកាន់ពីបទឃាតកម្មកម្រិតទី៣ និងឃាតកម្មកម្រិតទី២។ ចំណែកមន្ត្រី៣នាក់ទៀត ដែលជាប់ពាក់ព័ន្ធនៅក្នុងហេតុការណ៍នេះ ក៏ត្រូវបានបញ្ចេញចេញពីកងកម្លាំងផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Agencies
