រដ្ឋមន្ត្រីការពារជាតិអាមេរិក James Mattis បានអញ្ជើញទៅបំពេញទស្សនកិច្ចនៅវៀតណាម ក្នុងក្របខ័ណ្ឌនៃដំណើរទស្សនកិច្ចរបស់លោកមួយជុំទ្វីបអាស៊ី។ ក្នុងជំនួបជាមួយសមភាគីវៀតណាមលោក Ngo Xuan Lich និងលោកប្រធានាធិបតីវៀតណាម Tran Dai Quang នាថ្ងៃព្រហស្បតិ៍ ទី២៥ មករា លោក Mattis បានលើកឡើងពីសិទ្ធិសេរីភាពនៃការធ្វើចរាចរណ៍ផ្លូវសមុទ្រនៅសមុទ្រចិនខាងត្បូង។ ទីក្រុងហាណូយ និងវ៉ាស៊ីនតោនបានប្រកាសឲ្យដឹងពីគម្រោងដំណើរចូលចតរបស់នាវាដឹកយន្តហោះចម្បាំងអាមរិកនៅកំពង់ផែវៀតណាមនាខែមីនាខាងមុខ។
គម្រោងនៃដំណើរចូលចតរបស់នាវាដឹកយន្តហោះចម្បាំងអាមរិក គឺជាព្រឹត្តិការណ៍ប្រវត្តិសាស្ត្រលើកទី១ មិនធ្លាប់មានទេនៅក្នុងទំនាក់ទំនងរវាងវៀតណាម និងអាមេរិកដែលជាអតីតគូសត្រូវ តែបានក្លាយជាសម្ព័ន្ធមិត្តនាពេលបច្ចុប្បន្ន។
ក្រៅពីប្រកាសឲ្យដឹងពីគម្រោងចូលចតរបស់នាវាដឹកយន្តហោះចម្បាំងអាមរិកនៅកំពង់ផែវៀតណាមនាខែមីនាខាងមុខ លោកប្រមុខការពារជាតិអាមេរិក James Mattis ក៏បាននិយាយជាមួយសមភាគីវៀតណាមពីសិទ្ធិសេរីភាពនៃការធ្វើចរាចរណ៍ផ្លូវសមុទ្រនៅក្នុងសមុទ្រចិនខាងត្បូងដូចដែលលោកបាននិយាយជាមួយសមភាគីឥណ្ឌូណេស៊ីដែរ។ វៀតណាមក៏ដូចជាប្រទេសហ្វីលីពីន ម៉ាឡេស៊ី ព្រុយណេ និងតៃវ៉ាន់កំពុងមានជម្លោះត ទល់នឹងចិនក្នុងរឿងសមុទ្រចិនខាងត្បូង។
នៅប៉ុន្មានឆ្នាំចុងក្រោយនេះទេដែលវៀតណាម និងអាមេរិកបានពង្រឹងទំនាក់ទំនងយោធារវាងគ្នា ពិសេសតាំងពីមានទស្សនកិច្ចរបស់លោកប្រធានាធិបតីអាមេរិកបារ៉ាក់ អូបាម៉ានៅវៀតណាមក្នុងឆ្នាំ ២០១៦ និងដែលកាលណោះ លោកអូបាម៉ាបានលើកទណ្ឌកម្មស្តីពីការហាមលក់អាវុធឲ្យវៀតណាម។ វត្តមានរបស់លោក Mattis ក្នុងទឹកដីវៀតណាមពេលនេះបានធ្វើឡើង ៦ខែក្រោយទស្សនកិច្ចរបស់លោករដ្ឋមន្ត្រីការពារជាតិវៀតណាម Ngo Xuan Lich នៅអាមេរិកកាលពីខែសីហា ឆ្នាំ ២០១៧៕
