Freddie Figgers (អាយុ ៣០ ឆ្នាំ) គឺជាសហគ្រិនវ័យក្មេងជោគជ័យយ៉ាងច្រើន នៅអាមេរិក និងជាម្ចាស់ក្រុមហ៊ុន Figgers Communication ដែលមានតម្លៃជាង ៦២ លានដុល្លារ ក្នុងឆ្នាំ ២០១៧ បានធ្វើឲ្យអ្នកប្រើប្រាស់អ៊ីនធើរណិតនៅជុំវិញពិភពលោក សម្តែងនូវការកោតសរសើរជាខ្លាំង ព្រោះតែពុំនឹកស្មានថា គាត់ជាក្មេងត្រូវម្តាយចិត្តអប្រិយបោះបង់ចោលក្នុងសំរាម ទាំងខ្លួនក្រហមរងាល បានប្រែក្លាយជាមនុស្សមានកេរ្តិ៍ឈ្មោះល្បីល្បាញ ដែលត្រូវបានផ្តល់តម្លៃខ្ពស់បំផុត។
Freddie ជាជនជាតិអាមេរិក ដែលមិនធ្លាប់នឹកស្រមៃថា ជីវិតខ្លួននឹងផ្លាស់ប្តូរមកដល់ចំណុចនេះ ត្រូវបានម្តាយបោះបង់ចោលនៅក្នុងធុងសំរាម បន្ទាប់កើតបានប៉ុន្មានម៉ោងប៉ុណ្ណោះ នៅក្នុងរដ្ឋ Florida ឆ្នាំ១៩៨៩។ ហើយនៅពេលនោះ ទារកដ៏អភព្វ Freddie ត្រូវបានប្រទះឃើញដោយអ្នកប្រមូលសំរាម ដែលបន្ទាប់បាននាំយកទៅសង្គ្រោះនៅមន្ទីរពេទ្យ។ អាយុបាន ២ ថ្ងៃ ទារក Freddie បានមានសំណាង ត្រូវបានប្តីប្រពន្ធ១គូឈ្មោះ Nathan និង Betty ទទួលយកទៅចិញ្ចឹម។
កុមារភាពរបស់ Freddie តែងត្រូវបានមិត្តរួមថ្នាក់ចំអកដាក់ ដោយហៅថាជាក្មេងត្រូវម្តាយបោះបង់ចោលក្នុងធុងសំរាម ។ ហើយពាក្យមើលងាយទាំងនេះ សម្រាប់គាត់ វាគឺជាស្នាមប្រឡាក់ដ៏គួរឲ្យអាម៉ាសខ្លាំងណាស់។
ទោះយ៉ាងណា នៅអាយុ ៩ ឆ្នាំ ឪពុកចិញ្ចឹម បានទិញកុំព្យ័រទ័រ១តឹក១គ្រឿងម៉ាក Maclntosh ផលិតឆ្នាំ១៩៨៩ សម្រាប់គាត់ ក្នុងតម្លៃ ២៥ ដុល្លារ ដោយសង្ឃឹមថា វានឹងធ្វើឲ្យ Freddie គេចផុតពីការមើលងាយទាំងនោះ។
Freddie បាននិយាយថា បន្ទាប់ពីកុំព្យ័ទ័រនោះបានខូច ៥ ទៅ ៦ ដង គាត់បានធ្វើការជួសជុលវាដោយខ្លួនឯង ហើយវាក៏នៅតែដំណើរការរហូតមកទល់សព្វថ្ងៃនេះផងដែរ។
ចាប់តាំងពីពេលនោះមក Freddie បានចាប់ផ្តើមងប់ងល់នឹងបច្ចេកវិទ្យា។ គាត់បានរចនា (Design) ឧបករណ៍រុករក និងឧបករណ៍ទំនាក់ទំនងពីរផ្លូវ ដើម្បីភ្ជាប់ទៅនឹងស្បែកជើងឪពុកចិញ្ចឹមរបស់គាត់ដែលមានជំងឺវង្វេងវង្វាន់ ដូច្នេះ គាត់អាចរកឃើញនៅពេលណាដែលគាត់វង្វេង។ នៅអាយុ ១២ ឆ្នាំ Freddie បានទទួលការដំបូងជាអ្នកបច្ចេកទេសជួសជុលកុំព្យូទ័រ នៅឯស្រុកកំណើតរបស់គាត់ស្ថិតនៅក្នុងរដ្ឋផ្លរីដា។
នៅអាយុ ១៥ ឆ្នាំ Freddie បានផ្តើមគំនិតបង្កើតសេវាកម្ម Cloud ។ គាត់បានទៅរកអ្នកលក់រថយន្ត វិស័យច្បាប់ ឈ្នួញអចលនទ្រព្យ ដើម្បីជួយពួកគេក្នុងការផ្លាស់ប្តូរពីទិន្នន័យរក្សាទុកលើក្រដាស ទៅក្នុងកុំព្យូទ័រវិញ។
បើទោះបីជាបុរសវ័យក្មេងរូបនេះ មានទេពកោសល្យក្នុងការជួយជុលផ្នែក Hardware និងបណ្តាញ (Network) យ៉ាងណាក៏ដោយ នោះ Software ក៏ជាចំណង់ចំណូលចិត្តបំផុតរបស់គាត់ផងដែរ។ ជាការពិតណាស់ ក្រោយៗមក Freddie បានឌីហ្សាញកម្មវិធីសុវត្ថិភាពសម្រាប់ធនាគារ, ប្រព័ន្ធត្រួតពិនិត្យអ្នកជំងឺពីចម្ងាយ (សម្រាប់មនុស្សចាស់) និងកម្មវិធី Software រាប់មិនអស់ដទៃទៀត។
Freddie បាននិយាយថា «នៅពេលអាយុ ១៧ ឆ្នាំ ខ្ញុំទទួលបានអតិថិជន ១៥០ នាក់ ។ ខ្ញុំជួលជុលកុំព្យូទ័រពី ៥០ ទៅ ៦០ គ្រឿង ក្នុង១សប្តាហ៍។
បន្ទាប់ពីបញ្ចប់ការសិក្សានៅមហាវិទ្យាល័យក្នុងឆ្នាំ២០០៩ នៅពេលនោះ គាត់ទទួលបានឱកាសឌីហ្សាញកម្មវិធីមួយដែលមានតម្លៃ ៦៥,០០០ ដុល្លារ។ នៅពេលអាយុ ២៣ ឆ្នាំ គាត់ក៏បានធ្វើឲ្យប្រសើរ (Upgrade) ឧបករណ៍ត្រួតពិនិត្យពីចម្ងាយ ដែលធ្វើឲ្យឪពុកចិញ្ចឹមរបស់គាត់ ដើម្បីជួយដល់មនុស្សចាស់ៗដែលមិនចង់ទៅពេទ្យ ដែលក៏នៅតែអាចត្រូវបានយកចិត្តទុកដាក់ និងតាមដានពីចម្ងាយផងដែរ។ គាត់បានលក់ឧកបរណ៍ច្នៃប្រឌិតនេះក្នុងតម្លៃ ២.៣ លានដុល្លារ ដើម្បីជួយចាក់គ្រឹះសម្រាប់ក្រុមហ៊ុនផ្ទាល់របស់គាត់។
បច្ចុប្បន្ននេះ Freddie បានក្រុមហ៊ុនមួយដែលលក់ smartphone និងកញ្ចប់ data ហើយគាត់នៅតែចង់ងប់ងល់នឹងការបញ្ចូលបច្ចេកវិទ្យាជាមួយនឹងការថែរក្សាសុខភាព។ ឧទហរណ៍វាស់ជាតិគ្លុយកូសក្នុងឈាមឥតខ្សែ សម្រាប់អ្នកជំងឺដែលមានជំងឺទឹកនោមផ្អែម ។ អ្នកជំងឺអាចទាញយក និងចែករំលែកកម្រិតជាតិស្ករក្នុងឈាម តាមរយៈបច្ចេកវិទ្យាប្ល៊ូធូស (Bluetooth) ។ គាត់ក៏កំពុងធ្វើការនៅលើគម្រោងស្រដៀងគ្នានៃបច្ចេកវិទ្យា «ស្បែកជើងឆ្លាត» ដើម្បីជួយគ្រួសារទាំងឡាយ ឲ្យរក្សាការផ្សារភ្ជាប់ជាមួយមនុស្សជាទីស្រឡាញ់ ដែលប្រឈមនឹងភាពគ្មានផ្ទះសម្បែង។
Freddie និយាយថា៖ «កាលពីអតីតកាល ប្រសិនបើខ្ញុំមិនត្រូវបានគេរកឃើញ នោះខ្ញុំច្បាស់ណាស់នឹងស្លាប់ ឬ គ្មានផ្ទះសម្បែងនោះទេ» ។
Freddie បានរៀបការជាមួយប្រពន្ធរបស់គាត់ឈ្មោះ Natlie ជាអ្នកច្បាប់ម្នាក់ ហើយបច្ចុប្បន្ននេះ គាត់មានកូនស្រី២នាក់ហើយ។ តែទន្ទឹមនឹងនេះផងដែរ គាត់ក៏បានសម្តែងនូវការដឹងគុណខ្លាំងបំផុត ចំពោះឪពុកម្តាយចិញ្ចឹមរបស់គាត់ទាំងពីរ ដែលបានអាណិតអាសូរ និងផ្តល់ក្តីស្រឡាញ់សម្រាប់គាត់ និងជាពិសេសប្រែក្លាយរូបគាត់ ពីក្មេងម្តាយបោះបង់ចោលក្នុងធុងសំរាម មកជាមនុស្សម្នាក់ដែលសង្គមជាតិត្រូវការ និងក៏ដូចទទួលបានការរាប់អានពីមនុស្សយ៉ាងច្រើនផងដែរ៕
ប្រែសម្រួល៖ លឹម ហុង (ប្រភព៖ m.vcci.com.vn/)
