មេដឹកនាំហុងកុង អ្នកស្រី Carrie Lam បានចោទប្រកាន់អាមេរិចនៅថ្ងៃអង្គារនេះថា បានអនុវត្តស្តង់ដារពីរ ចំពោះការឆ្លើយតបរបស់ខ្លួន ទៅលើការតវ៉ាហឹង្សា ហើយនៅពេលជាមួយគ្នានេះដែរ អ្នកស្រីបានព្រមានទីក្រុងវ៉ាស៊ីនតោនថា គម្រោងរឹតបន្តឹងពាណិជ្ជកម្មលើទីក្រុងហុងកុងនឹងធ្វើឲ្យប៉ះដល់ខ្លួនឯងប៉ុណ្ណោះ។
ទីក្រុងហុងកុងបានញាំញីដោយការតវ៉ាហឹង្សាដ៏ធំ អស់រយៈពេលជាច្រើនខែកាលពីឆ្នាំមុន ហើយការតវ៉ាហឹង្សា បណ្តាលឲ្យមានការចាប់ខ្លួនមនុស្សជាង ៩.០០០នាក់។
ទីក្រុងវ៉ាស៊ីនតោនបានរិះគន់វិធានការឆ្លើយតបរបស់ហុងកុង ទៅលើការតវ៉ា ដោយកាលពីសប្តាហ៍មុនប្រធានាធិបតីអាមេរិច បានប្តេជ្ញាដកហូតឋានៈពាណិជ្ជកម្មពិសេសចេញពីទីក្រុងនេះ ក្រោយពេលទីក្រុងប៉េកាំង បានប្រកាសសំណើរច្បាប់សន្តិសុខជាតិលើហុងកុង។
នៅថ្ងៃអង្គារនេះ មេដឹកនាំហុងកុង អ្នកស្រី Carrie Lam និយាយថាគម្រោងអាមេរិច ក្នុងការដកឋានៈពិសេសចេញពីទីក្រុងហុងកុងនឹងធ្វើឲ្យប៉ះពាល់ដល់អាមេរិចខ្លួនឯង ខណៈដែលអ្នកស្រីបានផ្តោតលើបញ្ហារដ្ឋបាលរបស់លោកដូណាល់ ត្រាំ មានវិធានការឆ្លើយតបទៅលើការតវ៉ាហឹង្សា ដែលកំពុងកើតមានទូទាំងអាមេរិច ជុំវិញការស្លាប់របស់ជនជាតិស្បែកខ្មៅអាមេរិចអាហ្វ្រិចឈ្មោះ George Floyd។
អ្នកស្រីថ្លែងថា “ពួកយើងបានឃើញយ៉ាងច្បាស់ក្នុងប៉ុន្មានសប្តាហ៍ថ្មីៗនេះពីស្តង់ដារពីរ”។
អ្នកស្រីបន្តទៀតថា “អ្នកដឹងទេថា មានកុបកម្មនៅអាមេរិច ហើយពួកយើងបានឃើញពីរបៀបដែលរដ្ឋាភិបាល ប្រចាំតំបន់នីមួយៗធ្វើការឆ្លើយតប។ បន្ទាប់មកនៅក្នុងទីក្រុងហុងកុង នៅពេលពួកយើងមានកុបកម្មស្រដៀងគ្នាកើតឡើង ពួកយើងបានឃើញពីជំហរដែលពួកគេបានអនុម័តនៅពេលនោះ”។
ទាំងមន្ត្រីចិន និងហុងកុងបានចាប់យកពីភាពចលាចល នៅក្នុងសហរដ្ឋអាមេរិចមក ធ្វើជាប្រធានបទក្នុងការឃោសនារបស់ពួកគេ ដើម្បីបង្ហាញពីហេតុផលនៃការបង្ក្រាប របស់ពួកគេទៅលើការតវ៉ានៅទីក្រុងហុងកុង និងគម្រោងចេញច្បាប់សន្តិសុខជាតិសម្រាប់ហុងកុង។
សូមបញ្ជាក់ថា កាលពីសប្តាហ៍មុន សភាចិនបាន អនុម័តគម្រោងសម្រាប់ច្បាប់សន្តិសុខ ដែលច្បាប់នេះនឹងមានការដាក់ទោសទណ្ឌ ចំពោះអំពើអបគមន៍ វិទ្ធង្សនា អំពើភេរវកម្ម និងសកម្មភាពផ្សេងៗដែលធ្វើឲ្យគ្រោះថ្នាក់ដល់សន្និសុខ។
មនុស្សមួយចំនួនមានការព្រួយបារម្ភថា ច្បាប់ដែលចិនស្នើនោះ នឹងរឹតត្បិតដល់សិទ្ធិ និងសេរីភាពរបស់ហុងកុង៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP