ភ្នំពេញ : ស្ត្រី ម្នាក់បានស្លាប់ នៅក្នុងបន្ទប់ជួលសង្ស័យបញ្ជូលសាកថ្មទូរស័ព្ទដៃបណ្ដើរ មើលបណ្ដើរ នៅក្នុងបន្ទប់ទឹក មិនដឹងមូលហេតុអ្វី បានជាឆក់ស្លាប់។ បងប្អូនមកពីខេត្តមកមើលសួរសុខទុក្ខ បានប្រទះឃើញនាងសន្លប់ស្ដូកស្ដឹងទើបយកមកធ្វើចលនា ប៉ុន្តែនាងស្លាប់ទៅហើយ ទើបបង្កការភ្ញាក់ផ្អើល កាលវេលាម៉ោង២និង៣០នាទីរសៀលថ្ងៃទី២ ខែ មិថុនា ឆ្នាំ ២០២០នៅចំណុចបន្ទប់ជួលជាន់ទី១ ស្ថិតនៅភូមិ១២ សង្កាត់ ទន្លេបាសាក់ ខណ្ឌចំការមន រាជធានីភ្នំពេញ ។
សពជនរងគ្រោះឈ្មោះ រឿន ធី អាយុ ៣៧ឆ្នាំ មុខរបរនៅផ្ទះ ស្នាក់នៅបន្ទប់ជួលកើតហេតុខាងលើ មានស្រុកកំណើតនៅភូមិព្រែកក្របៅ១ ឃុំព្រែកអំពិល ស្រុកខ្សាច់កណ្ដាល ខេត្ត កណ្ដាល ។
ប្រភពព័ត៌មានពីនគរបាលបានឲ្យដឹងថា មុនកើតហេតុមានបងប្អូនមកពីខេត្តសៀមរាម មកលេងស្ត្រីរងគ្រោះនៅបន្ទប់ជួលកើតហេតុខាងលើ ដោយសារជនរងគ្រោះខាងលើ បានផ្អាកការងារមួយរយៈដោយសារតាមភោជនីយដ្ឋានមួយចំនួន ត្រូវការសម្រាកក្រោយពីមានជំងឺកូវីដ១៩ ហើយយោងតាមក្រសួងសុខាភិបាលមិនឲ្យមានការជួបជុំគ្នា និងទីប្រជុំជន លុះមកដល់បន្ទប់ជួល ស្រាប់តែបើកទារឃើញបងស្រីគាត់ដួលក្នុងបន្ទប់ទឹកឱបទូរស័ព្ទ នឹងព្រីភ្លើង ជនរងគ្រោះមានសភាពរឹងស្ដូកស្ដឹង រួចក៏ស្រែកឲ្យគេឯងជួយរួចលើមកដាក់លើពូក ដើម្បីសង្គ្រោះ តែអ្នកជិតខាងថាស្លាប់មិនដឹងពីពេលណានោះទេ ក្រោយមកក៏រាយការណ៍ទៅនគរបាលប៉ុស្តិ៍ ដើម្បីចុះមកត្រួតពិនិត្យកន្លែងកើតហេតុ ។
នគរបាលបញ្ជាក់ថា ករណីខាងលើបើតាមសាក្សីនិងជាសាច់ញាតិបង្កើត ដែលមកលេងក្រុមគ្រួសារនោះថាអង្គហេតុឃើញសពឱបព្រីភ្លើង និងទូរស័ព្ទ សង្ស័យគាត់បញ្ជូលថ្មបណ្ដើរ មើលទូរស័ព្ទបណ្ដើរ ពេលបោកសម្លៀកបំពាក់ សង្ស័យឆ្លងចរន្តភ្លើង ទើបឆក់ខ្សែភ្លើងស្លាប់ ។ យោងតាមក្រុមគ្រួសារ ដែលជួលបន្ទប់ក្បែរគ្នានោះ ឃើញជាក់ស្ដែងថា អាចស្លាប់ដោយឆ្លងចរន្តភ្លើងហើយមិនប្ដឹងផ្ដល់ លើបុគ្គលណាមួយទេ ស្នើសុំឲ្យនគរបាល និងមន្ត្រីសាលាសង្កាត់ ចូលរួមដឹងឮយកសពទៅស្រុកកំណើត ដើម្បីធ្វើបុណ្យតាមប្រពៃណី ៕
ដោយ៖សហការី CEN