ភ្នំពេញ ៖ ចោរមួយក្រុម បានធ្វើសកម្មភាពវាយប្លន់ស្ត្រីអ្នកលក់បន្លែម្នាក់ បានសម្រេចយកលុយអស់១.៣០០.០០០រៀល រួចនាំគ្នាឡើងជិះម៉ូតូរបស់បក្ខពួកគេចខ្លួនបាត់ស្រមោល ដោយបន្សល់ទុកម៉ូតូជនសង្ស័យមួយគ្រឿង នៅកន្លែងកើតហេតុ ដោយមិនរំខានប៉ូលិសខណ្ឌច្បារអំពៅ។
ករណីនេះ គឺបានកើតឡើងកាលពីម៉ោងទៀបភ្លឺឈានចូលថ្ងៃទី៣ ខែមិថុនា ឆ្នាំ២០២០ នេះនៅចំណុចស្ពានថ្មតាមបណ្តោយផ្លូវបេតុង ក្នុងភូមិកោះនរា សង្កាត់និរោធ ខណ្ឌច្បារអំពៅ រាជធានីភ្នំពេញ។
ក្រុមសមត្ថកិច្ចបាននិយាយថា មុនពេលកើតហេតុ គឺស្ត្រីរងគ្រោះឈ្មោះ ហន ហៀង អាយុ៣៣ឆ្នាំ មុខរបរលក់បន្លែ ជិះម៉ូតូម៉ាកហុងដាវ៉េវ ពណ៌ខ្មៅលាយក្រហម ពាក់ផ្លាកលេខភ្នំពេញ1DD-3264។ ចំណែកឯម៉ូតូក្រុមជនសង្ស័យដែលបន្សល់ទុកនៅកន្លែងកើតហេតុម៉ាកស៊ុយហ្ស៊ុយគីឡេត ពណ៌ទឹកប្រាក់លាយទឹកមាស ពាក់ផ្លាកលេខ បាត់ដំបង1A-4678 ។
ប្រភពព័ត៌មានពីជនរងគ្រោះ បានឲ្យដឹងទៀតថា មុនកើតហេតុ រូបគាត់បានបើកម៉ូតូចេញពីផ្ទះគាត់ ដោយក្នុងគោលបំណងឆ្ពោះទៅទិញបន្លែ នៅផ្សារច្បារអំពៅ យកមកលក់ ដូចសព្វដង ដោយដាក់លុយក្នុងកាបូបចំនួន១.៣០០.០០០រៀល និងទូរស័ព្ទដៃមួយគ្រឿងម៉ាកសាំសុង ដោយជិះម៉ូតូតាមបណ្តោយផ្លូវបេតុង (កោះនរា) ខណៈពេលមកដល់ចំណុចកើតហេតុខាងលើ ស្រាប់តែមានមនុស្សប្រុសពីរនាក់ ជិះម៉ូតូមកជិតគាត់ រួចយកមួកសុវត្ថិភាពវាយមកលើគាត់។
ស្ត្រីរងគ្រោះបានបន្តទៀតថា ភ្លាមៗនោះរូបគាត់បានស្រែកថាចោរៗ ពេលនោះជនសង្ស័យម្នាក់ បានទាញយកកាបូប របស់គាត់ដែលដាក់ទាក់នឹងកម៉ូតូ បណ្ដាលឱ្យដួលរងរបួសរលាត់ដៃជើង ព្រមទាំងដួលម៉ូតូរបស់ជនសង្ស័យផងដែរ ហើយជនសង្ស័យវាយគាត់នឹងមួកសុវត្ថិភាពបន្ថែមទៀត ខណៈនោះក៏មានប្រជាពលរដ្ឋចេញមកមើលច្រើន។ ដោយឃើញសភាពការណ៍មិនស្រួល ពួកជនសង្ស័យភ័យពេក បានរត់ឡើងជិះម៉ូតូបក្ខពួករបស់គេ ព្រមទាំងយកកាបូបលុយរបស់គាត់ ទៅជាមួយផងដែរ គេចខ្លួនបាត់ដោយសុវត្ថិភាព ដោយបន្សល់ទុកម៉ូតូមួយគ្រឿង ។
បន្ទាប់មក សមត្ថកិច្ចបានយកម៉ូតូជនសង្ស័យ និងឱ្យជនរងគ្រោះ ទៅដាក់ពាក្យបណ្ដឹងនៅប៉ុស្តិ៍នគរបាលនិរោធ ដើម្បីស្វែងរកចាប់ខ្លួនជនសង្ស័យតែប៉ុណ្ណោះ។ រីឯក្រុមចោរប្លន់ នៅតែមានវាសនាខ្ពស់គេចខ្លួន ៕
ដោយ៖បញ្ញាស័ក្តិ
