តាកែវ៖ ស្នងការនគរបាលខេត្តតាកែវ បានជំរុញឲ្យអធិការស្រុកសំរោងថ្មី ត្រូវតែធានាឲ្យបាននៅភូមិឃុំសុវត្ថិភាព ជូនប្រជាពលរដ្ឋនៅមូលដ្ឋាន ជាពិសេសលុបបំបាត់គ្រឿងញៀន ត្រូវតែស្វះស្វែងធ្វើការស្រាវជ្រាវរកមុខសញ្ញាបង្កហេតុ យកមកផ្តន្ទាទោសទៅតាមនីតិវិធីឲ្យបាន ដើម្បីឲ្យបងប្អូនប្រជាពលរដ្ឋនៅតាមមូលដ្ឋាន លោកកាន់តែមានជំនឿទុកចិត្ត មកលើសមត្ថកិច្ចនគរបាល ។
តាកែវ៖ ឯកឧត្តម សុខ សំណាង ស្នងការនគរបាលខេត្តតាកែវធ្វើការជម្រុញបែបនេះ នៅក្នុងកម្មវិធីប្រកាសតែងតាំងនិងផ្ទេរភារកិច្ចលោកវរសេនីយ៍ឯក ភី ឆុន ត្រូវបានផ្លាស់ប្តូរពីអធិការស្រុកអង្គរបូរី មកជាអធិការស្រុកសំរោងវិញជំនួសលោក មឿន សារុន ដែលត្រូវបានផ្ទេរទៅជានាយការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តតាកែវនៅថ្ងៃទី ០៣ ខែមិថុនាឆ្នាំ២០២០នេះ ។
ឯកឧត្តមស្នងការលោកបានបន្តថា លោកអធិការថ្មី ត្រូវតែពិនិត្យឡើងវិញនូវលើការងារសន្តិសុខ ត្រូវក្តាប់ឲ្យជុំនៅក្នុងមូលដ្ឋាន ចំពោះមុខសញ្ញាដែលវិលត្រឡប់ចូលមកស្រុកកំណើត ជាពិសេសជនបរទេស ដែលមកបង្កើតអង្គការ ឬធ្វើការងារអ្វីផ្សេង ត្រូវធ្វើការតាមដានឲ្យជាប់លើ មុខសញ្ញាដែលមានការសង្ស័យ និងធ្វើការយ៉ាមកាមល្បាតនៅតាមចំណុចគោលដៅសំខាន់ៗ ដើម្បីរក្សាឲ្យបាននៅសន្តិសុខសណ្តាប់ធ្នាប់ជូនដល់បងប្អូនប្រជាពលរដ្ឋឲ្យបានល្អ មិនត្រូវឲ្យមានបទល្លើសដែលកើតមានហើយ បង្ក្រាបមិនបាននោះទេ ត្រូវតែស្វះស្វែងធ្វើការស្រាវជ្រាវរកមុខសញ្ញាបង្កហេតុ យកមកផ្តន្ទាទោសទៅតាមនីតិវិធីឲ្យបាន ដើម្បីឲ្យបងប្អូនប្រជាពលរដ្ឋនៅតាមមូលដ្ឋាន លោកកាន់តែមានជំនឿទុកចិត្តមកលើសមត្ថកិច្ចនគរបាលយើង ។
នៅក្នុងពិធីនោះដែរលោក កេត ម៉ៅ អភិបាលស្រុកសំរោង ស្នើសុំឲ្យលោកអធិការដែលទើបតែងតាំងថ្មី ត្រូវធានាឲ្យបាននៅចំនុចភូមិឃុំមានសុវត្ថិភាព ដើម្បីចូលរួមគ្នាទប់ស្កាត់លើបទល្មើស ដែលកើតមាននៅក្នុងមូលដ្ឋាន ជាពិសេសលុបបំបាត់ឲ្យបានចំពោះករណីគ្រឿងញៀនក្នុងមូលដ្ឋាននេះ ៕
ដោយ៖ តាកែវ
