បុរសម្នាក់ដែលបានយកគ្រឿងផ្ទុះទៅចូលរួមការធ្វើបាតុកម្មនៅទីក្រុង Minnepolis ក្នុងទីរដ្ឋ Minnesota ត្រូវបានចាប់ខ្លួន និងចោទប្រកាន់ពីបទញុះញុងឲ្យមានកុបកម្ម ដែលករណីនេះទំនង ជាការកាត់ទោសលើកដំបូង របស់សហព័ន្ធពាក់ព័ន្ធនឹងការចលាចលនៅអាមេរិច ដែលកើតឡើងដោយសារការស្លាប់របស់ជនជាតិស្បែកខ្មៅម្នាក់ឈ្មោះ George Floyd។
បុរសរូបនោះមានឈ្មោះថា Matthew Lee Rupert អាយុ ២៨ឆ្នាំ។ គាត់បានធ្វើដំណើរមកចូលរួមបាតុកម្មពីទីក្រុង Galesburg ក្នុងរដ្ឋ Illinois ដែលមានចំងាយប្រមាណ ៥០០គីឡូម៉ែត្រពីទីក្រុង Minnepolis ដោយមានបំណងបង្កឲ្យមានការខូចខាត និងការលួចប្លន់។ នេះបើតាមការចោទប្រកាន់របស់តុលាសហព័ន្ធរដ្ឋ Minnesota កាលពីថ្ងៃចន្ទ។
បើតាមវីដេអូកាលពីថ្ងៃទី ២៩ ខែឧសភា ដែលបុរសនោះបានបង្ហោះអនឡាញ បានបង្ហាញថា គាត់ត្រូវបានគេឃើញហុចគ្រឿងផ្ទុះដែលគាត់មានទៅឲ្យអ្នកផ្សេង និងបានជំរុញឲ្យអ្នកដទៃគប់គ្រឿងផ្ទុះនោះដាក់មន្ត្រីអនុវត្តច្បាប់ បង្កឲ្យមានការខូចខាតខ្លាំង មានភ្លើងឆេះអគារ និងបង្កឲ្យមានការលួចប្លន់នៅក្នុងទីក្រុង។
ជនជាប់ចោទនិយាយក្នុងវីដេអូទៀតថា “ពួកគេ (ប៉ូលីស)មានឡាននៅទីនោះ ខ្ញុំមានគ្រាប់បែកខ្លះ ហើយប្រសិនជាអ្នកទាំងអស់គ្នាចង់គប់វាដាក់ពួកគេ នេះខ្ញុំមានច្រើន។ ដុតវា និងគប់វាទៅ”។
នៅក្នុងវីដេអូផ្សេងទៀតដែលបានបង្ហោះកាលពីថ្ងៃទី ៣១ ខែឧសភា បុរសរូបនោះបាននិយាយថា “តោះពួកយើងបង្កើតកុបកម្ម ហើយខ្ញុំនឹងចាប់ផ្តើមធ្វើឲ្យមានការខូចខាត”។
សូមបញ្ជាក់ថា បាតុកម្មនៅក្នុងទីក្រុង Minnepolis ផ្ទុះឡើងខ្លាំងបន្ទាប់ពីមានការស្លាប់របស់បុរសអាមេរិចអាហ្វ្រិចម្នាក់ ដែលបានស្លាប់ដោយសារតែប៉ូលីសយកជង្គង់សង្កត់ករបស់គាត់រហូតដល់ដកដង្ហើមលែងកើ។
តាមរយៈវីដេអូ ប៉ូលិសម្នាក់ឈ្មោះ Derek Chauvin បានយកជង្គង់សង្កត់.ក លោក Floyd ជាជនសង្ស័យគ្រឿងញៀន ជាប់ពុំព្រមដោះលែងឡើយ បើទោះជាជនរងគ្រោះបានស្រែកអង្វរថា ពិបាកដង្ហើម និងសូម្បីមនុស្សម្នាស្នើសុំឲ្យបញ្ឈប់សកម្មភាពដ៏ព្រៃផ្សៃនេះយ៉ាងណាក៏ដោយ។
អតីតប៉ូលីស ដែលបង្កឲ្យមានកំហឹងទូទាំងប្រទេស បច្ចុប្បន្ន ត្រូវបានចោទប្រកាន់ពីបទឃាតកម្មកម្រិតទី៣ និងឃាតកម្មកម្រិតទី២។ ចំណែកមន្ត្រី៣នាក់ទៀត ដែលជាប់ពាក់ព័ន្ធនៅក្នុងហេតុការណ៍នេះ ក៏ត្រូវបានបញ្ចេញចេញពីកងកម្លាំងផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
