សហរដ្ឋអាមេរិចកាលពីថ្ងៃអង្គារ បានចោទប្រកាន់ប្រទេសចិនថា បំបិតមាត់ទីក្រុងហុងកុងកុំឲ្យបញ្ចេញមតិ និងសម្តែងបានតាមរយៈការពារទីក្រុងនេះកុំឲ្យធ្វើពិធីរំលឹកការបង្ក្រាបបង្ហូរឈាម លើក្រុមបាតុករចិននៅទីលាន Tiananmen កាលពីឆ្នាំ ១៩៨៩។ ការចោទប្រកាន់នេះកើតឡើងចំពេលកម្តៅ កំពុងកើនឡើងខ្លាំងរវាងមហាអំណាចទាំងពីរ ជុំវិញបញ្ហាសេរីភាពរបស់ហុងកុង។
ការបង្ក្រាបរបស់រដ្ឋាភិបាលចិនទៅលើក្រុមបាតុករកាលពីឆ្នាំ ១៩៨៩ បណ្តាលឲ្យមនុស្សស្លាប់យ៉ាងតិច ១០.០០០នាក់។ នេះបើតាមឯកសាររបស់អង់គ្លេស។
រដ្ឋមន្ត្រីការបរទេសអាមេរិចលោក Mike Pompeo បានបង្ហោះនៅលើ Twitterដូច្នេះថា “ប្រសិនជាមានការសង្ស័យពីចេនារបស់ចិន គឺចិននឹងបដិសេធសម្លេង និងជម្រើសរបស់ប្រជាជនហុងកុងដោយធ្វើឲ្យប្រជាជនហុងកុងដូចប្រជាជនចិន”។
អាជ្ញាធរហុងកុងបានធ្វើការហាមឃាត់យ៉ាងមានប្រសិទ្ធភាព ចំពោះការរំលឹកដល់ការបង្ក្រាបបង្ហូរឈាមឆ្នាំ ១៩៨៩ ដោយអាជ្ញាធរបានបន្ថែមពេលវេលាហាមឃាតលើការប្រមូលផ្តុំ ដើម្បីបង្ការការរាតត្បាតវីរុស COVID-19។
អ្នកនាំពាក្យក្រសួងការបរទេសអាមេរិច អ្នកស្រី Morgan Ortagus បានថ្លែងថា “ពួកយើងសូមជំរុញអាជ្ញាធរហុងកុងឲ្យអនុញ្ញាតឲ្យប្រជាជនហុងកុង ធ្វើការរំលឹកដោយសន្តិភាព ទៅដល់ជនរងគ្រោះនៃបក្សកុម្មុយនិស្តចិន”។
កាលពីសប្តាហ៍មុន រដ្ឋមន្ត្រីការបរទេសអាមេរិច បានប្រកាសថាទីក្រុងហុងកុង លែងមានស្វ័យភាពកម្រិតខ្ពស់ពីចិនទៀតហើយ ក្រោយពេលទីក្រុងប៉េកាំង បានប្រកាសច្បាប់សន្តិសុខជាតិដ៏ចម្រូងចម្រាស់។
មេដឹកនាំហុងកុង អ្នកស្រី Carrie Lam កាលពីថ្ងៃចន្ទ បានធ្វើការចោទប្រកាន់អាមេរិចថា អនុវត្តស្តង់ដារពីរចំពោះបាតុកម្ម ខណៈដែលប្រធានាធិបតីអាមេរិច ដូណាល់ ត្រាំ បានបញ្ជាឲ្យមានការប្រើប្រាស់កម្លាំងទ័ព ដើម្បីបំបែកក្រុមបាតុករប្រឆាំងនឹងការរើសអើងជាតិសាសន៍ ជុំវិញការស្លាប់របស់ជនជាតិស្បែកខ្មៅម្នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
