បន្ទាយមានជ័យ ៖ មន្ទីរទេសចរណ៍ ខេត្តបន្ទាយមានជ័យ និងក្រសួងទេសចរណ៍ បានរៀបចំបើកកិច្ចប្រជុំស្តីពីសៀវភៅ ផែនការអភិវឌ្ឍន៍ផែនទីបង្ហាញផ្លូវទេសចរណ៍ ភាគពាយ័ព្យប្រទេស និងតំបន់ជុំវិញបឹងទន្លេសាប។
កិច្ចប្រជុំនេះធ្វើឡើងដោយ ឯកឧត្ដម លី សារី អភិបាលរងខេត្តទទួលបន្ទុកផ្នែកទេសចរណ៍ខេត្តបន្ទាយមានជ័យ និង លោក ម៉ែន ភារម្យ ប្រធាននាយកដ្ឋានផែនការអភិវឌ្ឍទេសចរណ៍ នៃក្រសួងទេសចរណ៍ លោកប្រធានមន្ទីទេសចរណ៍ខេត្ត មន្ត្រី ជំនាញមកពីមន្ទីទេសចរណ៍ខេត្ត ស្ថិតនៅតំបន់ភាគពាយ័ព្យ ឧត្តរ និងតំបន់ជុំវិញបឹងទន្លេសាប ដែលរួមមាន ៖ ខេត្តព្រះវិហារ ឧត្តរមានជ័យ បន្ទាយមានជ័យ ប៉ៃលិន និងខេត្តជុំវិញបឹងទន្លេសាបមាន កំពង់ធំ សៀមរាប បាត់ដំបង ពោធិ៍សាត់ កំពង់ឆ្នាំង ធ្វើឡើងនៅសាលាខេត្តបន្ទាយមានជ័យ។
កិច្ចប្រជុំនេះគឺដើម្បីពង្រឹង និងពង្រីកទំនាក់ទំនងខេត្តស្ថិតនៅតំបន់ភាគពាយ័ព្យ និងជុំវិញបឹងទន្លេសាប
ឲ្យកាន់តែមានសក្តានុពលក្នុងការផ្សព្វផ្សាយវិស័យទេសចរណ៍ ជាពិសេសក្នុងការតភ្ជាប់ខ្សែក្រវ៉ាត់តែមួយរវាងខេត្តភាគពាយ័ព្យ ឧត្តរ និងខេត្តជុំវិញបឹងទន្លេសាប ដែលក្នុងនោះខេត្ត ស្ថិតនៅតំបន់ភាគពាយ័ព្យ ឧត្តរ និងខេត្តជុំវិញបឹងទន្លេសាបឲ្យកាន់តែល្អប្រសើរ ។
នាយកដ្ឋានផែនការអភិវឌ្ឍន៍ទេសចរណ៍ បានសហការជាមួយនាយកដ្ឋានពាក់ព័ន្ធ នៃក្រសួងសចរណ៍ ចុះស្រាវជ្រាវ និងប្រមូលទិន្នន័យ ដើម្បីធ្វើផែនការអភិវឌ្ឍន៍ផែនទីបង្ហាញផ្លូវ ទេសចរណ៍ តំបន់ភាគពាយ័ព្យ ឧត្តរ និងតំបន់ជុំវិញបឹងទន្លេសាបនៃប្រទេសកម្ពុជា។
តាមរយៈសៀវភៅ ផែនការអភិវឌ្ឍន៍ផែនទីបង្ហាញផ្លូវទេសចរណ៍ គឺកាន់តែជំរុញឲ្យខេត្តបន្ទាយមានជ័យ និងខេត្តជុំវិញឲ្យក្លាយទៅជាសក្តានុពលថ្មីបន្ថែមទៀត តាមទស្សនទានមាស ស មាសបៃតង និងមាស (ផលិតកម្មស្រូវ) មានបឹងទន្លេសាប ដែលសម្បូរទៅដោយមច្ឆាជាតិ ការទស្សនាសត្វស្លាប ភូមិបណ្តែទឹក សម្បទាទេសចរណ៍ផ្សេងៗ និងហេដ្ឋារចនាសម្ព័ន្ធដែលមានការពាក់ព័ន្ធជាខ្សែក្រវ៉ាត់រួមដ៏ល្អប្រសើរ។
ការរអភិវឌ្ឍវិស័យទេសចរណ៍ ប្រកបដោយបរិយាប័ន្ន គឺដើម្បីរួមចំណែកយ៉ាងសំខាន់ ដល់ការអភិរក្សសម្បត្តិវប្បធម៌ ធម្មជាតិ ប្រវត្តិសាស្ត្រ ព្រមទាំងរក្សានិងការពារ ក្នុងការទប់ស្កាត់បម្រែបម្រួលអាកាសធាតុនៅកម្ពុជា។
ផែនការអភិវឌ្ឍន៍ផែនទីបង្ហាញផ្លូវទេសរចរណ៍ពាយ័ព្យ ឧត្តរ និងខេត្តជុំវិញបឹងទន្លេសាប គឺពិតជាកាលានុវត្តភាពថ្មី សម្រាប់វិស័យទេសចរណ៍ សម្រាប់ជាផលប្រយោជន៍រួមទាំងអ្នកទេសចរណ៍ និងវិនិយោគក្នុងវិស័យទេសចរណ៍ ដើម្បីជាប្រទីប នៃផ្នត់គំនិតថ្មីៗក្នុងការរៀបចំជាកញ្ចប់ខ្សែទស្សនកិច្ចរួម និងបង្កលក្ខណៈងាយស្រួល ដល់អ្នកទេសចរណ៍ក្នុងគោលបំណងដំណើរកម្សាន្ត តាមបណ្តាតំបន់ទាំងនេះនាពេលអនាគត៕
ដោយ៖សម្ផស្ស
