ភ្នំពេញ៖ បុរសម្នាក់បើករថយន្តស៊េរីទំនើបម៉ាក បេនលី មួយគ្រឿង រេចង្កូតជ្រុលទៅបុកខឿនផ្លូវ បណ្តាលឲ្យរងការខូចខាតរថយន្តយ៉ាងដំណំ បន្ទាប់មកមានអ្នកឡើងតាមវិទ្យុទាក់ទងចោទថា អ្នកសារព័ត៌មានជម្រិតទារលុយ ធ្វើកើតរឿងផ្អើលសមត្ថកិច្ចខណ្ឌដូនពេញ។
ហេតុការណ៍នេះកើតឡើងកាលពីវេលាម៉ោង២យប់ រំលងអធ្រាត្រឈានចូលថ្ងៃទី៣ ខែមិថុនា ឆ្នាំ២០២០ នៅចំណុចក្បែរង្វង់មូលកួចកាណុង សង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានឲ្យដឹងថា មុនកើតហេតុ គេឃើញរថយន្តមួយគ្រឿងម៉ាក បេនលី ពណ៌ខ្មៅពាក់ផ្លាកលេខភ្នំពេញ2AT-0001 បើកបរដោយបុរសម្នាក់ ធ្វើដំណើរចុះពីលើស្ពានជ្រោយចង្វាថ្មី ទិសដៅពីកើតទៅលិចឆ្ពុះទៅផ្លូវ៧០ លុះមកដល់ចំណុចកើតហេតុខាងលើ បានរេចង្កូតទៅខាងឆ្វេងដៃជ្រុលបុកខឿនផ្លូវ បណ្ដាលឲ្យខឿនផ្លូវរងការខូចខាតបន្តិចបន្តួច ចំណែករថយន្តរងការខូចខាតផ្នែកខាងមុខយ៉ាងដំណំ ។ ខណៈនោះក៏លេចមុខបុរសម្នាក់ មានព្រះនាម អាជ្ញា៩៩ បានបោះដៃតាមវិទ្យុទាក់ទងទៅខាងស្តង់ដារមិនា ថា មានអ្នកសាព័ត៌មានមួយរូប បានជម្រិតទារលុយពីម្ចាស់រថយន្តចំនួន២០០ដុល្លារ ដោយមិនមានភស្តុតាងច្បាស់លាស់ ធ្វើឲ្យអ្នកព័ត៌មានក្តៅស្លឹកត្រចៀក បានប្រើពាក្យសម្តីខ្លាំងៗដាក់គ្នាមួយប្រាវ រួចអ្នកសាព័ត៌មានទំនាក់ទំនងទៅក្រុមការងារចុះមកដល់កន្លែងកើតហេតុរួចបានសួនាំ បន្ទាប់មកខាងភាគីដែបានចោទអ្នកសារព័ត៌មានរូបនោះ បានសុំទោសជាសាធារណៈ នៅនឹងកន្លែងកើតហេតុ ដើម្បីបញ្ចប់រឿង។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ និងបានពិនិត្យនៅនឹងកន្លែងកើតហេតុ ដោយមិនមានការខូចខាតធ្ងន់ធ្ងរសមត្ថកិច្ចបានឲ្យម្ចាស់រថយន្ត ស្ទូចរថយន្តយកទៅជួសជុលដោយខ្លួនឯង៕
ដោយ៖សហការី CEN