ប្រទេសអ៊ីតាលី បានបើកឲ្យអ្នកទេសចរមកពីអឺរ៉ុបចូលលេងវិញ បន្ទាប់ពីបិទប្រទេសអស់រយៈពេល ៣ខែដោយសារវិបត្តិ COVID-19។ ការបើកឡើងវិញដោយសង្ឃឹមធ្វើឲ្យឧស្សាហកម្មទេសចរណ៍សំខាន់ៗរស់ឡើងវិញ ខណៈពេលចូលដល់រដូវក្តៅ។
ប៉ុន្តែមានការព្រួយបារម្ភថា អ្នកទេសចរបរទេសនឹងផ្អាកធ្វើដំណើរមកលេងប្រទេសអ៊ីតាលី ដែលកំពុងរងការរាតត្បាតវីរុសកូរ៉ូណាយ៉ាងខ្លាំង។
អ៊ីតាលីគឺជាប្រទេសទី ១ ក្នុងតំបន់អឺរ៉ុបដែលរងការវាយប្រហារខ្លាំងពីវីរុសកូរ៉ូណា និងមានអ្នកស្លាប់សរុបចំនួនច្រើនជាង ៣៣.០០០នាក់។
អ៊ីតាលីបានធ្វើការបិទប្រទេសនៅដើមខែមីនា ហើយចាប់តាំងពីពេលនោះ មកចំនួននៃការរាតត្បាតមានការធ្លាក់ចុះយ៉ាងខ្លាំង។
ដោយប្រទេសនេះ កំពុងប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរបំផុត ចាប់តាំងពីសង្គ្រាមលោកលើកទី ២ មក វាត្រូវការឲ្យបរទេសត្រឡប់ចូលមកកម្សាន្ត ក្នុងប្រទេសវិញ ឲ្យបានឆាប់រហ័ស ដើម្បីធ្វើឲ្យសេដ្ឋកិច្ចដំណើរការវិញ។
ប៉ុន្តែនៅតែមានការរាយការណ៍ពីអត្រាឆ្លងវីរុសថ្មីក្នុងមួយថ្ងៃ ជាពិសេសនៅតំបន់ Lombardy ហើយអ្នកជំនាញបានធ្វើការព្រមានរដ្ឋាភិបាល ពីការប្រញាប់ប្រញាល់អនុញ្ញាតឲ្យមានការធ្វើដំណើររវាងតំបន់ និងបរទេស៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
