បច្ចុប្បន្ននេះ មិនថាតែនៅក្នុងប្រទេសកម្ពុជាយើងទេ គឺនៅបណ្តាប្រទេសជាច្រើន កូនសិស្សបាននិងកំពុងជួបបញ្ហាលំបាកជាខ្លាំង ក្នុងការសិក្សានៅផ្ទះរបស់ពួកគេ (រៀនតាមអេឡិចត្រូនិក) ព្រោះថា សាលារៀនទាំងអស់ពុំទាន់ត្រូវបានអនុញ្ញាតឲ្យបើកឡើងវិញ ខណៈដែលស្ថានភាពជំងឺ Convid-19 មិនទាន់ធូរស្បើយទាំងស្រុងនៅឡើយ។
ពិតមែនហើយ សម្រាប់គ្រួសារទំនើបដែលរស់នៅមានប្រព័ន្ធអ៊ិនធើរណិត ប្រើប្រាស់គ្រប់គ្រាន់ និងលឿន នោះវាមិនសូវជាបញ្ហាប្រឈមនោះទេ ប៉ុន្តែ សម្រាប់កូនសិស្សដែលរស់នៅតាមតំបន់ជនបទដាច់ស្រយាលវិញ ដែលពុំមែនបណ្តាញអ៊ិនធឺណិតប្រើប្រាស់គ្រប់គ្រាន់ នោះជារឿងលំបាកបំផុតមួយ សម្រាប់ពួកគេ ក្នុងការសិក្សាតាមប្រព័ន្ធអេឡិចត្រូនិកដ៏ទំនើបនេះ។
តួយ៉ាងដូចជាក្មេងស្រីម្នាក់នេះ ដែលរស់នៅតំបន់ជនបទ នៅក្នុង Sarawak ប្រទេសម៉ាឡេស៊ី គឺនាងពិតជាមានការលំបាកយ៉ាងខ្លាំង។ ប៉ុន្តែ បើទោះជាអ៊ីនធើរណិត នៅតំបន់រស់នៅរបស់នាងខ្សោយខ្លាំងយ៉ាងណា ក៏មិនអាចបញ្ឈប់នាងពីការសិក្សាបានឡើយ។
តាមរយៈគណនីហ្វេសប៊ុកឈ្មោះ SMK Tinggi Sarikei បានបង្ហោះឲ្យដឹងថា ក្មេងស្រីម្នាក់ឈ្មោះ Heliyana អាយុ ១៣ ឆ្នាំ រស់នៅតំបន់ Sarikei ត្រូវបានគេប្រទះឃើញអង្គុយបញ្ឈរជង្គង់ ជាមួយដៃម្ខាងកាន់ប៊ិច និងដៃម្ខាងទៀតកាន់ទូរស័ព្ទស្មាតហ្វូន កំពុងធ្វើកិច្ចការយ៉ាងយក់ចិត្តទុកដាក់ដើម្បីបញ្ចប់វិញ្ញាសាប្រឡង នៅលើក្រដាសដាក់លើភ្លៅរបស់នាង ស្ថិតក្រោមកម្តៅថ្ងៃដ៏ក្តៅហែង ដែលមើលទៅគួរស្រណោះខ្លាំងបំផុត។
នៅពេលសួរថា តើហេតុអ្វីបានជាប្អូនស្រីមិនធ្វើកិច្ចការនៅក្នុងផ្ទះជំនួស នាងបានឆ្លើយយ៉ាងដូច្នេះថា៖ «អ៊ីនធើរណិតនៅក្នុងផ្ទះពុំអាចប្រើបាននោះទេ ដើរយឺតណាស់ ពោលគឺពុំអាចប្រើបានតែម្តង ហេតុនេះ ខ្ញុំក៏បង្ខំចិត្តចេញមកខាងក្រៅ ដើម្បីបញ្ចប់កិច្ចការសាលា និងក៏ដូចជារៀនមេរៀនផ្សេងៗ តាមរយៈប្រព័ន្ធអេឡិចត្រូនិចនេះ»។
ទោះយ៉ាងណា មិនមែនតែ Heliyana ម្នាក់ទេ ដែលជួបបញ្ហានេះ ព្រោះថា នៅមានកូនសិស្សជាច្រើនទៀត នៅក្នុងតំបន់របស់នាង ក៏កំពុងប្រឈមមុខនឹងការលំបាកក្នុងការព្យាយាមទទួលយកបទដ្ឋានថ្មី នៃការរៀនតាមអេឡិចត្រូនិកនេះដែរ ដោយសារតែបញ្ហាកង្វះអ៊ិនធើរណិតប្រើប្រាស់៕
ប្រែសម្រួល៖ លឹម ហុង (ប្រភព៖ worldofuzz)