ខេត្តស្វាយរៀងៈ លោកស្រី ដួង វណ្ណា អ្នកតំណាងរាស្ត្រមណ្ឌលស្វាយរៀង តំណាងលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកស្រី ហៅ ច័ន្ទសិរីទេពី ចៅ ភិរុណ អនុប្រធានសមាគមន៍នារីដើម្បីអភិវឌ្ឍន៍ខេត្ត កាលពី ថ្ងៃទី២ ខែមិថុនា ឆ្នាំ២០២០ នៅសាលាស្រុកស្វាយជ្រំ បានធ្វើពិធីសំណេះសំណាលជាមួយ ក្រុមប្រឹក្សា គណៈអភិបាល និងមន្ត្រីរាជការ មន្ត្រីរាជការ ក្នុងស្រុកស្វាយជ្រំ សរុបចំនួន ៩០ នាក់ ។
លោក ហែម សារិទ្ធ អភិបាលស្រុកស្វាយេជ្រំ បានឲ្យដឹងថា បច្ចុប្បន្ននេះ អាជ្ញាធរស្រុក រួមជាមួយប្រជាជនក្នុងមូលដ្ឋាន បានសហការជាមួយមណ្ឌលសុខភាព ក៏ដូចជាអង្គភាពពាក់ព័ន្ធនានា បានចុះផ្សព្វផ្សាយសេចក្តីណែនាំ និងបទបញ្ជារបស់រាជរដ្ឋាភិបាលកម្ពុជា ដើម្បីបង្ការទប់ស្កាត់ ប្រយុទ្ធប្រឆាំងជំងឺកូវីដ-១៩ បានល្អប្រសើរ ។
លោក ហែម សារិទ្ធ បានបន្តថា នៅក្នុងមូលដ្ឋានស្រុក ធានាបានទាំងស្រុងនូវការការពារឆ្លងជំងឺកូវីដ ១៩ ដោយសារបងប្អូនប្រជាជនមានការយល់ដឹង ប្រុងប្រយ័ត្នខ្ពស់ ផ្តើមចេញពីខ្លួនយើងគ្រប់ៗរូប ។
ក្នុងពិធីសំណេះសំណាលនេះ លោកស្រី ដួង វណ្ណា អ្នកតំណាងរាស្ត្រមណ្ឌលស្វាយរៀង បានថ្លែងការកោតសរសើរចំពោះក្រុមការងារ អាជ្ញាធរ និងក្រុមប្រឹក្សាស្រុកទាំងអស់ ដែលបានចូលរួមយ៉ាងសកម្ម ជាមួយរាជរដ្ឋាភិបាលកម្ពុជា ក្នុងការទប់ស្កាត់ និងការពារសុខភាពរបស់ប្រជាជន ខណៈដែលពិភពលោកកំពុង ទទួលរងគ្រោះដោយជំងឺរាលត្បាតកូវីដ-១៩ ។
លោកស្រី បានបន្តថា បើទោះជាតួរលេខដែលបង្ហាញដោយក្រសួងសុខាភិបាល បញ្ជាក់ពីការថយចុះ និងការព្យាបាលជាអស់ជាង ១០០ ករណីនៃអ្នករងផលប៉ះពាល់នៅកម្ពុជាក៏ដោយ តែជំងឺនេះមិនទាន់ផុតរលត់ពីផែនដីនៅឡើយទេ រីឯវ៉ាក់សាំងការពារ ក៏អង្គការសុខភាពពិលោក បញ្ជាក់យ៉ាងណានៅឡើយដែរ ដូចនេះយើងត្រូវរួមគ្នាអនុវត្តបន្តទៀត ទៅតាមការណែនាំរបស់ក្រសួងសុខាភិបាល ដូចជាលាងដៃ ពាក់ម៉ាស់ការពារ ហើយបើមិនចាំបាច់មិនត្រូវជួបជុំគ្នា មានមនុស្សច្រើននោះទេ គឺនៅផ្ទះទើបល្អ ។
ជាមួយគ្នានោះ លោកស្រី ដួង វណ្ណា ក៏បាននាំមកនូវការផ្តាំផ្ញើសាកសួរសុខទុក្ខពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៍ដូចជាលោកជំទាវកិត្តិសង្គហបណ្ឌិត ម៉ែន សំអន ប្រធានក្រុមការងាររាជរដ្ឋាភិបាលកម្ពុជា ចុះជួយខេត្តស្វាយរៀង ផ្ញើជូនបងប្អូន ប្រជាជននៅក្នុងខេត្តស្វាយរៀង ប្រកបក្តីនឹករលឹក និងបានជំរុញឲ្យក្រុមការងារទាំងអស់ ចុះតាមដានពីបញ្ហសុខភាព និងជីវភាពរស់នៅរបស់បងប្អូន ដោយមិនទុកឲ្យនរណាម្នាក់ ខ្វះខាតស្បៀង ដោយយើងមិនបានដឹងនោះឡើយ ។
ក្នុងពិធីនោះដែរលោកស្រីបានផ្តល់ជូនដល់ ក្រុមប្រឹក្សា គណៈអភិបាល មន្ត្រីរាជការ ចំនួន ៩០ នាក់ ក្នុងម្នាក់ទទួលបាន អង្ករ ១០ គីឡូក្រាម មី ២៥ កញ្ចប់ ស្ករស ១ គីឡូក្រាម ថវិកា ៣០.០០០ រៀល ផងដែរ ៕
ដោយ៖ វ៉ៃកូ