កោះកុង៖ ករណីចាប់ឃាត់កង់យុវជនមួយក្រុមនៅស្រុកកោះកុង ខេត្តកោះកុង ត្រូវបានមន្ត្រីមួយរូបបង្ហើបប្រាប់ថា ដោយសារតែ យុវជនទាំងនោះជាសកម្មជន អង្គការ មាតាធម្មជាតិ ដែលជិះហែរជាក្បួនមកភ្នំពេញ មិនមានលិខិតអនុញ្ញាតពីអាជ្ញាធរ ដែលធ្វើសកម្មភាពទាមទារឱ្យមានការសង្គ្រោះតំបន់កោះកុងក្រៅ នៃខេត្តកោះកុង ឱ្យដាក់ជាតំបន់ការពារ។ ដែលករណីនេះ ក្រសួងបរិស្ថានបានហៅក្រុមសកម្មជន អង្គការ មាតាធម្មជាតិ គ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិត។
មន្ត្រីរូបនោះបានឲ្យដឹងទៀតថា បើជិះកង់ជាក្រុមហាត់ប្រាណដើម្បីសុខភាព គ្មានអ្នកណាឃាត់ឃាំងនោះទេ ដូច្នេះសូមបងប្អូនកុំយល់ច្រលំទៀត ។
ពាក់ព័ន្ធនឹងករណីខាងលើនេះ នៅថ្ងៃទី៣ខែមិថុនាឆ្នាំ២០២០នេះ ក្រសួងបរិស្ថាន បានសេចក្តីប្រកាសព័ត៌មាន សូមសម្តែងការសោកស្តាយ ចំពោះក្រុមជនមួយចំនួនតូច ដែលចេញមកសម្តែង ធ្វើជាអ្នកការពារបរិស្ថាន ដោយបានធ្វើសកម្មភាពទាមទារ ឱ្យមានការសង្គ្រោះតំបន់កោះកុងក្រៅ នៃខេត្តកោះកុង ឱ្យដាក់ជាតំបន់ការពារ។ នេះគ្រាន់តែជាលេស ដើម្បីបិទបាំងនូវឧបាយកលនយោបាយទុច្ចរិត ដែលស្ថិតក្រោមការរៀបចំមួយ ដ៏ច្បាស់លាស់ប៉ុណ្ណោះ។
ក្រសួងបរិស្ថាន សូមគូសបញ្ជាក់ថា ទោះបីជាគ្មានយុទ្ធនាការ ឬការទាមទារណាមួយក៏ដោយ ក៏រាជរដ្ឋាភិបាលកម្ពុជា តាមរយៈក្រសួងបរិស្ថាន បានយកចិត្តទុកដាក់ខ្ពស់ លើការងារការពារ និងអភិរក្សតំបន់កោះកុងក្រៅនេះ ដោយបានបញ្ជូនក្រុមមន្ត្រីជំនាញ បានធ្វើការសិក្សាស្រាវជ្រាវ រៀបចំឯកសារ និងទិន្នន័យផ្សេងៗ ទាក់ទងនឹងតំបន់កោះកុងក្រៅនេះ តាំងពីឆ្នាំ ២០១៦ មកម្ល៉េះ ដើម្បីដាក់តំបន់នេះ ជា «ឧទ្យានជាតិសមុទ្រ» ព្រោះតំបន់នេះសម្បូណ៍ដោយសក្តានុពល ផ្នែកធនធានធម្មជាតិ និងជីវចម្រុះ និងមានឆ្នេរខ្សាច់ល្អស្រស់ស្អាត ដែលត្រូវការពារនិងអភិរក្ស។ នៅក្នុងគម្រោងផែនការ ក្រសួង បរិស្ថាន រំពឹងថា នឹងអាចប្រកាសតំបន់កោះកុងក្រៅនេះជា «ឧទ្យានជាតិសមុទ្រ» អំឡុងឆ្នាំ ២០២១ ខាងមុខនេះ ក្រោយការបញ្ចប់ការសិក្សារួចរាល់។
ក្រសួងបរិស្ថាន សង្ឃឹមថា ក្រុមជនមួយចំនួនតូចនេះ នឹងយល់ដឹងកាន់តែច្បាស់ ហើយខិតខំរៀនធ្វើការរួមគ្នា ប្រកបដោយភាពស្មោះត្រង់ ជាមួយអាជ្ញាធរពាក់ព័ន្ធ ដើម្បីបុព្វហេតុបរិស្ថាន និងធនធានធម្មជាតិ ហើយជៀសវាងការបង្កើតឆាកល្ខោនសម្តែង និងធ្វើអាជីវកម្ម ដើម្បីកេងចំណេញនយោបាយ។
ទោះយ៉ាងណា ក្រុមយុវជន បានលើកឡើងប្រាប់កាសែតក្នុងស្រុកមួយថា អាជ្ញាធរ និងសមត្ថកិច្ចខេត្តកោះកុង បង្ហាញរូបភាពបំបិទសិទ្ធិសេរីភាពរបស់ពលរដ្ឋ ដែលផ្តល់សេរីភាព ជូនពលរដ្ឋគ្រប់រូប ក្នុងការចូលរួមថែរក្សាធនធានធម្មជាតិ។ ការលើកឡើងនេះ ក្រោយពេលអាជ្ញាធរខេត្តកោះកុង បានហាមឃាត់ និងចាប់យកកង់របស់ក្រុមយុវជន ដែលជាមធ្យោបាយធ្វើដំណើរ ដោយជិះកង់ពីខេត្តនេះឡើងមកភ្នំពេញ ដើម្បីយកញត្តិមកដាក់ជូនសម្តេចនាយករដ្ឋមន្ត្រី ហ៊ុន សែន ស្នើឱ្យដាក់តំបន់កោះកុងក្រៅ ជាតំបន់អភិរក្សធម្មជាតិ ឬតំបន់ឧទ្យានជាតិសមុទ្រ។
អ្នកសម្របសម្រួលយុទ្ធនាការជិះកង់ម្នាក់ កញ្ញា រ៉ី រក្សា ប្រាប់កាសែតក្នុងស្រុកថា យុទ្ធនាការជិះកង់ទាមទារឱ្យរដ្ឋាភិបាលដាក់តំបន់កោះកុងក្រៅជាតំបន់អភិរក្សធម្មជាតិសមុទ្រជាផ្លូវការ ត្រូវបានអាក់ខាន ដោយសារអាជ្ញាធរហាមឃាត់ និងចាប់យកកង់របស់ពួកគាត់ចំនួន ១០គ្រឿងទៅរក្សាទុកនៅអធិការស្រុកកោះកុង។ បើទោះបីជាអាជ្ញាធរ ចាប់យកកង់របស់ពួកគាត់ក៏ដោយ ប៉ុន្តែ ពួកគាត់នៅតែបន្តយកញត្តិមកដាក់ជូនរដ្ឋាភិបាលនៅភ្នំពេញដដែល ដោយគ្រាន់តែប្តូរពីការជិះកង់ មកជាការធ្វើដំណើរដោយថ្មើរជើងវិញ។
យុទ្ធនាការជិះកង់នេះ មានយុវជនជិត ២០នាក់ គ្រោងធ្វើរយៈពេល ៤ថ្ងៃ ចាប់ពីថ្ងៃទី២ ខែមិថុនា ដល់ថ្ងៃទី៥ ខែមិថុនា ដោយចេញដំណើរពីទីរួមខេត្តកោះកុង ឆ្ពោះមកកាន់រាជធានីភ្នំពេញ។ ក្នុងការធ្វើដំណើរចេញពីទីរួមខេត្តកោះកុងប្រមាណ ៥០គីឡូម៉ែត្រម្សិលមិញនោះ ពុំមានការរំខានពីសំណាក់សមត្ថកិច្ចនោះឡើយ៕
ដោយ៖កូឡាប
