ភ្នំពេញ៖ សម្តេចពិជ័យសេនា ទៀ បាញ់ បានថ្លែងថា នឹងមានការរៀបចំកសាងបន្ថែមទៀតនៅតំបន់សមិទ្ធផល ក្នុងវិមានឈ្នះ ឈ្នះ នៅផ្នែកខាងជើង ដូចជា សួនសមិទ្ធផលថ្មីចំនួន៤ ត្រូវធ្វើឲ្យហើយ ដើម្បីប្រារព្ធពិធីសម្ពោធនៅថ្ងៃទី២៩ ខែធ្នូ ឆ្នាំ២០២០ ខាងមុខនេះ ដើម្បីលើកពីគុណ តម្លៃនៃនយោបាយឈ្នះ ឈ្នះ ដែលបាននាំមកនូវការបញ្ចប់សង្គ្រាម និងនាំមកនូវសន្តិភាពពេញលេញទូទាំងប្រទេស ក្នុងពេលដែលវិមានឈ្នះ ឈ្នះ បានសាងសង់រួចរាល់ហើយ ។
គណៈកម្មការសាងសង់វិមានឈ្នះ ឈ្នះ នៅព្រឹកថ្ងៃទី៣ ខែមិថុនា ឆ្នាំ២០២០ បានប្រជុំពិក្សាការងារ ដើម្បីឆ្លងផែនការសាងសង់សួនសមិទ្ធផល ក្នុងវិមានឈ្នះ ឈ្នះ ដែលកិច្ចប្រជុំនេះបានប្រព្រឹត្តិទៅក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការសាងសង់វិមានឈ្នះ ឈ្នះ និងមានការចូលរួមពីសមាជិកគណៈកម្មការសាងសង់វិមានឈ្នះ ឈ្នះ មកពីបណ្តា ស្ថាប័នក្រសួងស៊ីវិល និងកងឯកភាពនានា ក្នុងក្រសួងការពារជាតិ និងអគ្គបញ្ជាការជាច្រើនរូបទៀត។
ថ្លែងបើកកិច្ចប្រជុំ សម្តេចពិជ័យសេនា ទៀ បាញ់ បានមានប្រសាសន៍លើកឡើងពីការងារដែលត្រូវធ្វើបន្ត បន្ថែមទៀត នៅវិមានឈ្នះ ឈ្នះ ជាពិសេសការរៀបចំកសាងបន្ថែមទៀតនៅតំបន់សមិទ្ធផល ក្នុងវិមានឈ្នះ ឈ្នះ នៅផ្នែកខាងជើង ក្នុងពេលដែលវិមានឈ្នះ ឈ្នះ បានសាងសង់រួចរាល់ហើយ នូវតំបន់សុខដុមណីយកម្មប្រវត្តិសាស្ត្រខ្មែរ នៅផ្នែកខាងត្បូងនៃវិមាន។ សម្តេចពិជ័យសេនា បានបញ្ជាក់ទៀតថា៖ ដើម្បីអបអរសាទរទិវានយោបាយឈ្នះ ឈ្នះ ថ្ងៃ២៩ ខែធ្នូ ឆ្នាំ២០២០នាពេលខាងមុខ សួនសមិទ្ធផលថ្មីចំនួន៤ ដែលនឹងត្រូវសាងសង់នៅវិមានឈ្នះ ឈ្នះ នេះ ត្រូវធ្វើអោយហើយ ដើម្បីប្រារព្ធពិធីសម្ពោធនៅថ្ងៃទី២៩ ខែធ្នូ ឆ្នាំ២០២០ ខាងមុខនេះ ដែលពិធីអបអរសាទរទិវានយោបាយឈ្នះ ឈ្នះ នេះត្រូវប្រារព្ធធ្វើជារៀងរាល់ឆ្នាំ នាថ្ងៃទី២៩ ខែធ្នូ ដើម្បីលើកពីគុណ តម្លៃនៃនយោបាយឈ្នះ ឈ្នះ ដែលបាននាំមកនូវការបញ្ចប់សង្គ្រាម និងនាំមកនូវសន្តិភាពពេញលេញទូទាំងប្រទេស។
ក្នុងឱកាសនោះ ឯកឧត្តម នាយឧត្តមសេនីយ៍ ណឹម សុវត្ថិ ទីប្រឹក្សាពិសេសសម្តេចពិជ័យសេនា ជាអគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ និងជាប្រធានក្រុមការងារសិក្សាស្រាវជ្រាវសាងសង់វិមានឈ្នះ ឈ្នះ និងប្រវត្តិសាស្ត្រយោធា បានជំរាបជូនកិច្ចប្រជុំអំពីការគ្រប់គ្រង ថែទាំវិមានឈ្នះ ឈ្នះ ក្នុងអំឡុងពេលប្រឈមមុខនឹងការឆ្លងរាលដាលជំងឺកូវីដ ១៩ ក្នុងនោះក្រុមការងារ វិមានឈ្នះឈ្នះបានធ្វើការថែទាំ ជួសជុល កែសម្រួលនូវប្រព័ន្ធនានា ដូចជាទឹក ភ្លើង និងរូបភាព ក្នុងសារមន្ទីរ ដើម្បីបម្រើជូនដល់ប្រជាពលរដ្ឋទស្សនា និងការសិក្សាស្រាវជ្រាវ ពីព្រោះវិមានឈ្នះ ឈ្នះ បានលើកកម្ពស់គោលនយោបាយឈ្នះ ឈ្នះ ដែលបាននាំមកនូវសុខសន្តិភាព ជូនជាតិមាតុភូមិកម្ពុជា។ ឯកឧត្តម បានជម្រាបដល់កិច្ចប្រជុំ អំពីការចុះសិក្សាស្រាវជ្រាវនៅតាមតំបន់ប្រវត្តិសាស្ត្រយោធាមួយចំនួន ដោយធ្វើដំណើរតាមរថយន្ត មូតូ និងថ្មើរជើង ដោយបានប្រមូលផ្តុំនូវ ឯកសារ ព័ត៌មាន និង តឹកតាង ជាច្រើន ដែលតំបន់ប្រវត្តិសាស្ត្រយោធាទាំងនោះ បានតភ្ជាប់ទៅនឹងនយោបាយឈ្នះ ឈ្នះ រួមនិងសមិទ្ធិផលឈ្នះ ឈ្នះ នាពេលបច្ចុប្បន្ន។
កិច្ចប្រជុំនាឱកាសនោះ ក៏បានធ្វើការពិភាក្សា ឆ្លងនូវសួនសមិទ្ធផលតេជោ ចំនួន ៤ ដែលត្រូវសាងសង់នៅវិមានឈ្នះ ឈ្នះផងដែរ។ ការសាងសង់សួនសមិទ្ធផលនៅវិមានឈ្នះ ឈ្នះ ដើម្បីរំលេចគ្រប់វិស័យសំខាន់ៗ ស្របតាមយុទ្ធសាស្ត្រចតុកោណរបស់រាជរដ្ឋាភិបាល ដែលផ្ដោតទៅលើកំណើនការងារ សមធម៌ និងប្រសិទ្ធភាពក្នុងប្រទេសកម្ពុជា ដែលសមទ្ធផលទាំងនេះ បានកើតចេញពីនយោបាយឈ្នះ ឈ្នះ។ សួនសមិទ្ធផលតេជោទាំង ៤ នោះរួមមាន៖ ទី១.សួនប្រវត្តិកាលស្ថាបត្យកម្មវិមានឈ្នះឈ្នះ ដែលបានរៀបចំសាងសង់ដោយក្រុមការងារវិមានឈ្នះ ឈ្នះ, ទី២.សួនការពារជាតិនៃ ខ.ភ.ម ដែលរៀបចំសាងសង់ដោយ អគ្គបញ្ជាការ នៃ ខ.ភ.ម, ទី៣. សួនសន្តិសុខសុវត្ថិភាព និងសណ្តាប់ធ្នាប់សង្គម ដែលរៀបចំកសាងដោយ កងរាជអាវុធហត្ថលើផ្ទៃប្រទេស រួមសហការជាមួយអគ្គស្នងការនគរបាលជាតិ និងទី៤.សួនរក្សាសន្តិភាព និងបោសសំអាតមីននៅកម្ពុជា ដែលត្រូវរៀបចំកសាងមជ្ឈមណ្ឌលរក្សាសន្តិភាព អិន ភី ម៉ិក (NPMEC) និងមជ្ឈមណ្ឌលសកម្មភាពកំចាត់មីនកម្ពុជាស៊ីម៉ាក់ (CMAC)។
ក្នុងមតិបូកសរុបបិទកិច្ចប្រជុំ សម្តេចពិជ័យសេនា ទៀ បាញ់ បានណែនាំដល់ការរៀបចំសាងសង់សួនសមិទ្ធផលទាំង ៤ នៅវិមានឈ្នះ ឈ្នះ ត្រូវធ្វើយ៉ាងណារាល់ការសាងសង់ ត្រូវធ្វើឲ្យមានរចនាបទលក្ខណៈវប្បធម៌ខ្មែរ ពិសេសត្រូវរំលេចនូវអត្តសញ្ញាណនយោបាយឈ្នះ ឈ្នះ ដែលជានិមិត្តរូបនៃសន្តិភាព ហើយរាល់វត្ថុធាតុដើមសាងសង់ត្រូវធានាឲ្យបាននូវភាពរឹងមាំ បានយូរអង្វែង ៕
ដោយ៖កូឡាប
