ទីក្រុងវ៉ាស៊ីនតោន នៅថ្ងៃពុធបានបញ្ជាឲ្យមានការផ្អាកការហោះហើរទាំងអស់ របស់ក្រុមហ៊ុនអាកាសចរណ៍ចិន ចូលក្នុង និងចេញក្រៅអាមេរិច ក្រោយពេលទីក្រុងប៉េកាំង មិនបានអនុញ្ញាតឲ្យក្រុមហ៊ុនអាកាសចរណ៍អាមេរិច បន្តការហោះហើរទៅកាន់ប្រទេសចិន។
វិធានការនេះ របស់អាមេរិចបានបន្ថែមភាពតានតឹង ដែលកំពុងតែក្តៅស្រាប់រវាងមហាអំណាចសេដ្ឋកិច្ចទាំងពីរ ជុំវិញវិបត្តិកូរ៉ូណា។
វិធានការអាមេរិច នឹងចូលជាធរមាននៅថ្ងៃទី ១៦ ខែមិថុនានេះ ប៉ុន្តែវាអាចនឹងអនុវត្តបានលឿន ប្រសិនជាប្រធានាធិបតីអាមេរិច ដូណាល់ ត្រាំ បញ្ជាឲ្យធ្វើវា។ ការចាត់វិធានការនេះ ប៉ះពាល់ដល់ក្រុមហ៊ុនអាកាសចរណ៍ចិនចំនួន ៤រួមមាន ក្រុមហ៊ុន Air China និងChina Eastern Airlines ជាដើម។ នេះបើតាមការបញ្ជាក់របស់ក្រសួងដឹកជញ្ជូនអាមេរិច។
ក្រសួងថ្លែងក្នុងសេចក្តីប្រកាសថា “ក្រុមហ៊ុនអាកាសចរណ៍អាមេរិច បានស្នើឲ្យមានការបន្តសេវាដឹកអ្នកដំណើរវិញ នៅថ្ងៃទី ១ ខែមិថុនា។ ការខកខានរបស់រដ្ឋាភិបាលចិន ក្នុងការអនុម័តសំណើរនោះ គឺជាការរំលោភកិច្ចព្រមព្រៀងដឹកជញ្ជូនរបស់ពួកយើង”។
ក្រុមហ៊ុនអាកាសចរណ៍អាមេរិច បានកាត់បន្ថយ ឬផ្អាកផ្តល់សេវាកម្មហោះហើរយ៉ាងច្រើន ទៅកាន់ប្រទេសចិន ចំពេលមានការផ្ទុះវីរុសកូរ៉ូណា។ ក្រុមហ៊ុនអាកាសចរណ៍ United និង Delta បានដាក់សំណើរនៅដើមខែឧសភា សុំបន្តការហោះហើរ ប៉ុន្តែមិនទទួលបានការអនុញ្ញាតពីអាជ្ញាធរអាកាសចរណ៍ចិនឡើយ។
សូមបញ្ជាក់ថា កាលពីដើមខែមករា ឆ្នាំ ២០២០ មុនពេលមានការផ្ទុះវីរុស ក្រុមហ៊ុនអាកាសចរណ៍អាមេរិច និងចិនមានការហោះហើរចំនួន ៣២៥ដងជារឿងរាល់សប្តាហ៍ រវាងប្រទេសទាំងពីរ។
ជម្លោះដែនអាកាសរវាងមហាអំណាចទាំងពីរកើតឡើង ក្រោយពេលអាមេរិចបានដាក់ការរឹតបន្តឹង លើក្រុមហ៊ុនទូរគមនាគមន៍ចិន Huawei និងបានបញ្ជាឲ្យមានការស៊ើបអង្កេត លើសកម្មភាពរបស់ក្រុមហ៊ុនចិន ដែលបានចុះបញ្ជីនៅក្នុងទីផ្សារហិរញ្ញវត្ថុអាមេរិច។
ដូណាល់ ត្រាំចោទចិនថាគ្រប់គ្រងវីរុសមិនបានល្អ ជាហេតុធ្វើឲ្យមានការផ្ទុះខ្លាំងដល់អាមេរិច និងបានវាយប្រហារចិន កាលពីសប្តាហ៍មុនជុំវិញច្បាប់សន្និសុខជាតិ ដែលចិនស្នើសម្រាប់ទីក្រុងហុងកុង៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
