ភ្នំពេញ៖ កាលពីពេលថ្មីៗនេះ គ្រប់គ្នានៅលើបណ្តាញសង្គម ពិតជាសម្តែងនូវក្តីអាណិតអាសូរជាពន់ពេកក្រៃ បន្ទាប់ពីបានឃើញព្រះតេជគុណមួយអង្គ ព្រះនាម Som Nang បានបង្ហោះវីដេអូចំនួន៣ បង្ហាញពីសកម្មភាពប្អូនប្រុសៗប៉ុន្មាននាក់ ដែលមានមុខរបរស៊ីឈ្នួលជញ្ជូនស៊ីម៉ងត៍ឡើងភ្នំត្បែង ក្នុងចម្ងាយផ្លូវជិត២គីឡូម៉ែត្រ ដែលមើលទៅពិតជាសង្វែកខ្លាំងមែនទែន។
ទាក់ទងនឹងមុខរបរស៊ីឈ្នួលជញ្ជូនស៊ីម៉ងត៍នេះផងដែរ បើតាមប្អូនប្រុសម្នាក់ក្នុងចំណោមនោះ បានប្រាប់ព្រះសង្ឃខាងលើឲ្យដឹងថា ជញ្ជូនស៊ីម៉ងត៍ឡើងភ្នំ១ការ៉ុង (៥០ គីឡូក្រាម) បាន២ម៉ឺនរៀល ហើយក្នុងថ្ងៃពួកគាត់អាចជញ្ជូនបានតែ២ជើងប៉ុណ្ណោះ ។ ប្អូនប្រុសរូបនោះបន្តថា ពួកគាត់ជញ្ជូនតាំងពីខាងក្រោម ឡើងដល់ថ្នាក់មួយនៃភ្នំ ដែលត្រូវឆ្លងកាត់កាំជណ្តើរជាង១ពាន់កាំ និងបន្តជញ្ជូនដែលមានចម្ងាយផ្លូវជាង១គីឡូម៉ែត្រទៀត ទើបទៅដល់គោលដៅ។
ក្រោយពីបានឃើញវីដេអូនេះ ត្រូវបានចែករំលែក ធ្វើឲ្យមហាជនយ៉ាងច្រើន បានសម្តែងនូវក្តីអាណិត ស្រណោះដល់ប្អូនៗជាខ្លាំង ព្រោះថាមើលទៅពួកគាត់ពិតជាហត់ខ្លាំងណាស់ សឹងដកដង្ហើមពុំដល់គ្នាតែម្តង។ ពិតមែនហើយ គ្រាន់តែយើងឡើងតែខ្លួនទទេ នោះយើងសឹងតែពុំអាចយោងអាត្មាខ្លួនសឹងរួច ចុះទម្រាំពួកគាត់វិញ តើវេទនាប៉ុណ្ណាទៅ!!។
ក្នុងនោះផងដែរ អ្នកជំនាញថតរូបម្នាក់ ព្រោះតែមានក្តីអាណិតអាសូរខ្លាំង នៅថ្ងៃទី២ ខែមិថុនា ឆ្នាំ២០២០ គាត់ក៏បាននាំថវិកា និងគ្រឿងបរិភោគមួយចំនួន ដែលមកពីសប្បុរសជននានា យកទៅជូនគ្រួសារពួកគាត់ដល់ផ្ទះ ដើម្បីដោះទ័លការលំបាកបានមួយគ្រាផងដែរ។
នេះបើយោងតាមគណនីហ្វេសប៊ុកឈ្មោះ Seyla Main បានបង្ហោះរូបភាពនៃការធ្វើអំពើសម្បុរសធម៌ ទៅដល់គ្រួសារប្អូនៗជញ្ជូនស៊ីម៉ងត៍ឡើងភ្នំដ៏កម្សត់ខាងលើ ដោយភ្ជាប់សាររៀបរាប់យ៉ាងក្តុកក្តួលថា៖ «ជម្រាបជូនដល់ពុកម៉ែបងប្អូនឥឡូវនេះ ខ្ញុំបានមកដល់ផ្ទះរបស់ប្អូនប្រុសហើយ គាត់ពិតជាកម្សត់មែន។ អរគុណដល់ម្ចាស់ជំនួយធំៗ ជូនពរឲ្យមានសេចក្តីសុខ រកស៊ីមានបានសុំឲ្យមានសេចក្តីសុខ ទាំងដើរ សុខទាំងដេកសុខទាំងអង្គុយ សុខគ្រប់ប្រការ។
សូមបញ្ជាក់ដល់បងប្អូនទាំងអស់គ្នាឲ្យបានជ្រាប់ថា ប្អូនប្រុសមិនអាចមករៀន និងនៅជាមួយខ្ញុំបាទបានទេ មូលហេតុ ដោយប្អូនប្រុសមានប្រពន្ធកូនដល់ទៅពីរនាក់ អ៊ីចឹងហើយប្អូនបានបដិសេធមកមិនបានទេ។ សូមជួយShare ដើម្បីឲ្យបានបងប្អូនជួយពួកគាត់ជាបន្តទៀតផង ពួកគាត់មានជីវភាពពិបាកណាស់ នៅថ្ងៃមិញជួយបាន៤នាក់» ៕
ដោយ៖ លឹម ហុង
