ប្រទេសកូរ៉េខាងជើង បានដឹកធ្យូងថ្មទៅកាន់ប្រទេសរុស្សីកាលពីឆ្នាំមុន បន្ទាប់មកធ្វើការចែកចែកបន្តទៅលក់ក្នុងប្រទេសជប៉ុន និងកូរ៉េខាងត្បូង ដែលនេះជាការល្មើសទៅនឹងទណ្ឌកម្មរបស់អង្គការសហប្រជាជាតិ។ នេះបើតាមប្រភពស៊ើបអង្កេតរបស់អ៊ឺរ៉ុបខាងលិច។
កាលពី ខែសីហា ឆ្នាំមុន អង្គការសហប្រជាជាតិហាមដាក់ទណ្ឌកម្មលើកូរ៉េខាងជើង ដោយហាមមិនឲ្យរដ្ឋកុម្មុនិស្តនេះ នាំចេញធ្យូងថ្ម ក្នុងគោលបំណងកាលផ្តាច់ប្រភពចំណូលដ៏សំខាន់ ដែលប្រទេសនេះប្រើប្រាស់ដើម្បីចាយលើកម្មវិធីអាវុធនុយក្លេអ៊ែរ និងមីស៊ីលរបស់ខ្លួន។
ទោះយ៉ាងណាក៏ដោយ ប្រទេសផ្តាច់ការនេះនៅតែអាចនាំចេញធ្យូងថ្មទៅលក់ក្រៅប្រទេសបានដោយសម្ងាត់ ហើយបើតាមការស៊ើបអង្កេតបានឲ្យដឹងថា កូរ៉េខាងជើងបានដឹកធ្យូងថ្មទៅកាន់កំពង់ផែរុស្សីចំនួន ៣ដង ចាប់តាំងពីទទួលរងទណ្ឌកម្ម។
ប្រភពបញ្ជាក់ថា កូរ៉េខាងជើងបានដឹកធ្យូងថ្ម ទៅកំពុងផែ Nakhodka និង Kholmsk រួចហើយដឹកចូលកូរ៉េខាងត្បូង ឬក៏ជប៉ុន។ សកម្មភាពធ្វើពាណិជ្ជកម្មធ្យូងថ្ម ដោយឆ្លងកាត់ប្រទេសរុស្សី នៅតែបន្តកើតមានដដែល៕ សុភ័ក្ត្រ