មេដឹកនាំតៃវ៉ាន់ អ្នកស្រី Tsai Ing-wen នៅថ្ងៃព្រហស្បតិ៍នេះ បានស្នើឲ្យប្រទេសចិនទទួលស្គាល់ជាផ្លូវការនូវការបង្ក្រាបបង្ហូរឈាមរបស់កងទ័ពចិនទៅលើក្រុមបាតុករ នៅទីលាន Tiananmeng កាលពីឆ្នាំ ១៩៨៩ ខណៈដែលកោះតៃវ៉ាន់បានធ្វើពិធីរំលឹកខួបលើកទី ៣១នៃព្រឹត្តិការណ៍នោះ។
និស្សិតរាប់ពាន់នាក់បានស្លាប់ ក្នុងអំឡុងការបង្ក្រាបរបស់បក្សកុម្មុយនិស្តចិន ដែលពួកគេបានធ្វើការតវ៉ាទាមទារឲ្យមានកំណែទម្រង់លទ្ធិប្រជាធិបតេយ្យ។
ប៉ុន្តែការពិភាក្សាគ្នាជាចំហរនៃហេតុការណ៍បង្ហូរឈាមនោះ ត្រូវបានគេហាមឃាត់នៅក្នុងប្រទេសចិន។
ប្រធានាធិបតីតៃវ៉ាន់ អ្នកស្រី Tsai Ing-wen បាននិយាយក្នុង Twitterថា “នៅក្នុងពិភពលោក មានចំនួន ៣៦៥ថ្ងៃក្នុងមួយឆ្នាំ ប៉ុន្តែនៅចិន មួយថ្ងៃ ក្នុងចំណោមថ្ងៃទាំងនោះត្រូវបានគេបំភ្លេចចោលជារៀងរាល់ឆ្នាំ”។
អ្នកស្រីថ្លែងថា ទីក្រុងប៉េកាំងត្រូវតែប្រឈមនឹងកេរ្តិ៍ដំណែលនៃហេតុការណ៍នោះ ដូចដែរតៃវ៉ាន់ដែលមានអំណាចផ្តាច់ការពីអតីតកាល មុនពេលវាបានផ្លាស់ប្តូរមកជាប្រជាធិបតេយ្យក្នុងឆ្នាំ ១៩៩០។
“មានមួយថ្ងៃដែលយើងបាត់ពីប្រតិទិន ប៉ុន្តែពួកយើងបានធ្វើកិច្ចការដើម្បីនាំយកវាមកវិញ។ ខ្ញុំសង្ឃឹមថា ថ្ងៃមួយចិននឹងនិយាយដូចគ្នា”។
ការថ្លែងរបស់អ្នកស្រីកើតឡើងតែមួយថ្ងៃប៉ុណ្ណោះ ក្រោយពេលក្រុមប្រឹក្សាកិច្ចការចិនបានស្នើឲ្យទីក្រុងប៉េកាំងផ្តល់ការសុំទោសដ៏ស្មោះត្រង់ ជុំវិញការបង្ក្រាបនៅទីលានធានអានមែន (Tiananmen)។
ក្រសួងការបរទេសចិនបានចំអកចំពោះការអត្ថាធិប្បាយនោះ ដែលអ្នកនាំពាក្យឈ្មោះ Zhao Lijian បានពិពណ៌នាថា ជាការមិនសមហេតុផលទាំងស្រុង។
ភាពតានតឹងរវាងក្រុងប៉េកាំង និងតៃប៉ិ បានកើនឡើងខ្លាំងចាប់តាំងពីអ្នកស្រី Tsai Ing-wen ជាប់ឆ្នោតជាប្រធានាធិបតីក្នុងឆ្នាំ ២០១៦ ដោយសារតែរដ្ឋាភិបាលអ្នកស្រីចាត់ទុកតៃវ៉ាន់ជាកោះឯករាជ្យ និងមានឈ្មោះផ្លូវការណ៍ថា សាធារណៈរដ្ឋចិន។
ប៉ុន្តែការប្រកាសខ្លួនជារដ្ឋឯករាជ្យរបស់តៃវ៉ាន់ ត្រូវបានប៉េកាំងគំរាមជាញឹកញាប់ថា នឹងប្រើប្រាស់កម្លាំងយោធាវាយយកតៃវ៉ាន់វិញ នៅពេលចាំបាច់៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
