ភ្នំពេញ៖ គណៈកម្មការប្រយុទ្ធប្រឆាំងផលិតផលក្លែងក្លាយក្រសួងមហាផ្ទៃ ដោយមានការសម្របសម្រួលពីសាលាដំបូងរាជធានីភ្នំពេញ បានចុះធ្វើការឆែកឆេរនិងត្រួតពិនិត្យទីតាំងមានទទួលចែកចាយបោះដុំ និងរាយគ្រប់ផលិតផលថែរក្សាសម្រស់អាហារបំប៉នអោយស្បែកស និង Make Up គ្រប់ប្រភេទ ដែលនាំចូលពីប្រទេសថៃ និង កូរ៉េ ធានាថាសុទ្ធ ១០០% យីហោរ ពេជ្រនិច ប៊ីយូធី (Pic_Nic_Beauty)។
ការចុះប្រតិបត្តិការធ្វើឡើងនៅរសៀលម៉ោង៤រសៀល ថ្ងៃទី២៥ ខែមករា ឆ្នាំ២០១៨ ចំណុចផ្ទះលេខ៦៤ដេ ក្រុម១៧ ភូមិ៧ ផ្លូវ២៥៧ ក្នុងសង្កាត់ទឹកល្អក់៣ ខណ្ឌទួលគោក រាជធានីភ្នំពេញ ។
ក្នុងពេលចុះត្រួតពិនិត្យនោះត្រូវបានម្ចាស់ទីតាំងហាមអ្នកព័ត៌មានមិនអោយថតធ្វើការផ្សព្វផ្សាយឡើយ ចំណែកខាងគណៈកម្មការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃវិញមានមន្ត្រីនគរបាលម្នាក់ បានចេញមកស្តីអោយអ្នកយកព័ត៌មាននិងហាមឃាត់មិនអោយធ្វើការផ្សព្វផ្សាយ ព្រមទាំងគំរាមប្តឹងនិងអោយខាងម្ចាស់ទីតាំងប្តឹងថែមទៀត ដែលធ្វើអោយមហាជនមានចម្ងល់ ថាតើហាងខាងលើមានអ្វីដែលត្រូវបិទបាំង ។ ដោយក្រោយការពិនិត្យរួចប៉ូលីសបានឃ្លុំបេហាងខាងលើទុកសិនរង់ចាំបើកការពិនិត្យជាថ្មីម្តងទៀត៕ ដោយ៖បញ្ញាស័ក្តិ
