ភ្នំពេញ៖ រដ្ឋមន្ត្រីមុខងារសាធារណៈ ឯកឧត្ដម ព្រុំ សុខា បានដាស់តឿនឲ្យមន្ត្រីមុខងារសាធារណៈគ្រប់គ្នា ត្រូវអភិវឌ្ឍន៍សមត្ថភាពទៅតាមការរីកចម្រើនប្រព័ន្ធឌីជីថល ឬបដិវត្តឧស្សាហកម្ម ៤.០ ដែលពោរពេញទៅដោយការប្រើប្រាស់បច្ចេកវិទ្យាទំនើបៗ។
រដ្ឋមន្ត្រីមុខងារសាធារណៈ ថ្លែងយ៉ាងដូច្នេះ ធ្វើឡើងក្នុងពិធីប្រកាសចូលកាន់មុខតំណែងថ្នាក់ដឹកនាំ និងមន្ត្រីរាជការក្រសួងមុខងារសាធារណៈ នាថ្ងៃទី៣ ខែមិថុនា ឆ្នាំ២០២០ នៅសាលាភូមិន្ទរដ្ឋបាល។
បដិវត្តន៍ឧស្សាហកម្ម៤.០ នឹងធ្វើឲ្យកម្ពុជារីកចម្រើនស្ទើរគ្រប់វិស័យ។ ការទទួលយកនៃបដិវត្តន៍ឧស្សាហកម្មទី៤នេះ រដ្ឋាភិបាលកម្ពុជា មានគម្រោងរៀបចំផែនការ រយៈពេលវែង ក្នុងការអភិវឌ្ឍសេដ្ឋកិច្ចឌីជីថល និងការរៀបចំឯកសារសម្រាប់រដ្ឋាភិបាលឌីជីថល។ កិច្ចការនេះ មិនមែនជាកិច្ចការរដ្ឋាភិបាលទាំងអស់នោះទេ ប៉ុន្តែជាកិច្ចការរបស់យុវជនកម្ពុជាដែលត្រូវចូលរួមផងដែរ។
ការរីកចម្រើននៃឧស្សាហកម្មទី ៤ មានភាពឆាប់រហ័ស និងទូលំទូលាយ កម្ពុជាត្រូវការរៀនសូត្របន្ថែមទៀត ក្នុងការទទួលយកបដិវត្តន៍ឧស្សាហកម្មទី៤ និងការបណ្តុះបណ្តាលធនធានមនុស្សដែលខ្វះខាតឲ្យបានច្រើន។
ជាមួយគ្នានេះ ឯកឧត្តមរដ្ឋមន្ត្រីមុខងារសាធារណៈ បានដាស់តឿនមន្ត្រីគ្រប់ជាន់ថ្នាក់ ត្រូវបន្តពង្រឹងគុណភាព ប្រសិទ្ធភាព និងប្រសិទ្ធផលការងារទាំងឡាយទាំងពូងជូនក្រសួង ស្ថាប័នរបស់ខ្លួន ពិសេសប្រជាជាតិទាំងមូល។ ឯកឧត្តមបានមានប្រសាសន៍ថា មន្ត្រីមុខងារសាធារណៈគ្រប់រូប ត្រូវរួមគ្នាជាមួយរាជរដ្ឋាភិបាលក្នុងការប្រយុទ្ធប្រឆាំងជំងឺកូវីដ-១៩ ប្រុងប្រយ័ត្នចំពោះសុខភាព ថែរក្សាអនាម័យ បន្តការអនុវត្តតាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួន។ ក្នុងដំណាក់កាលនេះ មិនត្រូវយកលេស Lock down ដើម្បីបង្ការការពារជំងឺកូវីដ-១៩ ហើយខកខានមិនទៅធ្វើការ ឬមិនទទួលបម្រើសេវាសាធារណៈជូនប្រជាពលរដ្ឋនោះឡើយ។
ឯកឧត្ដម ព្រុំ សុខា បានឱ្យដឹងទៀតថា ក្នុងពេលជួបវិបត្តិជំងឺកូវីដ-១៩ ដែលមានកាលៈទេសៈខ្លះមិនអាចចេញធ្វើដំណើរ ឬ Lock down បាននោះ ក៏មិនមែនមន្ត្រីទាំងឡាយត្រូវនៅធ្វើការក្នុងផ្ទះទាំងអស់គ្នានោះដែរ ពីព្រោះមន្ត្រីខ្លះត្រូវផ្ដល់សេវាសាធារណៈដោយផ្ទាល់ជូនប្រជាពលរដ្ឋ៕
ដោយ៖សម្ផស្ស
