បាត់ដំបង៖ កម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បុរសម្នាក់ជួញដូររក្សាទុកនិងថ្នាំម៉ាទឹកកក៤ថង់ ជញ្ជីងថ្លឹងថ្នាំញៀមមួយគ្រឿង ម៉ូតូមួយគ្រឿង សម្ភារពាក់ព័ន្ធមួយចំនួន កសាងសំណុំរឿងបញ្ជូនទៅការិយាល័យជំនាញ បន្តទៅតុលាការ ដើម្បីចាត់ការទៅតាមផ្លូវច្បាប់ នៅរសៀលថ្ងៃទី៤ ខែមិថុនា ឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យម្នាក់នេះ បានធ្វើឡើង កាលពីម៉ោង៣ទៀបភ្លឺថ្ងៃទី៤ ខែមិថុនា ឆ្នាំ២០២០ នៅចំណុចផ្លូវភ្លោះ ភូមិពាមឯក ឃុំពាមឯក ស្រុកឯកភ្នំ និងសង្កាត់ចំការសំរោង ក្រុងបាត់ដំបង ខេត្តបាត់ដំបង។
លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿង បានឲ្យដឹងថា ជនសង្ស័យម្នាក់ដែលចាប់ឃាត់ខ្លួនឈ្មោះប្រាក់ ពន្លឺ អាយុ២៦ឆ្នាំ មានទីលំនៅភូមិចំការសំរោង១ សង្កាត់ចំការសំរោង ក្រុងបាត់ដំបង ខេត្តបាត់ដំបង។ ក្នុងប្រ
តិបត្តិការនេះ កម្លាំងដកហូតបានថ្នាំម៉ាទឹកកក៤ថង់ទម្ងន់១៧០,៤៣ក្រាម ទូរស័ព្ទដៃចំនួន១គ្រឿង ម៉ូតូចំនួន១គ្រឿង ជញ្ជីងស
ម្រាប់ថ្លឹងថ្នាំញៀនចំនួន១គ្រឿង ថង់សម្រាប់ច្រករំលែកថ្នាំញៀនមួយចំនួនទៀត ។
លោក ឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿង បានបញ្ជាក់ថា អនុវត្តតាមមតិណែនាំរបស់ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងដោយបានការសម្របសម្រួលពីលោក គី វណ្ណារ៉ា ព្រះរាជអាជ្ញារងអមសាលាដំបូងខេត្តបាត់ដំបង ក៏ដូចមតិណែនាំជំនាញរបស់លោកឧត្តមសេនីយ៍ត្រី កុយ ហៀង ស្នងការរងផែនការងារប្រឆាំងគ្រឿង លោកវរសេនីយ៍ឯក ឡុង យោធាវីរៈ អធិការនគរបាលស្រុកឯកភ្នំ ដឹកនាំកម្លាំងផ្នែកជំនាញ រួមជាមួយកម្លាំងនគរបាលអន្តរាគមន៍ និងកម្លាំងប៉ុស្តិ៍នគរបាលរដ្ឋបាល រួមជាមួយកម្លាំងអធិការនគរបាលក្រុងបាត់ដំបង ដែលមានលោកវរសេនីយ៍ឯក ឆាង វណ្ណឆៃ ជាអធិការចុះប្រតិបត្តិការ បង្ក្រាបមុខសញ្ញារក្សាទុកដោយខុសច្បាប់ នូវសារធាតុញៀន១ករណី ក្នុងបទល្មើសជាក់ស្តែងនៅចំណុចផ្លូវភ្លោះ ភូមិពាមឯក ឃុំពាមឯក ស្រុកឯកភ្នំ និងសង្កាត់ចំការសំរោង ក្រុងបាត់ដំបង ខេត្តបាត់ដំបង។ បច្ចុប្បន្ននេះ កម្លាំងបានកសាងសំណុំរឿង បញ្ជូនជនសង្ស័យនិងវត្ថុតាង ទៅការិយាល័យជំនាញបន្តទៅតុលាការ ដើម្បីចាត់ការទៅតាមផ្លូវច្បាប់ នៅរសៀលថ្ងៃទី៤ ខែមិថុនា ឆ្នាំ២០២០ហើយ៕
ដោយ៖អ៊ុងសារុំ