ភ្នំពេញ៖ មន្ត្រីរដ្ឋបាលរាជធានីបានបញ្ជាក់ថា៖ដោយពិនិត្យឃើញពីស្ថានភាពចរាចរណ៏ និងបញ្ហាសណ្តាប់ធ្នាប់ក្នុងរាជធានីភ្នំពេញកាន់តែអាក្រក់ឡើង និងស្មុគស្មាញ រដ្ឋបាលរាជធានីភ្នំពេញនឹងមិនអនុញ្ញាតិឲ្យរថយន្តធុនធំដឹកធ្ងន់ធ្វើចរាចរចូលក្រុងនៅពេលថ្ងៃទៀតទេ។ នៅក្នុងកិច្ចប្រជុំជាមួយអាជីវករលក់ម៉ូតូក្នុងរាជធានីភ្នំពេញនារសៀលថ្ងៃទី២៥ខែមករា លោក មាន ចាន់យ៉ាដា អភិបាលរងរាជធានីភ្នំពេញបានលើកប្រសាសន៍ណែនាំរបស់លោកឃួង ស្រេង អភិបាលរាជធានីភ្នំពេញមកបញ្ជាក់ថា៖ចាប់ពីថ្ងៃនេះតទៅរដ្ឋបាលរាជធានីភ្នំពេញមិនមានការចេញប័ណ្ណសម្រាប់រថយន្តចូលក្រុងពេលថ្ងៃទៀតទេដោយសាររថយន្តធំទាំងនោះបង្កការកកស្ទះចរាចរ បាត់សណ្តាប់ធ្នាប់កាន់តែខ្លាំង។
លោកអភិបាលរងបានឲ្យដឹងទៀតថា៖កាលពីអណត្តិអភិបាលមុន គឺមានការចេញប័ណ្ណឲ្យរថយន្តធំចូលក្រុងបាននៅពេលថ្ងៃ តែពីពេលនេះទៅគឺមិនមានទៀតទេ។
ពាក់ព័ន្ធបញ្ហាចរាចរនេះលោកវរសេនីយ៍ឯកចេវ ហាក់ ស្នងការរងនគរបាលរាជធានីភ្នំពេញបានបញ្ជាក់ថា៖ប្រមុខរាជរដ្ឋាភិបាលកម្ពុជាបានណែនាំឲ្យសមត្ថកិច្ចពង្រឹងច្បាប់ចរាចរផ្លូវគោកទូទាំងប្រទេសដើម្បីកាត់បន្ថយគ្រោះថ្នាក់ចរាចរដែលប្រជាពលរដ្ឋមួយចំនួនមិនបានយកចិត្តទុកដាក់ និងគោរពច្បាប់ចរាចរនេះ។ជាមួយគ្នានេះលោកស្នងការរង ក៏បានអំពាវនាវឲ្យបងប្អូនអាជីវករលក់ម៉ូតូទាំងអស់ ត្រូវតែលក់ម៉ូតូព្រមទាំងថែមមួកសុវត្ថិភាព ក៏ដូចស្លាក់លេខដល់អ្នកទិញតែម្តងដើម្បីឲ្យអ្នកទិញទាំងនោះគោរពច្បាប់ចរាចរ ក៏ដូចសហការជាមួយអាជ្ញាធរផងដែរ។
ទាក់ទិននឹងរថយន្តធំនេះ លោកសាំ ពិសិដ្ឋ ប្រធានមន្ទីរសាធារណៈការនិងដឹក ជញ្ជូនរាជធានីភ្នំពេញឲ្យដឹងថា៖រហូតមកដល់ពេលនេះ រថយន្តធំដែលបានចុះបញ្ជីរួចមានជាង១ម៉ឺនគ្រឿងក្នុងទីក្រុង។គេតែងសង្កេតឃើញថា ៖កន្លងមករថយន្តធំទាំងនោះតែងបង្កឲ្យប៉ះពាល់ដល់សណ្តាប់ធ្នាប់ របៀបរៀបរយសាធារណៈ បង្កឲ្យមានគ្រោះថ្នាក់ចរាចរ ប៉ះពាល់បរិស្ថាន សោភ័ណភាពទីក្រុង បង្កការកកស្ទះ និងគ្រោះថ្នាក់ចរាចរថែមទៀតដោយសារតែភាពអាណាធិបតេយ្យបើកបរចូលក្នុងទីក្រុងដោយរថយន្តធំមិនគោរពតាមការណែនាំរបស់អាជ្ញាធរ។ដូច្នេះចាប់ពីពេលនេះទៅ អាជ្ញាធរនឹងមានវិធានការផ្លូវ ច្បាប់ជាថ្មីក្រោយពីធូរលុងមួយរយៈ និងសុំឲ្យម្ចាស់រថយន្តទាំងឡាយចូលរួមអនុវត្តតាមការជូនដំណឹងរបស់អាជ្ញាធរមានសមត្ថកិច្ចក្នុងការអនុវត្តច្បាប់ចរាចរផ្លូវគោកងោយមានប្រសិទ្ធភាព៕ ដោយ៖កូឡាប
