ភ្នំពេញ៖ រថយន្ដដឹកខ្សាច់មួយគ្រឿងរេចង្កូតមកបុកនឹងរថយន្ដកូរ៉េមួយ ដែលធ្វើដំណើរបញ្ច្រាសផ្លូវគ្នា បណ្ដាលរងការខូចខាតខ្ទេចខាងមុខ នៃរថយន្ដយ៉ាងដំណំ គាបជាប់ព្រូរថយន្តម្នាក់ និងម្នាក់ទៀតរបួសជើង ចំណែកឯរថយន្តដឹកខ្សាច់បានបន្តទៅបុកបង្គោលភ្លើងបំភ្លឺផ្លូវបាក់អស់មួយដើមទៀត អូសទៅមុខជិត៤០ម៉ែត្រទៀតទើបអស់ល្បឿន ។ ករណីនេះបង្កឲ្យមានការភ្ញាក់ផ្អើលកាលពីវេលាម៉ោង៤ និង២០នាទីទៀបភ្លឺ នៅថ្ងៃទី៥ ខែមិថុនា ឆ្នាំ២០២០ ស្ថិតតាមបណ្ដោយផ្លូវ៦០មែត្រ មុខការិយាល័យលក់ផ្ទះបុរីប៉េងហ៊ួត ក្នុងសង្កាត់ចាក់អង្រែក្រោម ខណ្ឌមានជ័យ។
បើយោងតាមប្រភពព័ត៌មាន ពីកន្លែងកើតហេតុបានប្រាប់ឲ្យដឹងថា មុនពេលកើតហេតុគេឃើញរថយន្ដបែនដឹកខ្សាច់មួយគ្រឿង ពណ៌ស្លែកពាក់ផ្លាកលេខភ្នំពេញ3E-5982 ដែលធ្វើដំណើរក្នុងទិសដៅពីជើងមកត្បូង ក្នុងល្បឿនលឿន ពេលមកដល់ចំណុចកើតហេតុ ដោយបើកខ្វះការប្រុងប្រយ័ត្ន និងដឹកខ្សាច់ធ្ងន់ផង ក៏រេចង្កូតទៅចូលកន្លងផ្លូវមួយទៀត បណ្ដាលឲ្យទៅបុករថយន្ដកូរ៉េមួយគ្រឿង ក្បាលពណ៌ខៀវខ្ចីពាក់ផ្លាកលេខ យ 1394.ភព3 ដែលធ្វើដំណើរបញ្ច្រាសផ្លូវគ្នាពេញទំហឹង រងការខូចខាតខ្ទេចមុខរថយន្ដគាបជាប់កៃកុងរថយន្ដម្នាក់របួស និងម្នាក់ទៀតបាក់ជើង ត្រូវបានរថយន្ដសង្គ្រោះបន្ទាន់ ដឹកទៅមន្ទីរពេទ្យភ្លាមៗ ចំណែកឯកៃរថយនបង្កបានចុះពីរថយន្ដគេចខ្លួនបាត់សម្រាល។
ក្រោយកើតហេតុសមត្ថកិច្ចចុះទៅដល់ចំណុចកើតហេតុ ធ្វើការវាស់វែងយករថយន្តទាំង២គ្រឿង យករក្សាទុកទៅការិយាល័យចរាចរណ៍ជើងគោក នៃស្នងការរាជធានីភ្នំពេញ រង់ចាំម្ចាស់រថយន្ដបង្ក ដូចជាអ្នកដំណាងមកដោះស្រាយតាមផ្លូវច្បាប់៕
ដោយ ៖ ភត្រា និងសាម៉េត