ភ្នំពេញ៖ ចាប់ពីថ្ងៃនេះទៅ អ្នកប្រើប្រាស់បណ្ដាញសង្គមហ្វេសប៊ុកទូទាំងពិភពលោកអាចផ្ទេររូបថត និងវីដេអូ របស់ពួកគេទៅ Google Drive បានយ៉ាងងាយស្រួល។ ការដាក់ឱ្យប្រើមុខងារនេះគឺជាផ្នែកមួយនៃកិច្ចសន្យា Data Transfer Project រវាងក្រុមហ៊ុន Facebook, Google, Microsoft និង Twitter ដើម្បីឱ្យអ្នកប្រើប្រាស់ងាយស្រួល ក្នុងការផ្ទេរទិន្នន័យ ពីក្រុមហ៊ុនមួយទៅក្រុមហ៊ុនមួយទៀត ដោយមិនចាំបាច់ត្រូវតែនៅប្រើក្រុមហ៊ុនតែមួយរហូត។
បើតាមនាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department នៅថ្ងៃទី៥ខែមិថុនាឆ្នាំ២០២០ ម្យ៉ាងវិញទៀត នេះក៏អាចជួយអ្នកប្រើប្រាស់រក្សាទុកទិន្នន័យ កុំឱ្យបាត់បង់នៅពេលដែលគណនីណាមួយនោះ ត្រូវបានគេលួចចូល ហើយបំផ្លាញទិន្នន័យទាំងអស់ចោលនោះ។
ដើម្បីផ្ទេរទិន្នន័យពីគណនីហ្វេសប៊ុកទៅ Google Drive លោកអ្នកអាចចូលទៅក្នុង Settings របស់ហ្វេសប៊ុកដូចខាងក្រោម៖
– នៅផ្នែកខាងស្តាំ ចុចលើសញ្ញា “គំនូស៣លើគ្នា” – ចុចលើពាក្យ Settings – ចុចលើពាក្យ Transfer a Copy of Your Photos or Videos – ចុចលើ Choose Destination -> រើសយក Google Photos – ចុច Next ហើយ Login ចូល Google Drive។
លោកអ្នកអាចផ្ទេរបានតែរូបថត ឬវីដេអូ ប៉ុន្តែមិនអាចផ្ទេរម្តងទាំងរូបថត និងវីដេអូ ក្នុងពេលតែមួយបានទេ៕
ដោយ៖កូឡាប