ដូចដែលប្រិយមិត្តជាច្រើនបានជ្រាបរួចហើយ ចំពោះករណីនៃការស្លាប់របស់បុរសស្បែកខ្មៅ George Floyd ដោយសារប៉ូលិស៤នាក់ យកជង្គង់សង្កត់.ក ដែលផ្តើមចេញពីរឿងចោទប្រកាន់ទិញបារី ជាមួយលុយដុល្លារក្លែងក្លាយ ២០ ដុល្លារ បង្កឲ្យមហាជនផ្ទុះកំហឹង ចេញមកធ្វើបាតុកម្មកក្រើកទូទាំងប្រទេសអាមេរិក ដែលពុំធ្លាប់កើតមានពីមុនមក។
ទោះយ៉ាងណា រហូតមកមកទល់ពេលនេះ ការធ្វើបាតុកម្មហាក់នៅពុំទាន់ស្ងប់នោះទេ ដោយក្នុងនោះ មានមនុស្សមួយចំនួន ក៏បានយកហេតុការណ៍ដ៏អាក្រក់នេះ មកលេងសើច ដោយចាត់ទុកជាផ្នែកមួយដែលពួកគេដាក់ឈ្មោះថា «George Floyd Challenge» ។
រូបភាពយកជង្គង់សង្កត់លើ.កមិត្តរបស់ខ្លួន ដែលជាការធ្វើត្រាប់ឡើងវិញ ចំពោះវិធីដែល George Floyd ត្រូវបានសម្លាប់ បានកំពុងរីករាលដាលពាសពេញសង្គម បង្កឲ្យមានភាពវិកវរកាន់តែខ្លាំងក្នុងចំណោមអ្នកនិយមលេងអ៊ិនធឺណិត។
ទិន្នាការនេះ ត្រូវបានគេរកឃើញដំបូង នៅពេលដែលក្មេងប្រុសជំទង់ៗ៣នាក់ នៅអង់គ្លេស ត្រូវបានចាប់ខ្លួននិងត្រូវបានស៊ើបអង្កេតពីបទល្មើសបែបស្អប់ខ្ពើម ចំពោះការធ្វើតាមរបៀបដ៏គួរឱ្យខ្លាចដែល Floyd បានស្លាប់, នេះបើយោងតាម The Ny Post។
ប៉ុន្តែមិនយូរប៉ុន្មានរូបថតប៉ុន្មានសន្លឹកទៀត ក៏បានលេចចេញមក ដោយអះអាងថាជាផ្នែកមួយនៃ “George Floyd Challenge”។
ទោះយ៉ាងណា ករណីលេងសើចបែបឡប់ៗនេះ ឃើញថាកំពុងបង្កឲ្យមានភាពច្របូកច្របល់ក្នុងចំណោមអ្នកនិយមលេងអ៊ិនធឺណិត ដែលកំពុងអំពាវនាវរកអត្តសញ្ញាណបុគ្គលដែលពាក់ព័ន្ធ។
ដោយសារតែមានការអំពាវនាវឲ្យបញ្ឈប់សកម្មភាពនេះ ឥឡូវនេះ គេសង្កេតឃើញថា និន្នាការនេះហាក់មិនរាលដាលនៅលើអ៊ីនធឺណិតទៀតទេ ព្រោះរូបភាពថ្មីនៃល្បែងនេះដូចជាលែងលេចចេញ៕
ប្រែសម្រួល៖ លឹម ហុង (ប្រភព៖ worldofbuzz)
